Paulus ni surat pertama ber soranyar na
Tesalonika
Salam
1:1
1 Soranyar mir kateman na Tesalonika,
ye surat nof kam Paulus,
Silas ma Timotius,
ber a kmi monuk ma myeluk Amninrar Ratu ma Yesus ninr Ray Silai Nir tomwatar.
Ka weni Ratu nfatutu Ni dalamy ngamone ma nal maline ber a kmi.
Soranyar na Tesalonika rfatutu nir wewelmpampan ngamonar ma dedesar ma ralele Yesus
1:2-10
2 Kam dedesar ma msampayang ma mose alang ber Ratu fali kmi monuk dedesar ma milele Yesus.
Ma kam dedesar ma manremi kmi a na mamy sampangar.
3 Kam mose alang ber Ratu fali mir karya ngamonar ber Ratu ne nfatutu feti milele Yesus ninr Ray Silai.
Ma dedesar ma mtyulung tomwatar fali mkyamis desar sir.
Ma kam mose alang ber Ratu nbal fali kmi dedesar ma milele Yesus ninr Ray Silai feti keta nma ma nfair a kmi.
I a ne kit ninr Mangnrure nbal.
4 Wangur mir kateman ma Ratu nkamis a kmi,
kam mose alang ber I a nbal fali kam mafai feti I nfil a kmi lo ma myeluk Ni tomwatar.
5 Fali noak ma kam mafwibar Ibar Ngamone na Yesus ber a kmi e,
kam to matanuk motak nempa Ratu smwangtany nal kuase ber kam a nbal nema kmi milele safe ma kam mfalak a ne.
Ma noak ma taktem e,
koko kmi a msyalan mamy momorip ngamonar lo.
Iane la ntulung a kmi ma mkyaul myal Ibar Ngamone ma mafwibar a ne.
6 Ma kmi myorip a mlyarat mamy wewelmpampane lo ma ninr Mangnrure nbal.
Boloka tomwatar rose suse desar a kmi nempa noak ma mlyangun Ratu Ni ngribatnir e,
Ratu Smwangtany nose ma dalmir a rsenang.
7 Kmi myorip farane iane neluk contoh ber tomwatar ma ralele Yesus,
ma ramin propinsi Makedonia ma Akhaya.
8 Fali Ibar Ngamone na ninr Mangnrure ma mifwibar a ne nsor monuk lo ntabw nof mir kote ne nti nait propinsi Makedonia ma Akhaya nir kateman.
To na lan iane nempa tomwatar na mpenempen a nbal rdengar feti milele Ratu mpa to mfalak sasaf lo.
9 Ma sir rasaur a nbal feti noak ma kam ma e,
kmi mlyangun kam.
Ma rfalak feti mnyau kalin mir ratwawatar,
ma msyatngur ber Ratu botuan ma namin dedesar ma mlyangun I.
10 Ma rfalak a nbal feti kmi dedesar ma mdyaf Ratu Anaky ma keta nma nof surga,
iane Yesus ma luryain e,
Ratu nafmorip a nbali I.
Noak ma I nma nbali saryamprene,
Ratu keta nukun tomwatar nempa Yesus ye ma keta nalin kit nema Ratu kete nukun kit.