Muyaane echibharo abhatangasya bha echaaro
13
1 Bhuri muunu keendwa ayaane echibharo abhatangasya bha echaaro. Mwichuke ati, obhuturo bhwone bhwa okutunga, obhusooka ku‑Nyamuwanga, ka wone omwene niwe ꞉aateeye abhatangasya ku‑bhutungi. 2 Kurwa ejo, omuunu woonewoone unu kaayingirira obhuturo bhwebhwe, kaayingirira Nyamuwanga unu ꞉aabhateeye ku‑bhutungi obhwo. Omuunu akamuyingirira, keetuura mu‑ndamu yaaye. 3 Abhatangasya bhatakukanga omuunu unu kaakora ja ekisi, tari unu kaakora amabhiibhi. Kurwa ejo, araabha utakwenda okuubhaya omutangasya, kora ja ekisi, niwo arikukuuya. 4 Omutangasya wa echaaro ni mukosi wa Nyamuwanga, na omurimu gunu kaakora guri na omuriiro kw‑awe. Nawe, ukakora amabhiibhi, owukenwa umuubhaye! Ni chimari ati ari na obhuturo bhwa okukuyaana ebhitiibha. Mu‑kukora kutyo, aribha omukosi wa Nyamuwanga wa okukuumisya risungu rya Nyamuwanga ku‑unu kaakora amabhiibhi. 5 Kurwa ejo, omukenwa okuyaana echibharo abhatangasya bha echaaro. Mwasiga okubhayaana echibharo era ku‑songa ya okuubhaya risungu rya Nyamuwanga, tari mubhayaane echibharo kwa okubha omumenya kisi mu‑mitima jeemwe ati, Nyamuwanga keenda mukorega kutyo.6 Ka wone, nikwo okukora omutobha rigooti. Abhatangasya bha echaaro, omwanya gunu abheekomeesya okukora emirimu jeebhwe, abhakorera emirimu Nyamuwanga omwene. 7 Kurwa ejo, mukorerega abhatangasya abho emisango jinu bheeyire okukorerwa. Araabha omutongwa rigooti, mbe mutobhe rigooti eryo. Araabha omutongwa obhusuru, mbe muriye obhusuru obhwo. Araabha omwendwa okuyaana omuunu echibharo, mbe mumuyaane echibharo.
Eryenda niyo injira ya okukuumisya ebhiraagiro bhya Nyamuwanga
8 Mwasiga okutongwa echiinu choonechoone na omuunu woonewoone, tari ribhanja rinu muri naryo ni rya okwendana era. Omuunu unu keenda oweejaabho, oyo niwe aagayuka ebhiraagiro bhya Nyamuwanga. 9 Ringira, ebhiraagiro ebhyayika ati, “Waasiga okukora obhuromesi, waasiga okwita, waasiga okwibha, na waasiga okurigira echiinu cha oweejaanyu.”a Nawe, ebhiraagiro ebhyo na ebhindi bhyone ebhiwumbanywa ku‑chiraagiro chimwi chinu echaayika ati, “Wendega oweejaanyu rwa kutyo owiyenda omwene.”b 10 Omuunu unu keenda oweejaabho, atakumukorera amabhiibhi. Kurwa ejo, eryenda niyo injira ya okukuumisya ebhiraagiro bhya Nyamuwanga.
11 Mukorega ejo joone, kwa okubha mumenyere ati, omwanya gwa okurafya okusooka mu‑tiro gwakinga. Ringira, omwanya gwa obhuchungusi bhweswe guri yeeyi muno, okukira omwanya gunu ꞉chaambire okwikirisya Yeesu. 12 Woori, obhwire bhwaja okucha, mu‑mwisi yaafogera. Kurwa ejo, chisige ebhikorwa ebhibhiibhi bhinu ebhikorwa mu‑chisuute, na chigege ebhigwato bhya obhweru. 13 Chibhe na jitungwa ja ekisi rwa abhaanu bhanu bheekaaye mu‑bhweru bhwa mu‑mwisi. Chaasiga okubha abhananamba na abhakorwa. Chaasiga okukora imbaga yooneyoone ya orukubho na emisango ja jiswaro. Chaasiga okubha abha inyombo, noorwo okubha abha orwiso. 14 Tari woori, mu‑bhurame bhwemwe bhwone, mutangasibhwega na Raatabhugenyi Yeesu Kirisito. Mwasiga okwikirisya noorwo na akatyari okutangasibhwa na obhusimukwa bhwemwe bhwa echibhiibhi kwa okuruubha okurigira kwemwe okubhiibhi.