Sidang na Yerusalem
15:1-21
1 Ler sa e,
tomwatar ketnir rof propinsi Yudea rti kote Antiokhia ma raftutu tomwatar ma ralele Yesus na iane feti farlan to rsunat sir a rlarat tetetkar ma Ratu nal ber Musa,
keta Ratu to nfair sir nof nir salar.*
2 Nempa Paulus ma Barnabas rbangal desar tomwatar a ne nir andanwar.
Mpa soranyar ma ramin iane rfil Paulus ma Barnabas numur tomwatar ketnir rof soranyar a ne ma rti rakmat mangsidkwar ma mangonbain gerejar na Yerusalem ma ratanuk na ngrie ne.
3 Soranyar na Antiokhia ror sir a rti kote burit,
betno rmpan ralyole yampren Fenisia ma Samaria.
Na iano sir rasaur feti tomwatar ma to Yahudi sir ralele Yesus a nbal.
Tomwatar ma ralele Yesus na iane rdengar farane rsenang resi.
4 Noak ma rait Yerusalem,
soranyar ma mangsidkwar numur mangonbain gerejar rlangun sir.
Sir rasaur safe-safe monuk ma Ratu nose na nir karyayar a ne lo.
5 Nempa tomwatar ketnir rof faburat Farisi ma ralele Ratu,
ramdir ma rfalak,
“Tomwatar ma to Yahudi sir,
ka rsunat sir ma rlarat tetetkar ma Ratu nal ber Musa.”
6 Mpe mangsidkwar numur mangonbain gerejar a ne rabut sir ma rsidang ngrie ne.
7 Sir raale andaun na ngrie ne dodo desar.
Mpe Petrus namdir ma nfalak,
“Hei wangur,
kmi mifai feti bengfir a ne Ratu nfil yakw lo nof mir kateman ma kufwibar Ibar Ngamone ber tomwatar ma to Yahudi sir nema ralele nbal.*
8 Ratu nafai tomwatar dalmir,
mpa nal Smwangtany ber sir farlan ma nal ber kit a nbal la nfatutu feti nlangun sir lo.*
9 Nof sir ma kit e,
Ratu to nasalan sou.
I naflerap dalmir fali ralele Yesus.
10 Ma safema miteman Ratu,
ma mfyalak ber tomwatar ma to Yahudi sir ma ralele Yesus ne feti ka rlarat monuk Musa ni yayatur mabertar.
Safo kit a ma empninrar nusinrar e,
to bonir ral ma rlarat yayatrwar a ne.
11 Ni botuan e,
kete tean sir,
fali talele feti Yesus ninr Mangnrur Silai nfatutu Ni dalamy ngamone ber kit,
mpa Ratu nfair kit tof ninr salar farlan sir a nbal.”
12 Tomwatar monuk ma ramin a ne ramlin.
Mpe Paulus ma Barnabas rasaur feti Ratu nal kuase ber sir ma rose fanikar ma kabain mpasalnar ber tomwat walyetar ma to Yahudi sir.
13 Lama radu a rasaur monuk,
Yakobus nfalak,
“Hei wangur,
mdyengar yakw,
14 Simon betno nfalyole feti luryain e,
Ratu nfatutu Ni ngamone ber tomwatar ma to Yahudi sir,
ma nfil tomwatar nof sir a ne ma reluk Ni tomwatar.
15 Iane farlan ma rarengi na nabyar nir Kitpar farye:
16 Ratu nfalak,
‘Keta kmwa kbwal ma kufdiri kbwali Daud ni das ma namsos a ne,
ma kuflyair mangamsosar nema namkoran a nbali,*
17 Yakw kose farane nema tomwatar ma to Yahudi sir numur nus walyetar rma ma ranriak Yakw,
sir ye ma kfwil sir lo reluk Ningw tomwatar.’
18 Ma kufbwotin ngrie ne nof luryain lo.”
19 Mpe ningw andaun farye,
“Ka kete tose suse tomwatar ma to Yahudi sir ma rbali sir ber Ratu ne lo.
20 Nempa ka tarengi surat ma tafbotin ber sir feti,
ka rliak sir rof tnyamar ma rsompe ber dewayar a ne,
kete ranronr,
ma kete rane binatngar ma rmenrak a rfen sir a ne ma kete rane tnyamar ma lolone darnir.*
21 Fali nof luryain e,
rafwibar dedesar Musa ni tetetkar na kotar lo,
ma rbaca tetetkar a ne na mpane ler Sanari na das sampangar terik lere ye.”
Mangsidkwar rarengi surat ber tomwatar ma ralele Yesus ma to Yahudi sir
15:22-35
22 Mpene mangsidkwar ma mangonbain gerejar numur soranyar monuk a ne rfat ma lese ma rfil tomwatar ketnir rof sir ma rsiduk raktem Paulus ma Barnabas far Antiokhia.
Tomwatar ma rfil sir a ne Silas ma Yudas ma rtar feti Barsabas.
Sir ye ma reluk mangfaretar ber soranyar a ne.
23 Sir ronry surat ber soranyar na Antiokhia,
ma isiny farye,
“Ye wamir mangsidkwar ma mangonbain gerejar ma mamin Yerusalem kam mose salam ber wamyamar ma to Yahudi sir a na Antiokhia,
Siria ma Kilikia.
24 Kam mdengar feti tomwatar ketnir rof kam rti rakmat a kmi ma rose suse kmi ror nir anftutwar safo kam to mluan sir.
Iane nwayat ma dalmir suse ma to mifai feti mlyarat ise.
25 Mpa mfat ma lese ma mfil tomwatar ketnir ma msiduk sir ber a kmi.
Sir ma keta raktem Barnabas ma Paulus ma mkamis sir a ne.
26 Radu ye ma ketla tomwatar rfen sir fali ninr Mangnrure ngarany,
iane Yesus ninr Ray Silai.
27 Mpa msiduk Yudas ma Silas ma ronry surat ye ma keta rfalyole isiny ber a kmi.
28 Safe ma mtetak ye mlarat Ratu Smwangtany Ni mpempeang.
Kam to mpeang ma mareke ma mlyarat yayatrwar yadin a ne,
lan yayatrwar ye:
29 Ka mlyiak a kmi myof tnyamar ma rsompe ber dewayar,
kete mine tnyamar ma lolone darnir,
ma binatngar ma rmenrak a rfen sir,
ma kete minronr.
Farlan mlyiak a kmi myof kabanir ye,
iane myose ngamone lo.
Nater lan ye.
Salam.”
30 Lama ratuli sir e,
Yudas ma Silas rti Antiokhia.
Na iano sir rtar soranyar monuk ma rabut sir,
ma ral surat a ne ber sir.
31 Lama rbaca surat a ne,
rsenang resi fali surat isiny a ne nafkoran dalmir.
32 Yudas ma Silas ye nabyar a nbal,
mpa ral snyurtar yadin ma rsurat soranyar a ne la rafkoran dalmir.
33 Ne radu a ramin iano lerar fir a ne,
betno tomwatar ma ralele Yesus na iane rsiduk a rbali sir ror maline far Yerusalem ber tomwatar ma rsiduk sir a ne.
34 Nempa Silas to nbali i ma namin Antiokhia.
35 Paulus ma Barnabas ramin Antiokhia ma raktem tomwat walyetar raftutu ma rafwibar Ratu Ni ngribatnir.
Paulus ma Barnabas rakes e sir
15:36-41
36 Ler sa e,
Paulus nfalak ber Barnabas,
“Mya ma tbali kit ma tsalan soranyar na kotar mpane ne feti sir farpe.
Sir a ne ma luryain tafwibar ninr Mangnrur Silai Ni ngribatnir ber sir.”
37 Ma Barnabas nmpeang ma nor a nbal Yohanes ma rtar feti Markus.
38 Nempa Paulus to nyoding,
fali luryain e,
i nti a ntate sir na Pamfilia ma to nkarya nor sir.*
39 Ngrie ne nwayat ma radu a rabangal desar mpa rakes e sir.
Ne Barnabas nor Markus ma rfangat kabal far yampren Siprus.
40-41 Ma Paulus nfil Silas.
Ne soranyar na Antiokhia rsampayang ber Ratu ma nfatutu Ni dalamy ngamone ber sir.
Betno radu a ral far Siria ma Kilikia ma rafkoran soranyar a na iano.