Paulus ma Barnabas na Ikonium
14:1-7
1 Na Ikonium Paulus ma Barnabas rti Yahudyar nir das sampayang a nbal.
Na iane sir raftutu tomwat Yahudyar ma tomwatar ma to Yahudi sir nwayat ma yadin ma ralele Yesus.
2 Nempa tomwat Yahudyar ketnir ma to rlampir ma ralele Yesus raroi tomwatar ma to Yahudi sir nwayat ma dalmir maninik tomwatar ma ralele Yesus ne.
3 Nempa Paulus ma Barnabas ramin iane far dodo.
Sir rbaran ma raftutu tomwatar na Yesus ninr Mangnrur Silai.
I nal kuase ber sir ma rose fanikar ma kabain mpasalnar.
La nfatutu feti ibar na Ratu Ni dalamy ngamone ne botuan.
4 Nempa tomwatar na kote ne rsaman sir a rmpan du.
Ketnir rlarat tomwat Yahudyar ma ketnir a nbal e,
rlarat mangsidkwar du a ne.
5 Ne tomwat Yahudyar ror nir mangfaretar numur tomwatar ma to Yahudi sir a ne rose ma rbabal mangsidkwar du a ne ma rakjai sir ror batyar.
6 Nempa mangsidkwar du a ne rafai nir rerengyar,
mpa rafla far kote Listra ma Derbe,
na yampren Likaonia ma yampren seriny baldu.
7 Na iano sir rafwibar Ibar Ngamone nbal.
Paulus ma Barnabas na kote Listra ma Derbe
14:8-20
8 Na kote Listra tomwat sa ma namlukut ntabw nof ni talengankire.
Mpa to nmpan desar.
9 I namtoran ma ndengar Paulus a natanuk.
Paulus nsalan tomwate ne bise ma nangamon fali nalele Yesus.
10 Mpa Paulus a nfalak nor liriny silai,
“Mumdir lo!”
Ne tomwate ne namdir desar ma mpane mponi i.
11 Noak ma tomwat ngayadin rsalan safe ma Paulus nose ne,
sir rafwayak ror Likaonia liriny,
“Sir ye dewayar ma rose felnir far tomwatar ma rtompur saryamprene.”
12 Ne sir rafngare Barnabas na dewa Zeus,
ma Paulus na dewa Hermes fali i ye ma nonri tnyanuk.a
13
Dewa Zeus ni mangsompe nonry nir snyompar ber Paulus ma Barnabas (14:13)
Ma ni mangsompe nma e,
nonry lembu merwanar ma rew bungar far kote ne ni finru matan.
I nor tomwat ngayadin rose ma rfen lembuar ma ral fen nir snyompar ber mangsidkwar du a ne.
14 Noak ma Barnabas ma Paulus rafai safe ma keta rose,
sir rabisi nir rabtyar ma rfatutu feti to rmpeang mpa rafla far tomwat ngayadin a ne ma rafwayak feti,
15 “Hei,
fali safe ma myose farye?
Kam ye tomwat biase farlan kmi!
Kam mamin ye ma mafwibar Ibar Ngamone ber a kmi,
nema mtyate kabanir ma to ubnir a ne ma mlyarat Ratu ma nmorip.
I ye ma nose langit,
ma saryamprene numur tasik ma safe-safe monuk.*
16 Luryain a ne Ratu nsalan lonri tomwatar na nusar monuk ma rmpan a rlarat nir mpempeang.
17 Boloka farane Ratu nfatutu dalamy ngamone ber kit dedesar.
Ni dalamy ngamone ne kit tsalan tof ni tewat ma ntolar udan la naisi let isnir,
ma nal tnyamar dengan,
ma nose ma tsenang.”
18 Boloka mangsidkwar a ne rfalak lo,
nempa sir to bise ma rose rteri tomwat ngayadin a ne ma rloik nir snyompar ber sir.
19 Nempa tomwat Yahudyar ketnir rof Antiokhia ma Ikonium rma ma rfule tomwat ngayadin a ne nema ror sir.
Betno ral batyar la rakjai Paulus ma rafliak feti nmat lo mpa rakei i far kote burit.
20 Nempa tomwatar ma ralele Yesus na iano ramdir a rkolu i,
ne npote i ma nbali i far kote ne dalam.
Ni bobole ne betno radu Barnabas ral far kote Derbe.
Paulus ma Barnabas rbali sir far kote Antiokhia
14:21-28
21 Paulus ma Barnabas rafwibar Ibar Ngamone na kote Derbe,
ma tomwatar yadin ralele Yesus.
Mpene rbali sir far kote Listra,
Ikonium,
ma Antiokhia na nus Pisidia.
22 Na kotar a ne sir rafkoran manglartar dalmir ma rsurat sir nema ralele Yesus dedesar.
Ma rfalak feti,
“Ka tkoman susar yadin a fuky betno tsenang a na Ratu Ni ain farete.”
23 Ne Paulus ma Barnabas rfil mangonbain gerejar na mpane soranyar.
Lama rsampayang ma rpuase,
sir rtak Ratu ma ralele I a ne ma najake mangonbanir a ne.
24 Mpene Paulus ma Barnabas raloran nir mpampane ma rlole monuk nus Pisidia terik nus Pamfilia.
25 Lama rafwibar Ratu Ni ngribatnir a na kote Perga,
rti kote Atalia.
26 Nof a ne sir rfangat kabal far Antiokhia.
Luryain e,
tomwatar ma ralele Yesus na kote ne rtak Ratu ma nfatutu dalamy ngamone ber sir ma rsoru nir karyae.
Ma lere ye nir karyayar a ne omp lo.
27 Rait Antiokhia sir rafburat soranyar a ne ma rasaur safe-safe monuk ma Ratu nose na nir karyae.
Ma Ratu nfatutu dalamten ngamonar ber tomwatar ma to Yahudi sir ma ralele Yesus a nbal.
28 Paulus ma Barnabas ror tomwatar ma ralele Yesus na kote ne far dodo.