Nyamuwanga ataremere Abhayisirayeeri okubha abhaanu bhaaye
11
1 Woori enibhuusya ati, angu, Nyamuwanga aremere abhaanu bhaaye? Wuri, noorwo na akatyari! Anye omwene niri Muyisirayeeri, okusooka mu‑rwibhuro rwa Bhurayimu, na okusooka mu‑ruganda rwa Bhenjamiini. 2 Nyamuwanga ataremere abhaanu bhaaye bhanu ꞉aabhamenyere noorwo echaaro chichaari okubhumbwa. Amwi mutakumenya chinu Ebhikaame Ebhyeru ebhyayika inguru ya omuragi Yeeriya? Omwanya gunu ꞉aajujuumiiye Nyamuwanga inguru ya Abhayisirayeeri, ꞉aayikire ati, 3 “Raatabhugenyi, abhaanu bhanu bheeta abharagi bhaawo, na bhaanyamura ebhigabhiro bhya okukusoosisya‑ko echoogo. Anye naasigara omwene era, wone abheenda okunyita!”a 4 Nawe Nyamuwanga ꞉aamusubhiisye kutiki? ꞉Aayikire ati, “Niisaagisiisye abhaanu bhiwumbi bhitaanu na bhibhiri bhanu bhatakuramya Bhaari.”b5 Noorwo woori nikwo kutyo jiri, bhaasaaga abhaanu bhatooto era bhanu Nyamuwanga ꞉aasorere ku‑bhwitiriranya bhwaye. 6 Bhaasorwa kwa obhwitiriranya bhwa Nyamuwanga, kurwa ejo bhatakuchungurwa ku‑songa ya ebhikorwa bhyebhwe. Araabha bhakachunguuywe ku‑songa ya ebhikorwa bhyebhwe, mbe obhwitiriranya obhwo bhutaakabheeye obhwitiriranya rindi. 7 Kurwa ejo, emisango jiri kutya. Abhayisirayeeri ꞉bhaayenjere injira ya okubha abharengeresi imbere ya Nyamuwanga, nawe ꞉bhataayibhwene. Ni bhanu era ꞉bhaasorerwe na Nyamuwanga, nibho ꞉bhaabhubhwene. Abhandi bhoone bhanu ꞉bhaasigaaye, Nyamuwanga ˆnaabhakora bhabhe na emyoyo emikomeeye. 8 Rwa kutyo Ebhikaame Ebhyeru ebhyayika ati,
“Nyamuwanga ꞉aabhakorere bhabhe na emyoyo emikomeeye,
꞉aabhawongeresiisye ameeso korereki bhaasiga okurora,
ka wone ꞉aabhasibhire amatwi korereki bhaasiga okuungwa.
Nikwo kutyo bhari okukingira reero inu.”c
9 Ka wone, omukama Dawudi ꞉aayikire ati,
“Omwanya gunu abhakora jichikukuru jeebhwe,
Nyamuwanga ajiyindure jibhe mutego gwa okubhagumya,
na omutego gwa okubhagwisya,
na jibhe ebhitiibha ku‑bheene.
10 Ameeso geebhwe gabhe chisuute,
korereki bhasige okurora echiinu choonechoone rindi,
na emigongo jeebhwe jigenderere okwikota,
okuruubhana na jinyaako jeebhwe.”d
Okurema kwa Abhayisirayeeri kwabha amabhando ku‑bhanu bhatari Bhayisirayeeri
11 Woori enibhuusya ati, angu, Abhayisirayeeri ꞉bheekuujuuwe korereki bhagwe na okusingaarika chimwi? Wuri, noorwo na akatyari! Tari, ni kusookana na echikayo cheebhwe, obhuchungusi bhwaja noorwo ku‑bhaanu bhanu bhatari Bhayisirayeeri. Ku‑njira eyo, Nyamuwanga ꞉eendere Abhayisirayeeri bhoongwe obhwiro bhwa okubhona obhuchungusi rwa kutyo abheene ꞉bhaabhubhwene. 12 Woori, araabha abhaanu bhanu bhatari Bhayisirayeeri ku‑chaaro choone, ꞉bhaabhwene obhwitiriranya bhwafu kwa okubha Abhayisirayeeri ꞉bhaaremere Kirisito, mbe bharibhona noorwo obhwitiriranya bhwafu muno omwanya gunu Abhayisirayeeri bharibhaga bhachungukire.
13 Woori, enaayika na emwe bhanu mutari Bhayisirayeeri. Chimari Nyamuwanga ꞉aantumire nibhe itumwa inguru ya abhaanu bhanu bhatari Bhayisirayeeri. Enikusya emirimu jinu niyaaywe, 14 niniiyikanya ati, amwi okutura emirimu jaani ejo, Abhayisirayeeri bheejaasu bharyungwa obhwiro bhwa okubhona obhuchungusi rwa kutyo emwe ꞉mwabhubhwene, korereki abhaanu abharebhe mu‑bheene wone bhachunguke. 15 Ringira, Nyamuwanga ꞉aaremere Abhayisirayeeri, ˆnaagwatana na abhaanu bhanu bhatari Bhayisirayeeri. Kurwa ejo, omwanya gunu Nyamuwanga ariikirisya Abhayisirayeeri rindi, jiribha wuti abhafuuwe bhaasuuruka!
16 Araabha omuunu kaasoosisya Nyamuwanga amatongoro ga amatwasyo gaaye, mbe amatwasyo gaaye goone garibhaga gari inguru ya Nyamuwanga. Ka wone, araabha emisi ja omujeyituuni ni myeru, mbe noorwo amatabhi gaaryo goone garibhaga gari meeru.e 17 Woori, amatabhi amarebhe ga omujeyituuni ꞉gaatemerwe, na amatabhi agandi ga omujeyituuni gwa ibhara nigongwa‑ko, nigabha agati ya amatabhi ga obhusimukwa ga omujeyituuni gunu. Amatabhi goone agabhona ebhiryo okusooka ku‑misi jiryajirya ja omujeyituuni. Woori emwe, neemwe amatabhi ga omujeyituuni gwa ibhara. 18 Kurwa ejo, mwasiga okugaya amatabhi ganu ꞉gaatemerwe. Mwasiga okwikuuya, na mwichuke ati, emisi jitakwiyikanya emwe, tari emwe neemwe omujiiyikanya.
19 Omwanya ogundi omutura okwayika ati, “Amatabhi ago ꞉gaatemerwe, korereki anye niyambirirwe kw‑isina eryo.” 20 Omusango ogwo ni gwa echimari. Amatabhi ago ꞉gaatemerwe kwa okubha ꞉gateekirisiisye, tari awe urumateene kwa okubha owikirisya. Kurwa ejo, waasiga okwikuuya, tari uubhaye Nyamuwanga. 21 Nyamuwanga ꞉ataafwiriiye echigongo Abhayisirayeeri bhanu bhari matabhi ga obhusimukwa bhwa omujeyituuni, ˆnaabharema. Kurwa ejo noorwo awe wone, kaatura okukurema.
22 Murore kutyo Nyamuwanga kaakorera ja ekisi abhaanu abhandi, na kutyo kaayaana ebhitiibha ebhiruru abhaanu abhandi. Kaayaana ebhitiibha bhanu ꞉bhaaremere okwikirisya, na kaakukorera ja ekisi, araabha owugenderera okwikirisya. Nawe ukarema okumwikirisya, awe wone uritemwa. 23 Araabha Abhayisirayeeri abho bhariyinduka na okwikirisya Kirisito, bhariyambirirwa rindi ku‑mujeyituuni gwebhwe, kwa okubha Nyamuwanga ari na obhuturo bhwa okubhayambirira rindi. 24 Awe unu utari Muyisirayeeri, awe uri rwa ritabhi rya omujeyituuni gwa ibhara. ꞉Waatemerwe na okuyambirirwa ku‑mujeyituuni gunu ꞉gwayambirwe na abhaanu, noorwo kutyo ogwo ni musango omugenyi okukorekana. Woori umenye ati, gutari murimu mukomeeye ku‑Nyamuwanga okusubhira okuyambirira Abhayisirayeeri bhanu bhari matabhi ga obhusimukwa ku‑mujeyituuni gwebhwe gwa echimari.
Nyamuwanga kaafwira echigongo abhaanu bhoone
25 Abhayiri bhaani, eneenda mumenye inguru ya obhutinge bhwa imbisike ya Nyamuwanga bhunu ꞉bhwabhisirwe kara, korereki mwasiga okwirora ati muri bheengeeso muno. Mumenye ati ni Bhayisirayeeri bharebhe abha emyoyo emikomeeye, bhanu bharigenderera okukingira omwanya gunu Nyamuwanga ariikirisya ati obhukumi bhwa abhaanu bhanu bhatari Bhayisirayeeri okuramira obhuchungusi bhwakuumira. 26 Ku‑njira eyo, Abhayisirayeeri bhoone bharichungurwa. Rwa kutyo Nyamuwanga ꞉aayikire mu‑Bhikaame Ebhyeru ati,
“Omuchungusi ariija okusooka Sayuuni,
arikora orwibhuro rwa Yakobho bhasige okurema Nyamuwanga.
27 Awo niwo indagano yaani nabho irikuumira,
omwanya gunu niribhafwira echigongo ebhibhiibhi bhyebhwe.”f
28 Omwanya gunu Abhayisirayeeri bhaariga nibharema Emisango ja Ekisi inguru ya Yeesu Kirisito, ꞉bheekorere okubha abhasoko bha Nyamuwanga. Nawe omusango ogwo gubheeye gwa omuriiro kw‑imwe, emwe abhaanu bhanu mutari Bhayisirayeeri. Noorwo kutyo, Nyamuwanga acheendere Abhayisirayeeri, kwa okubha aariga asorere bhasaaja weebhwe na okukora indagano nabho. 29 Nyamuwanga aakasora abhaanu bhaaye na okubhayaana amabhando, atakutura kuyiinduka.g
30 Omwanya gunu guturire, emwe mwariga mutakugayuka Nyamuwanga, tari woori mwafwiriiywe echigongo na Nyamuwanga, kwa okubha Abhayisirayeeri ꞉bhataamugayukire. 31 Ringira, jiribha kutyokutyo ku‑bheene wone. Woori bhatakugayuka Nyamuwanga, nawe bhariramira echigongo cha Nyamuwanga rindi, kwa okubha bharirora kutyo emwe muramiiye echigongo chaaye. 32 Nyamuwanga niwe ꞉aasindikire abhaanu bhoone bhagenderere okubha abhabhoywa bha obhujabhi bhwebhwe, korereki afwire echigongo bhoone.
Nyamuwanga akusibhwe
33 Yee! Niga unu kaatura okusombookerwa kutyo bhuri bhuniibhi,
obhwengeeso na okumenya kwa Nyamuwanga?
Ebhikira obhusombookerwa bhweswe!
Atari‑wo omuunu unu kaatura okusombookerwa kutyo kaaramura,
amwi unu kaatura okweresya jinjira jaaye.
34 “Niga unu kaatura okumenya obhwiganirisya bhwa Raatabhugenyi?
Niga unu kaatura okumutongera?”h
35 “Niga unu ayaanire Nyamuwanga echiinu choonechoone
chinu keenda Nyamuwanga amusubhisye?”i
36 Nyamuwanga niwe ꞉aabhumbire ebhiinu bhyone.
Okutura ku‑mwene ebhiinu bhyone ebhigenderera okubha‑wo,
na ebhiinu bhyone bhiri‑wo inguru ya rikusyo ryaye.
Nyamuwanga akusibhwe akajaanende koone! Jibhe kutyo.