Paulus ni surat kedua ber soranyar na
Tesalonika
Salam
1:1-2
1 Soranyar mir kateman na Tesalonika,
ye surat nof kam Paulus,
Silas ma Timotius,
ber a kmi monuk ma myeluk Amninrar Ratu ma Yesus ninr Ray Silai Nir tomwatar.*
2 Kam mtak ma weni Amninrar Ratu ma Yesus ninr Ray Silai rfatutu Nir dalam ngamone ma ral maline ber a kmi.
Paulus nose alang ber Ratu
1:3-12
3 Wangur mir kateman,
kam dedesar ma mose alang ber Ratu fali mtyafal ma milele Yesus ma mikamis a kmi.
Ma kam mose farane iane ma diat.
4 Iane nwayat ma dedesar e,
kam mdangin a kmi ber Ratu Ni soranyar na kote walyetar,
ma mfalak feti boloka tomwatar rsil a rbabal a kmi nempa mimkoran ma milele Yesus.
5 Sir rtean a kmi farane fali mlyarat Ratu ma boloka farane kmi dedesar ma milele I,
mpa keta I ntetak feti kmi bise ma myeluk Ni tomwatar noak ma neluk Rai ma nfarete saryamprene.
Iane nfatutu feti Ratu ntetak ngriar nor malonri.
6 Fali ni botuan e,
Ratu ye namlonry,
I keta nbalas ber tomwatar ma rtean kmi a ne.
7 Ma kmi ma lere ye sir rtean a kmi far kam ye,
keta I nalin kit monuk,
noak ma Yesus ninr Ray Silai nma nof surga nor Ni malaektar ma nir kuase silai.
8 Ma keta ntompur a nbal nor au folur ma nukun tomwatar ma to rmpeang ma rafai Ratu,
ma to rmorip rlarat ibar na Yesus kit ninr Mangnrure.
9 Mpe Ratu keta nukun sir a ne ma rkoman suse dedesar.
Iane nwayat ma keta rakleti dodo nof ninr Mangnrure Ni kuase silai ma nlie nlengan a ne.*
10 Kabanir monuk a ne keta rbotin noak ma I nma saryamprene.
Ma keta miktem tomwat lelerpar ma ralele I a ne mdyangin I,
fali kmi monuk milele ibar ma mfalak ber a kmi a ne.
11 Iane nwayat ma dedesar ma msampayang ber a kmi.
Ni botuan e,
Ratu nfil a kmi lo ma myeluk Ni tomwatar mpa kam msampayang ber I farye,
“O Yesus ninr Mangnrure Ko,
kam mtak Ko ma mtwulung soranyar na Tesalonika ma rose kabain ngamonar farlan biase ma Nim tomwatar rose.
Sir ye rkarya ber Ko fali ralele Yesus.
Mpa mtak Ko ma mal Nim kuase la mtwulung sir nema nir karyayar a ne ubany ber sir.”
12 Kam msampayang farane nema tomwatar monuk rdangin Yesus ninr Mangnrure nof kabain ngamonar ma kmi myose ne.
Ma msyampayang a nbal nema I nose ma mir momorip farlan I,
fali kit ninr Ratu ma Yesus ninr Ray Silai ne Nir dalam ngamone ber a kmi.