Paulus ni surat kedua ber
Timotius
Salam
1:1-2
1-2 Ye surat nof yakw Paulus,
ber Timotius ko.
Yakw ye Yesus ninr Ray Silai Ni mangsiduk.
Yakw kweluk Ni mangsiduk klwarat Ratu Ni mpempeang.
I nmpeang ma kufwibar ber tomwatar feti keta ronri momorip dedesar ma I nyoding a ne farlan ralele Yesus ninr Ray Silai.
Ma yakw kal ko fen anakw ma kwamis ko.
Yakw ktwak ma weni Amninrar Ratu ma Yesus ninr Ray Silai ma neluk Mangnrure nbal ber kit a ne rfatutu nir dalam ngamone ma nir lolompang,
ma ral maline ber ko.*
Paulus nose alang ber Ratu
1:3-18
3 Yakw kose alang ber Ratu ma klwangun I kor dalangw lelerap farlan luryain empungw nusingw ma rlangun I a nbal.
Ma lere nronram ma kswampayang e,
to kumlufe ko.
4 Ma to kumlufe ma ko mtwasing noak a ne.
Iane nwayat ma kmpweang resi ma kutungan kor ko nema dalangw a nsenang.
5 Yakw kunremi nbal feti ko mulele botuan Yesus ninr Ray Silai farlan luryain ma ampoi Lois ma anoi Eunike ne.
Ma kulele desar feti ko mulele Yesus ninr Ray Silai ne farlan sir a nbal.*
6 Mpa Timotius,
kete mumlufe desar ma mpwaki kuase ma Ratu nal ber ko a ne noak ma kswaup limangw na ko.
7 Fali Ratu Smwangtany ma nal ber kit a ne to nose ma tamtaut,
nempa nose ma dalminrar ramkoran,
ma takamis kit,
ma bise ma tayan ninr makeus yatkar.
8 Mpa kete mweat ma mifbotin na Yesus ninr Mangnrure.
Ma kete mweat feti napi yakw fali to ningw sal,
nempa kulele I a mpa rnau yakw na sel.
Ma ka mlwarat ma mkwoman suse nbal noak ma mufwibar Ibar Ngamone,
fali Ratu keta nafkoran ko ma boam mal ma mubare suse ne.
9 Ratu nfair kit tof ninr salar ma nfil a nkese kit ma teluk Ni tomwatar.
I nose farane to nsalan nof ninr adat ngamonar nempa Ni dalamy ngamone ber kit ma nlarat safe ma ntetak lo.
Noak ma I to nose saryamprene fuky e,
I ntetak feti keta nfatutu Ni dalamy ngamone ber kit nalyole Yesus ninr Ray Silai.
10 Ma lere ye betno Ratu nfatutu dalamy ngamone ber kit,
ma nsiduk Yesus ninr Ray Silai ma nfair kit nof ninr salar.
Mpa farlan talele Ibar Ngamone e,
keta Ratu nafmorip a nbali kit ma nal momorip dedesar ber kit.
11 Ratu nfair yakw lo ma kweluk mangafwibar,
mangsiduk,
ma kweluk tuangguru ma kuftutu Ibar Ngamone ber tomwatar.*
12 Ma ningw karyayar a ne rose ma kwoman suse na sel ye,
boloka farane to kmweat fali kufai feti ise ma kulele.
Ma kulele feti I Ni kuase ma najake ningw momoripa terik lere ma nukun saryamprene.
13 Timotius,
ka mlwarat dedesar anftutw botunar monuk ma kfwalak ber ko a ne.
Ma ka mulele dedesar Yesus ninr Ray Silai,
ma ka mkwamis tomwatar fali dalam lese mor I lo.
14 Ratu nfalak ber kit ma tafbotin anftutw botunar ye ber tomwatar,
mpa ka mujake fen ngamone anftutw botunar na Yesus ma Ratu nal ber ko a ne.
Ma Ratu Smwangtany ma namin kit a ne la ntulung ko ma mujake safe ma nal a ne.
15 Ko mufai feti tomwatar monuk ma ralele Yesus ma ramin propinsi Asia ne to rfaduli yakw lo.
Nof sir a ne Figelus ma Hermogenes a nbal.
16-17 Boloka farane Onesiforus to nmeat ma nsalan yakw na sel.
Lama nait kote Roma,
i nanriak nareke terik ma natungan nor yakw.
Iane nwayat ma dalangw a nsenang fali dedesar ma nakmat yakw.
Mpa ktwak ma weni Ratu nfatutu Ni dalamy ngamone ber ni dasdalam.
18 Ma ko mufai feti na Efesus e,
lain yadin ma ntulung yakw.
Mpa ktwak ma weni ninr Mangnrure nfatutu dalam ngamone ber i na lere ma Ratu nukun saryamprene.