ꉳꀠꇵꄯꒉ 2

ꑳꀊꊆꉳꀠꇵꏭꅇꀱ

1 ꉢꐏꁇꅉꇬꌋꆀꇓꈓꑷꂿꆸꄜꇬꉆꄉ，

ꑳꀊꊆꉠꏯꅇꂷꑞꉉꇁꉏꂿ，

ꋌꈍꃅꄉꉠꑗꇖꈨꂟꅇꀱꉏꂿ。

2 ꑳꀊꊆꉠꏯꑠꃅꅇꀱ：

“ꉠꅇꂷꋋꈨꐝꉅꃅꁱꌩꀻꇬꄀꄉ，

ꊿꇫꀘꈧꌠꁳꈝꐮꃅꌧꎻ。

3 ꑞꃅꆏ，ꅇꂷꋋꈨꅇꅐꇀꄮꂷꐥ，

ꌐꂫꃆꂮꅇꂷꈧꌠꆹꈍꃅꑌꀈꈥꀋꈥꌠꉬ。

ꑟꇁꑎꌠꌡꑴꇬ，ꆏꇁꉚꄉꇬꎷ，

ꑞꃅꆏ，ꀋꎪꃅꇫꅐꇁ，

ꈍꃅꑌꄉꀋꈻꌠꉬ。

ꊿꀋꑗꀋꉬꌠꑗꉘꊝꇁ

4 ꇬꉚ！ ꊿꄸꈧꌠꆺꒉꄇꒉ，

ꉌꂵꉪꐨꀋꎃꀋꊒ；

ꄚꑖꊿꆹꀋꎪꀋꎙꐛꅹꃅꇫꐥꄎ。

5 ꋋꆹꎧꏸꐛꅹꃅꐈꋓ、ꆺꒉꄇꒉ、ꑳꀀꇤꑌꀋꇁ，

ꋍꉓꈠꌠꈁꐞꆹꌦꊿꐤꅉꌟꃅꏅꄉ，

ꌦꃤꈔꃤꌟꃅꇎꇁꅉꇬꀋꐛ，

ꇩꏤꈀꐥꃅꋌꏣꏑꐯꇯ，

ꊿꄙꊿꉐꃅꋌꁮꌊꋍꇂꃴꐥꁧꌐ。

6 ꊿꋀꁮꌊꁧꈧꌠꆹꉙꇐꌋꆀꇐꀳꌊꑠꃅꋀꁒꋀꐀꇁ：

“ꊿꌞꎆꋚꋀꇑꌊꁧꈧꌠ，

ꌞꊿꄀꇗꁁꁒꄉꌣꈚꈧꌠꆹ，ꉮꃤꐥꀐ！

ꋀꊇꑠꃅꅷꈍꄮꑟꁧꂯ？”ꄷ。

7 ꅽꄹꎝꄍꈧꌠꋋꇅꃅꄓꇁ，

ꆏꋌꇷꏾꌌꀕꈧꌠꋋꇅꃅꀀꐚꇁꄉ，

ꆏꋀꁮꌊꁧꌠꀋꉬꅀ？

8 ꆏꂴꏭꌞꇩꏤꀉꑌꃅꇑꑣ，

ꊿꌉꊾꆳ，ꌞꃄꅉꐅꀘ，

ꊾꇨꁴꅿꃅꄉꁡꇤꇬꌋꆀꇓꈓꇬꉹꁌꈀꐥꌠꊝ，

ꑠꅹ，ꌞꇩꏤꉹꁌꇫꋒꇈꈧꌠꑌꀋꎪꃅꆏꇑꆎꑣꇁꌠꉬ。

9 ꊿꊨꏦꑷꈓꎁꃅꎆꋚꀋꎴꀋꈻꌠꊭꄎ、ꀀꈌꋉꄩꀊꂥꅉꇬꄉꉮꃤꂾꁈꏭꄐꈧꌠꆹ，ꑗꉘꊝꇁꀐ！

10 ꆏꏂꇫꌊꌞꊿꋅꈍꑋꃅꆏꈔꋏꇫꎭꄉꑽꃤꐆꐛꅹ，

ꅽꑷꈓꎲꅐꁁꅐ，ꊨꏦꀱꊨꏦꉮꌠꉬꀐ。

11 ꇓꉻꇬꇓꂵꈧꌠꇳꏅꇁ，

ꑳꁭꇪꏦꏡꌠꑌꀋꎪꃅꇫꅇꀱꌠꉬ。

12 ꌦꅪꌊꄉꇓꈓꋉ、ꑽꃤꌊꄉꁡꇤꄻꌠꊿꀊꋨꈨꆹꉮꃤꐥꀐ！

13 ꇬꉚ！ ꐧꇁꃰꊿꈀꎭꈀꅧꀕꃅꎹꄉꌠꃆꄔꇱꐗꇫꎭꌐ，

ꊿꋅꈀꐥꌠꇵꂷꅧꇗꀕꃅꋉꄉꌠꂿꄐꀋꐥꌐ。

ꋋꈨꐯꇯꄙꀕꃪꀕꂽꑼꌊꁈꑳꀊꊆꄻꇫꅐꇁꎻꌠꀋꉬꅀ？

14 ꎿꃀꀆꐒꐛꈴꌠꌟꃅ，

ꋧꃅꇣꄧꃅꄉꑳꀊꊆꀑꒉꑊꒉꌧꂿꌐꌠꉬ。

15 ꊿꅋꑱꋌꄻꎧꇱꃷꇎꄐꄉ，

ꃷꇎꁳꎧꑱꌌꏾꋒꇬꁖꇁꎻꈧꌠꆹꉮꃤꐥꀐ！

16 ꆏꀑꑊꀋꊌꃅꎲꄏꑊꏦꏽꌠꉬ，

ꆎꑌꁨꅝꑱꄉꅽꏾꋒꁳꇬꁖꇁꎻ。

ꑳꀊꊆꇇꇀꑳꁆꌠꇬꀞꍗꏡꌠꀋꎪꃅꏮꆏꁳꄉ，

ꅽꀑꒉꑊꒉꅍꇁꑊꏦꎲꄏꅍꐛꎻ。

17 ꆏꊾꇨꁴꍂꅿꃅꆀꀠꇍꊝ，

ꅽꊨꏦꑌꀋꎪꃅꁴꍂꅿꑠꊝꇁ；

ꑋꁮꉆꁮꆏꈔꋏꇫꎭꈧꌠꌟꃅ，

ꅽꊨꏦꑌꀋꎪꃅꐬꆠꑓꆠꑠꊝꇁ；

ꑞꃅꆏ，ꆏꊿꌉꊾꆳꉗꌦꅩꐥꀕ，

ꀋꂄꆈꒉꀕꃅꄉꃄꅉ、ꇓꈓꌋꆀꇓꈓꇬꉹꁌꈧꌠꊝ。

18 ꌩꁱꇓꁱꑞꂿꄐꐥꂯ？

ꋋꆹꇔꇷꇱꁱꁶꌊꌦꁱꌊꁱꃅꄉꇈ，

ꈰꏅꌠꌌꊿꉗꊿꂘ；

ꇔꇷꇫꄻꂶꌠꆹꋍꊨꏦꄻꄉꌠꌩꁱꇓꁱꑶꀠꑠꉘꇉ。

19 ꊿꌩꄹꏭ：“ꀀꄓꇁ”ꄷ，

ꇓꂵꑶꀠꑠꏭ：“ꄓꇁꌶ”ꃅꉉꈧꌠꆹꉮꃤꐥ！

ꌩꁱꇓꁱꑠꊿꂘꄎꑴꅀ？

ꉜꉏ！ ꌩꁱꌊꁱꉈꏭꆹꐍꇙꏁꇙꄉ，

ꈐꏭꆏꌗꍈꇬꀋꑌ。

20 ꑳꀊꊆꀉꄂꋍꌃꎔꑷꂿꇬꐥ，

ꐧꇁꃰꊿꃅꋍꂾꉆꄉꌙꈈꀕꄡꑟ。