Mwisoosye obhurame bhwemwe mukorere Nyamuwanga emirimu
12
1 Woori abhayiri bhaani, mumenyere kutyo Nyamuwanga kaachifwira echigongo. Kurwa ejo mbe, enibheerembeeresya ati, mwisoosye obhurame bhwemwe ku‑Nyamuwanga. Mubhe rwa ebhyogo bhinu bhiri ebhiwanga na ebhyeru, bhinu ebhimukondisya. Eyo niyo injira ya echimari ya okumuramya. 2 Mwasiga okuruubha jitungwa ja abhaanu bha echaaro chinu, nawe musige Nyamuwanga ayindure emitima jeemwe, korereki mubhe na obhwiganirisya obhuyaaya. Awo niwo muriiyigira okumenya jinu Nyamuwanga keenda kwa okujikora. Murimenya ati ni misango ki jinu jiri ja ekisi, jinu ejimukondisya, ka wone jinu jikuumiiye.3 Woori, Kirisito anaaye obhwitiriranya nibhe itumwa yaaye. Kurwa ejo, enibhwira bhuri umwi weemwe ati, asige okwirora ati eeyire okukira kutyo ari, tari abhe na obhwengeeso. Mubhe nimwirora ati, bhuri muunu ayaaywe eriikirisya riryarirya na Nyamuwanga.a 4 Rwa kutyo mumenyere, omubhiri ni gumwi, nawe guri na ebhiwuga bhyafu, na bhuri chungo chiri na omurimu gwacho. 5 Nikwo kutyo eswe wone chiri. Eswe chiri bhaafu, nawe chaabha omubhiri gumwi mu‑kubha na obhumwi na Kirisito. Ku‑mubhiri gwaye, bhuri muunu ni chiwuga ku‑weejaabho.
6 Mbe, chiri na ebhiyaanwa bhya mbaga nyafu, rwa kutyo Nyamuwanga ꞉aachiyaaye kwa obhwitiriranya bhwaye. Omuunu unu ayaaywe echiyaanwa cha okusoosya obhuragi, akorere emirimu echiyaanwa echo okuruubhana na eriikirisya ryaye. 7 Omuunu unu ayaaywe echiyaanwa cha okukorera emirimu abheejaabho, abhakorere emirimu kisi. Omuunu unu ayaaywe echiyaanwa cha okwiyigisya, eeyigisye kisi. 8 Omuunu unu ayaaywe echiyaanwa cha okusimbiisya abheejaabho, akore kutyo kisikisi. Omuunu unu ayaaywe echiyaanwa cha obhufura ku‑bhaanu, abhakume kwa omwoyo gwone. Omuunu unu ayaaywe echiyaanwa cha obhutangasya, atangasye mu‑bhwikomeesya bhwone. Omuunu unu ayaaywe echiyaanwa cha echigongo, afwire echigongo abhaanu kwa rikonderwa.
Mwendane
9 Mwende abheejaanyu kwa omutima omweru. Musige chimwi okukora obhujabhi, tari mukorega ja ekisi omwanya gwone. 10 Mwendane abheene kwa abheene rwa abhayiri. Bhuri muunu eekomeesye okuyaana echibharo oweejaabho. 11 Mwasiga okurengaara mu‑kukora emirimu ja Nyamuwanga, tari Mwoyo Mweru abhasakire okugenderera okujikora kwa omwoyo gwone.b Mukorere emirimu Raatabhugenyi Yeesu. 12 Mukondererwega nimurindirira okubhona jinu Nyamuwanga ꞉aabharagire. Mwigumiirisyega mu‑myanya ja jinyaako, na mugendererega okusabhwa Nyamuwanga. 13 Musakire abheekirisya abheejaanyu mu‑bhukene bhwebhwe, ka wone mubhe bhaangu okukuma kisi abhagenyi mu‑misi jeemwe.
14 Musabhirwe abhaanu bhanu abhabhanyaasya, korereki Nyamuwanga abhayaane amabhando. Mubhasabhirwe ja ekisi era, mwasiga okubheeyiima. 15 Mukonderwega aamwi na bhanu abhakonderwa, na murirega aamwi na bhanu abharira. 16 Mwikare kwa obhwira bhumwi emwe abheene kwa abheene. Kutyo, musigega okwikuuya, tari mwikeeyega, mubhega na obhusangi na abhaanu abha obhukene. Musigega okwirora ati neemwe abha obhwenge era.
17 Omwanya gunu abhaanu abhabhakorera emibhiibhi, mwasiga okubhasubhisya obhubhiibhi ku‑bhubhiibhi. Tari, mwanya gwone, muchaari okukora gwonegwone, mwiganirisye okwamba, niwo mukore jinu abhaanu bhoone abhaja okurora ati ni ja kisi. 18 Mbe, rwa kutyo ejiturikana, emwe ku‑rubhaara rwemwe, mubhe na omurembe na abhaanu bhoone. 19 Abheendwa bhaani, mwasiga okusubhya orusiima, tari musige Nyamuwanga aramure kutyo arisoosya indamu. Enaayika kutyo, kwa okubha mu‑Bhikaame Ebhyeru Raatabhugenyi kaayika ati, “Okusubhya orusiima ni murimu gwani, anye naanye nirisubhya orusiima.”c 20 Ka wone, Ebhikaame Ebhyeru ebhyayika inguru ya okusiga okusubhya orusiima ati,
“Araabha omusoko waawo ari na omweko, muyaane ebhiryo.
Araabha ari na obhwiro, muyaane amanji ga okunywa.
Ukakora kutyo, owubha wuti umuteereeye amakara ga omuriro ku‑mutwe gwaye.”d
21 Waasiga okukubhwa na emijabhi jinu owukorerwa na abhaanu, tari ujiyige ejo, kwa okubhakorera ja ekisi.