Peetero keegurirwa okusooka mw‑ibhoyero
12
1 Mu‑siku ejo, omukama Yeroode,a ˆnaamba okugwata abheekirisya abharebhe bha Yerusareemu na okubhanyaasya. 2 ˆNaaramura ati, Yakobhob owaabho Yowana eetwe kwa imbanda. 3 Ejire aarora ati echikorwa echo chaakondera Abhayawudi, ˆnaaragirira Peetero wone agwatwe. Jinu joone ꞉jaakorekeene ku‑mwanya gwa ichikukuru ya emikaate jinu jitakutuurwa‑mo echifwimbya.c 4 Bhejire bhaamara okugwata Peetero, Yeroode ˆnaaragirira ati Peetero atuurwe mw‑ibhoyero. ˆNaamutuura mu‑mabhoko ga abhasirikare ebhise bhina, bhuri chise bhasirikare abhanabhana, korereki bhamwangarire kisi. ꞉Aakarariiye okumuramura imbere ya abhaanu ichikukuru ya Okwambukad yaaturire. 5 Kurwa ejo Peetero ꞉aabhoyerwe mw‑ibhoyero, nawe abheekirisya bhaariga nibheekomeesya muno okumusabhirwa ku‑Nyamuwanga.6 Ingeta ya orusuku runu Yeroode aariga aramuuye okuramura Peetero, nirukinga. Peetero aariga awongeeye agatigati ya abhasirikare bhabhiri. Ka wone aariga abhoyerwe na amaseega gabhiri na anja ya omuryango, abhasirikare abhandi bhaariga nibharinda. 7 Awoawo ˆnaasoromoka maraayika wa Raatabhugenyi ˆneemereeguru orubhaara runu Peetero aariga ari, obhweru nibhumumirika mu‑chisago omwo. Maraayika oyo, ˆnaakunuuna Peetero mu‑rubhafu na okumurafya, ˆnaamubhwiraga ati, “Iimuka bhwangu!” Awoawo amaseega ku‑mabhoko gaaye nigaragara aasi. 8 Niwo maraayika ˆnaamubhwira ati, “Nuufware emyenda jaawo na ebhiraato bhyawo.” Peetero ˆnaakora kutyo. Maraayika ˆnaamubhwira ati, “Nuufware na omwambaro gwawo, unduubhe!” 9 Peetero ˆnaaruubha maraayika urya, nibhawuruka mw‑ibhoyero omwo, nawe Peetero ꞉ataamenyere ati ebhikorwa bhya maraayika ebhyo bhyone, bhyariga bhiri bhya echimari, aariga ˆneetogera ati kaaroota era. 10 Peetero na maraayika oyo nibhatura ku‑bhariisi bha okwamba na bha kabhiri, nibhakinga ku‑muryango gwa echuuma gwa okwingirira mu‑musi. Orwigi orwo nirwiguka orwenene era, nibhawuruka anja ya ribhoyero na okwingira mu‑musi. Nibhatura kw‑iparapara rimwi, niwo maraayika oyo, ˆnaasigana na Peetero.
11 Niwo Peetero ˆnaasombookerwa jinu jaamubhona, ˆnaayika ati, “Woori naamenya chimari ati, Raatabhugenyi aatuma maraayika waaye, ˆnaamonʼya okusooka mu‑mabhoko ga Yeroode na okusooka mu‑mabhiibhi goone, ganu Abhayawudi bhakarariiye okunkorera!”
12 Peetero ejire aamenya ejo, ˆnaagenda aroobhere mu‑nju ya Maryamu nyiramwene Yowana, unu aatogwaga Maariko. Mu‑nju eyo nimwo abheekirisya abhaafu bhaariga bheekofyanyiisye nibhasabhirwaga Peetero ku‑Nyamuwanga. 13 Peetero ˆnaakonoona kw‑irango rya inju eyo. Omukosi umwi wa echigasi, risiina ryaye ni Rooda, ˆnaaja okwigura omuryango. 14 Ejire aasombookerwa ati ni bhuraka bhwa Peetero, ˆnaakonderwa muno, ˆnaarabhirwa okumwigurira, ˆnaabhirima mu‑nju. ˆNaabhwira bhoone ati, “Peetero eemereeguuyu ku‑muryango!”
15 Abheene nibhamubhwira ati, “Awe! Urwaye orusaro?” Nawe omuyarakaji oyo ˆnaakomeeresya okwayika ati, bhunu ˆnoongwa ni bhuraka bhwa Peetero, niwo nibhamubhwira ati, “Ni bhusibhusi oyo ni maraayika waaye.” 16 Omwanya ogwo Peetero aariga ˆnaagenderera okukonoona kw‑irango. Bhejire bheegura omuryango, nibhamurora, nibharuguura muno. 17 Peetero ˆnaabhawungisya okubhoko bhajibhire, ˆnaabhatondera kutyo Raatabhugenyi Yeesu aamusoosya mw‑ibhoyero. Niwo ˆnaabhabhwira ati, “Emisango ejo, mubhwire Yakobho na abheekirisya abhandi.” Neeya Peetero ˆnaasooka awo, ˆnaagenda orubhaara orundi.
18 Bhwejire bhwacha, abhasirikare bha mw‑ibhoyero nibhayaya muno inguru ya jinu jaabhona Peetero. 19 Yeroode ˆnaaragirira abhasirikare bhaaye, bharonde Peetero, nawe ꞉ataabhonekeene. Kurwa ejo, ˆnaaragirira abhariisi bha Peetero bhabhuusirisibhwe. Neeya ˆnaasoosya echiragiriro ati bheetwe.
Omwanya okutura Yeroode ꞉aasookere Yuudeya awo, ˆnaagenda mu‑musi gwa Kayisaariya, ˆneekara‑yo siku nooto.
Okufwa kwa omukama Yeroode
20 Omukama Yeroode aariga abhiyiririwe muno abhaanu bha mu‑misi ja Tiiro na Sidooni. Abhaanu abho ꞉bheekirisyanyiisye aamwi, nibhatuma abhaanu ku‑Yeroode okusabhwa ati bhoongwane, bhabhe na omurembe, kwa okubha emisi jeebhwe jaabhonaga ebhiryo okusooka mu‑chaaro cha Yeroode. Abhaanu abho nibharembeja Bhurasito, unu aariga ari omwangarisi wa inju ya Yeroode, eekirisyanye nabho imbere ya Yeroode.
21 Orusuku runu rwariga rwawuuywe, omukama Yeroode ˆnaafwara emyenda jaaye ja echikama, ˆneenyanja ku‑chitebhe chaaye cha indamu, ˆnaaroma imbere ya abhaanu abho. 22 Niwo abhaanu abho nibhakondererwa na okumwaya nibhaayikaga ati, “Bhunu bhutari obhuraka bhwa omuunu! Bhunu ni bhuraka bhwa risambwa!” 23 Yeroode ꞉ataayaaye Nyamuwanga echibharo, kurwa ejo awoawo maraayika wa Raatabhugenyi ˆnaamubhuma kwa obhurwaye bhwa okutimbwa na jimuka, ˆnaafwa.
24 Nawe omusango gwa Nyamuwanga nigugenderera okuswirana mu‑bhaanu, abheekirisya nibheeyongesya muno.
25 Bharinaabha na Saawuri, bhejire bhaamara emirimu jeebhwe ja okusira obhusakisi Yerusareemu, nibhagega Yowana unu aatogwaga Maariko, nibheemuka nage Yerusareemu okusubha mu‑musi gwa Atiyookiya.