ꉳꀠꇵꄯꒉ
1
1 ꌋꅇꄜꊿꉳꀠꇵꆹꐛꒌꋍꑠꋌꊌꂿ。ꉳꀠꇵꑳꀊꊆꄷꑗꇖꈨꂟ
2 ꑳꀊꊆꀋ！ ꉢꇖꂟꇬ，
ꆏꉠꇖꅇꂟꅇꀋꅲꅷꈍꄮꑟꂯꀋ？
ꉢꃚꐓꄉꅽꏯ“ꊋꒉꊋꁧꅸꌠꌐꀋꉆꀐ”ꄷꏅꇬ，
ꆏꄡꇗꇫꈭꋏꀋꇁꅀ？
3 ꆏꑞꃅꉢꁳꄷꅠꑠꊌꂿꎻꌠꉬ？
ꑽꃤꆈꒉꀕꑠꇫꅐꇬ，
ꆏꑞꃅꇬꀋꉜꇬꀋꅲꌠꉬ？
ꉠꈭꉠꇍꈔꋏꌠꌋꆀꊋꒉꊋꁧꅸꌠꐛꀐ，
ꐯꊨꐮꏈꌠꌋꆀꐯꅣꐮꇤꌠꇫꅐꇬꎷ。
4 ꑠꅹ，ꇗꅉꏦꃤꑠꂿꄐꀋꐥꀐ，
ꑖꉬꑌꊿꋌꊊꀋꂿꀐ。
ꊿꄸꆹꑖꊿꋀꇊꇤꏢꀕꃅꄉꐛꅹ，
ꑖꉬꋀꌌꀍꃈꐬꀠꀐ。
ꑳꀊꊆꉳꀠꇵꏭꅇꀱ
5 ꆍꊇꏮꀊꈫꀊꇋꌞꇩꏤꈧꌠꉜ，
ꋓꉪꁨꄉꉜꇬꆹ，
ꀋꎪꃅꆍꋌꇷꇧꁠ，ꋌꇷꈌꉛꀕꌠꉬ！
ꑞꃅꆏ，ꆍꊇꇫꐥꋋꋏꇬ，ꉢꌤꑠꐘꃅꌠꉬ，
ꊿꉉꆍꇰꑴꇬ，ꆍꊇꄡꇗꇬꀋꑇ。
6 ꇬꉚꄉ! ꉡꆹꏦꇍꄂꊿꀋꎪꃅꉢꄖꄑꎼꇁꌠꉬ，
ꊿꋋꈨꊾꇨꁴꍂꅿ、ꀋꂄꃴꇉꀕ；
ꃄꇖꄹꊂꏮꄉ，
ꃄꅉꋀꃤꀋꉬꑠꋀꍆꀀꌠꉬ。
7 ꊿꋋꈨꆹꊽꐬꆠꑓꆠ、ꊽꃨꆰꏸꈧ，
ꑖꉬꋀꇇꈐꀀꄷ，
ꀞꇽꌅꈌꑌꋀꐥꄷ。
8 ꋀꃆꀞꆹꍀꌺꏭꀋꋌꃅꀥꐳ，
ꌋꐓꆿꃀꏭꀋꋌꃅꌇꄧ，
ꋀꃅꋩꂽꈧꌠꈜꎴꃅꄷꄉꇁ，
ꐚꄑꏿꄉꇁ，
ꏬꆉꃬꒃꇁꌠꌟꃅꐙꃰꏿꄉꇁ。
9 ꋀꊇꐯꇯꊾꇨꁴꍂꅿꃅꊾꆼꍅꆹꅷꇁ，
ꋀꑓꏮꁨꏭꉜꄉꇁ，
ꊿꋀꁮꌊꁧꈧꌠꏓꎼꇁꇬꂤꏂꑘꀋꋌ。
10 ꃰꃅꈧꌠꋀꌌꒊꈧ，
ꌟꒉꌠꂠꋀꌌꁒꐀ，
ꁾꇓꈀꈬꀕꌠꋀꒊꒉ，
ꌦꏭꋉꌊꈳꅉꄻꄉꋀꅥꁖ。
11 ꀊꋨꄮꇬꆏ，ꋀꊇꆹꆲꇨꑠꄲꁏꇫꈴꇁꌠꌡ，
ꋀꊇꑽꃤꐥ，
ꑞꃅꆏ，ꋀꊋꃤꋀꌌꌦꌋꃅꄉ。
ꉳꀠꇵꉈꑴꑳꀊꊆꄷꑗꇖꈨꂟ
12 ꑳꀊꊆ-ꉠꏃꃅꌋ，ꉠꌃꎔꂶꌠꀋ！
ꆎꆹꀃꌋꂾꀊꆨꇯꆐꇫꐥꌠꀋꉬꅀ？
ꆎꆹꈍꄮꑌꀋꌦꌠ。
ꑳꀊꊆꀋ！ ꏦꇍꄂꊿꆏꁆꌌꊾꀞꇽꇁꌠꉬ；
ꇓꆈꀋꃀꀋ！ ꋀꊇꆏꄖꌊꊾꇇꇩꍈꇁꌠꉬ。
13 ꅽꑓꋪꆹꐙꎴꀕ，
ꄸꇁꅠꌠꑠꀋꉜ，
ꐈꇁꋓꌠꑠꀋꆫ，
ꄚꆏꑞꃅꑓꉜꏿꄉꊿꁳꄸꃅꅠꑽꎻꌠꉬ?
ꊿꄸꈧꌠꌞꊿꋀꏭꀋꋌꃅꑖꉬꑠꋀꇣꋠꇬ，
ꆏꑞꃅꁱꀋꐭꌙꈈꀕꌠꉬ？
14 ꆏꑞꃅꊿꁳꎾꃝꇬꉜꏂꑠꌡꎻꌠꉬ？
ꑞꃅꊿꁳꈛꑀꌠꇘꇙꊿꇫꏲꇬꂠꌠꀋꐥꑠꈨꌡꎻꌠꉬ？
15 ꏦꇍꄂꊿꆹꇥꉧꌊꊿꈀꐥꅉꃅꋀꈻꎼꇁ，
ꉛꐱꌊꄉꊿꋀꐱꅞ，
ꉛꈜꅍꌊꄉꊿꋀꏓꐯꇯꌐ。
ꑠꅹ，ꋀꊇꉌꇿꑓꇿꌊꄉ，
16 ꆦꑝꅍꌞꌌꉛꐱꁵ，
ꅿꉗꌒꋌꐔꄀꌊꉛꈜꅍꁵ；
ꑞꃅꆏ，ꋀꊇꆹꋋꈨꇇꄧꄉꋠꇐꂄꇁꎔꌠꇎꐯꇎꃅꊌꀐ。
17 ꄚꋀꊇꆹꉛꐱꀕꌦ、ꉛꐱꉶꌦꃅꇬꎷꀐꌠꅀ？
ꋀꊇꅉꀕꃅꊾꎭꃅꀋꉈꃅꌞꇩꏤꊿꈧꌠꈔꋏꇬꎷꀐꌠꅀ？