Mwasiga okuramura abheekirisya abheejaanyu
14
1 Mukume omwikirisya oweejaanyu unu achaari kurumatana mu‑riikirisya ryaye. Mwasiga okubhambasyanya nage inguru ya obhwiganirisya bhwaye bhukataasyanya na obhwemwe. 2 Omuunu unu arumateene mu‑riikirisya ryaye, kaarora ati kaatura okurya choonechoone chirya, nawe owundi unu atarumateene mu‑riikirisya ryaye, keetogera ati keekirisibhwa okurya emikubhi era. 3 Omuunu unu kaarya choonechoone chirya, aasiga okugaya owundi unu kaarya emikubhi era. Omuunu unu kaarya emikubhi era, wone aasiga okuramura owundi unu kaarya choonechoone chirya, kwa okubha Nyamuwanga aamukuma rwa kutyo ari. 4 Awe utari na obhuturo bhwonebhwone bhwa okuramura omukosi wa omuunu owundi. Omwami waaye niwe kaamenya araabha omukosi waaye akayire amwi atakayire. Mbe omukosi waaye arikora rwa kutyo jeenderwe, kwa okubha Raatabhugenyi Yeesu ari na obhuturo bhwa okumwimereegusyu abhega ˆnaakora kutyo.5 Omuunu umwi kaarora ati orusuku orurebhe ruri na obhugajuro okukira orusuku orundi, nawe omuunu owundi kaarora ati jisiku joone ejisusana. Bhuri muunu akorega gunu kaamenya chimari ati ni gwa kisi. 6 Omuunu unu kaarora ati orusuku orurebhe ruri na obhugajuro okukira jisiku ejindi, kaakora kutyo kwa okubha keenda okukondisya Raatabhugenyi Yeesu. Owundi unu kaarya choonechoone chirya, kaakora kutyo korereki akondisye Raatabhugenyi Yeesu, kwa okubha kaarya enu ˆnaasiimaga Nyamuwanga. Owundi unu kaarya emikubhi era, kaakora kutyo kwa okubha keenda okukondisya Raatabhugenyi Yeesu. Oyo wone kaasiima Nyamuwanga. 7 Enaayika kutyo, kwa okubha atari‑wo omuunu mw‑iswe unu kaarama inguru yaaye omwene, noorwo unu kaafwa inguru yaaye omwene. 8 Omwanya gunu echirama, echirama inguru ya Raatabhugenyi Yeesu. Omwanya gunu echifwa, echifwa inguru ya Raatabhugenyi Yeesu. Kurwa ejo, chibhe nichirama amwi chibhe chifuuwe, eswe chiri bhaanu bhaaye. 9 Kirisito ꞉aafuuwe na okusuuruka, korereki abhe Raatabhugenyi wa abhaanu bhoone, abhafuuwe na abhaanga.a
10 Woori, awe naawe ga unu owuramura omwikirisya oweejaanyu? Awe wone, kurwa ki owugaya oweejaanyu? Eswe bhoone chiriimereeguru imbere ya echitebhe cha indamu cha Nyamuwanga, na ariramura bhuri umwi weeswe. 11 Rwa kutyo Ebhikaame Ebhyeru ebhyayika ati,
“Raatabhugenyi aayika ati,
Chimari enirayira, bhuri muunu ariifukama imbere yaani,
na bhuri muunu arinkusya kwa orurimi rwaye.”b
12 Kurwa ejo, bhuri umwi weeswe, ariibhagira omwene imbere ya Nyamuwanga.
Unu arumateene mu‑riikirisya aasiga okuyabhya unu atarumateene
13 Kurwa ejo, chisige okuramurana, tari chiramure okusiga okukora choonechoone chinu echiyabhya amwi okugwisya omwikirisya oweejaasu. 14 Okuruubhana na ameeyigisyo ga Raatabhugenyi Yeesu, enimenya chimari ati, bhitari‑wo ebhiryo bhyonebhyone ebhijabhi.c Nawe araabha omuunu kaarora ati ebhiryo ebhirebhe ni bhijabhi, awo niwo ebhiryo ebhyo bhyabha ebhijabhi ku‑mwene. 15 Kurwa ejo, araabha owureterera omwikirisya oweejaanyu asurumbare muno mu‑mwoyo gwaye ku‑bhiryo ebhirebhe bhinu owurya, awo usigire itungwa ya eryenda ku‑weejaanyu. Mbe, waasiga okwikirisya, ku‑njira ya ebhiryo bhyawo, usimagisye omuunu unu Kirisito ꞉aafwiriiye! 16 Choonechoone chinu awe owurora ati ni cha kisi, nawe abheejaanyu abhaayika ati ni chibhiibhi, waasiga okuchikora. 17 Okubha emisango ja bhusibhusi mu‑bhukama bhwa Nyamuwangad kutari kurya amwi okunywa, nawe ni kukora eja obhurengeresi imbere ya Nyamuwanga, okubha na omurembe na rikonderwa. Ejo joone ejiturikana ku‑bhusakisi bhwa Mwoyo Mweru. 18 Omuunu woonewoone unu kaakorera emirimu Kirisito ku‑njira eyo, kaakondisya Nyamuwanga, ka wone keekirisibhwa na abhaanu.
19 Kurwa ejo, chiikomeesye omwanya gwone okukora emisango jinu ejireeta omurembe na jinu ejirumatanya abheejaasu mu‑riikirisya ryeswe. 20 Waasiga okunyamura emirimu ja Nyamuwanga kwa okurya ebhiryo bhyonebhyone bhinu oweenda. Chimari, ebhiryo bhyone ebhiikirisibhwa okuriibhwa, nawe ni chikayo ku‑muunu okurya ebhiryo bhinu ebhitura okukongya oweejaabho akore gunu kaarora ati ni chibhiibhi mu‑meeso ga Nyamuwanga. 21 Ni akiri usige okurya inyama, amwi okunywa echifuufu,e amwi okukora choonechoone chinu echitura okuyabhya oweejaanyu kutyo. 22 Woori awe, chinu owikirisya inguru ya emisango ejo, chibhe chaawo na Nyamuwanga waawo era. Ari na ribhando omuunu unu atakwiramura omwanya gunu kaakora echiinu chinu kaarora ati ni cha kisi. 23 Nawe, omuunu woonewoone unu ari na echiitimaato inguru ya ebhiryo bhinu kaarya, oyo ariramurwa na Nyamuwanga, kwa okubha keekirisya ati chinu kaakora ni chibhiibhi imbere ya Nyamuwanga. Araabha omuunu kaakora echiinu choonechoone chinu atakwikirisya ati ni cha kisi, awo niwo akorere echibhiibhi.