Peetero keebhagira mw‑ikanisa rya Yerusareemu
11
1 Jitumwa ja Yeesu na abheekirisya abhandi Yuudeya erya, nibhoongwa ati, abhaanu bhanu bhatari Bhayawudi wone bheekirisya omusango gwa Nyamuwanga. 2 Kurwa ejo, Peetero ejire aasubha Yerusareemu, Abhayawudi bhanu ꞉bheekirisiisye Kirisito nibhaamba okubhambasyanya nage 3 nibhaayikaga ati, “Awe ꞉weengiiye mu‑nju ya bhanyatatendwaa na okurya ebhiryo aamwi nabho!”4 Peetero ˆnaamba okubheeresya omusango ogundi ku‑gundi kutyo joone ꞉jaakorekeene, ˆnaayika ati, 5 “Rusuku rumwi naariga niri mu‑musi gwa Yoopa. Omwanya gunu naariga ninsabhwa Nyamuwanga, nindora ebhiroro. Mu‑bhiroro ebhyo, ꞉naarorere echiinu rwa isuuka nene inu yaariga igwatirwe jisonde jaayo ena. Echiinu echo chaariga nichiisibhwa ku‑chaaro kunu okusooka ku‑rwire, nichiikira ayeeyi na anye. 6 Nejire naachiringira kisi, nindora jityanyi ja bhuri mbaga. ꞉Naarorere jityanyi ja amaguru gana, jityanyi ja ibhara, jinu ejiikurura na jinyonyi ja mu‑rutumba. 7 Niwo ninuungwa obhuraka, nibhumbwira ati, ‘Peetero, iimuka, wiite na urye!’ 8 Ninaayika ati, ‘Wuri, Raatabhugenyi! Nichaariga okurya sirisiri, echiryo choonechoone echijabhi!’ 9 Nawe ꞉noonguuwe rindi obhuraka obhwo okusooka mu‑rwire nibhumbwira ati, ‘Nuusige okubhirikira ebhiinu bhinu Nyamuwanga eesiisye, ati ni bhijabhi.’ 10 Omusango ogwo nigukorekana kasatu, ku‑bhuteero ebhiinu ebhyo bhyone nibhisubhibhwa mu‑rwire.
11 “Omwanya guryagurya, abhaanu abhasatu bhanu ꞉bhaatumirwe kw‑anye okusooka Kayisaariya, nibhakinga imbere ya inju inu naariga nikaaye‑mo. 12 Mwoyo Mweru ˆnaambwira ati nigende aamwi nabho, nisige okwitimaata. Kurwa ejo ningenda nabho aamwi na abheekirisya abheejaasu bhanu, bhataanu na umwi. Nichiingira iika ewa Koroneeriyo. 13 Omwene ˆnaachitondera kutyo maraayika ꞉aamusoromokeeye iika ewaaye, ˆnaamubhwira ati, ‘Nuubhwire abhaanu bhagende Yoopa, bhabhirikire Simooni unu kaatogwa Peetero. 14 Oyo niwe kaja okukubhwira emisango na okutura ku‑misango ejo, awe na abhaanu bhoone bha iika ewaawo murichungurwa.’
15 “Nejire naamba okubhwira abhaanu abho, niwo Mwoyo Mweru ˆnaabheekira, rwa kutyo ꞉aachiikiiye ku‑bhwambiro. 16 Niwo niniichuka omusango gurya Raatabhugenyi Yeesu ꞉aachibhwiriiye ati, ‘Yowana ꞉aabhatiijiisye abhaanu mu‑manji, nawe emwe muribhatiijibhwa kwa Mwoyo Mweru.’ 17 Mbe, araabha Nyamuwanga abhayaana echiyaanwa chiryachirya chinu ꞉aachiyaaye omwanya gunu ꞉cheekirisiisye Raatabhugenyi Yeesu Kirisito, ka woori naanye ga nimugaanye?”
18 Omwanya gunu Abhayawudi abho ꞉bhoonguuwe ejo, nibhasiga okubhambasyanya nage. Nibhakusya Nyamuwanga nibhaayika ati, “Mbe, Nyamuwanga aayaana abhaanu bhanu bhatari Bhayawudi wone obhuwanga bhwa akajaanende mu‑kuta ebhibhiibhi bhyebhwe!”
Abheekirisya bha Atiyookiya mu‑mukoowa gwa Siiriya
19 Okuruubhana na okwitwa kwa Tefwano na ebhinyaasyo bhinu ꞉bhyasookereeye Yerusareemu, abheekirisya ꞉bhaanyarageene, nibhabhirimira mu‑mukoowa gwa Foyeenike, kw‑isinga rya Kiipuro na mu‑musi gwa Atiyookiya. Eyo niyo bheeyigisyaga omusango gwa Nyamuwanga ku‑Bhayawudi era. 20 Nawe Atiyookiya awo, abheekirisya abharebhe bha kw‑isinga rya Kiipuro na abha mu‑musi gwa Kureene, nibhaamba okwiyigisya Emisango ja Ekisi ja Raatabhugenyi Yeesu, noorwo ku‑bhaanu bhanu bhatari Bhayawudi. 21 Obhuturo bhwa Raatabhugenyi bhwariga bhuri aamwi nabho, abhaanu bhaafu nibheekirisya nibhayindukira Raatabhugenyi Yeesu.
22 Mbe abheekirisya bha Yerusareemu, nibhoongwa emisango ja abheekirisya bha Atiyookiya, kutyo nibhabhwira Bharinaabha agende eyo. 23 Bharinaabha ejire aakinga eyo, ˆnaarora kutyo Nyamuwanga ꞉aayaaye abhaanu abho obhwitiriranya bhwaye. ˆNaakondererwa muno, ˆnaabhakomeeresya ati bhagenderere okugayuka Raatabhugenyi Yeesu mu‑myoyo jeebhwe. 24 Bharinaabha aariga ari muunu wa ekisi, eejuuywe Mwoyo Mweru na eriikirisya enene. Abhaanu bhaafu ꞉bheekirisiisye Raatabhugenyi Yeesu, kurwa ejo obhukumi bhwa abheekirisya bhwariga nibhwiyongesya muno.
25 Omwanya okutura, Bharinaabha ˆnaagenda mu‑musi gwa Taariso okuronda Saawuri eyo. 26 Ejire aamubhona, ˆnaamureeta Atiyookiya awo. Bharinaabha na Saawuri nibheekara na abheekirisya bharya omuguuga gwone, nibheeyigisyaga abhaanu bhaafu muno. Atiyookiya awo, niwo abheeyigisibhwa bha Yeesu ꞉bhaambire okutogwa ati, Abhakirisito.
27 Mu‑siku ejo abharagi okusooka Yerusareemu ꞉bheejire Atiyookiya. 28 Owumwi weebhwe, risiina ryaye aatogwaga Agabho, ˆneemereeguru mw‑isangi, ˆnaasoosya obhuragi kwa obhuturo bhwa Mwoyo Mweru ati, omweko omururu oguuja okuswirana ku‑chaaro choone. Chimari rwa kutyo ꞉aayikire, omweko ogwo ꞉gwabheeye‑wo ku‑mwanya gwa obhutungi bhwa Kirawudiyo unu aariga ari Kayisaari.b 29 Okuruubhana na obhuragi obhwo, abheeyigisibhwa nibharamura ati, bhuri umwi weebhwe, ku‑bhuturo bhwaye, asoosye obhusakisi ku‑bheekirisya abheejaabho bhanu bhaariga bheekaaye Yuudeya. 30 Nibhakora kutyo, nibhayaana Bharinaabha na Saawuri ebhiyaanwa bhyebhwe, korereki bhabhisire ku‑bhakaruka bha rikanisa rya Yerusareemu.