ꂱꏦꄯꒉ
1
1 ꒀꄤ、ꑸꉳꌦ、ꑭꀕꏦꏤꒀꄊꃰꃅꄺꄮꇬ，ꑳꀊꊆꅇꂷꇁꌊꂿꆺꎭꊿꂱꏦꄷꑟꄉ，ꌒꂷꆀꑸꌋꆀꑳꇊꌒꇌꃆꂮꐛꒌꇣꋲꑠꋌꊌꂿ。ꌋꅇꄜꊿꐒꇁꊀꅇꉙ
2 ꐧꇁꃰꊿꊈꀋ！ ꆍꊇꐯꇯꅲꄉ！
ꃄꅉꌋꆀꃄꅉꇬꈀꐥꌠꀋ！ ꆍꊇꋓꉪꁨꄉꅲ！
ꌋꑳꀊꊆꆹꋍꌃꎔꑷꂿꇬꄉꆍꑽꃤꐥꄷꅇꊪꌬꀐ。
3 ꇬꉚ！ꑳꀊꊆꋍꐤꅉꇬꄉꀁꋌꇁꇈ，
ꈛꎼꃄꅉꀊꂥꅉꇬꐺ。
4 ꁧꇁꇈꌺꃅꋍꇂꃴꄉꐯꁧꌐ，
ꇉꈫꇁꄿꃅꄉꀣꁧꐡꁧꌐ，
ꐛꎿꇁꃆꄔꃹꌠꌟ，
ꏦꏪꇬꒈꂄꄓꌠꌡ。
5 ꋍꑠꐯꇯꑸꇱꄰꑭꊂꑽꃤꒉꄸꉬ，
ꑱꌝꆀꄰꄸꃤꐛꅹꉬ。
ꑸꇰꄰꑭꊂꑽꃤꇿꇬꎍ？
ꌒꂷꆀꑸꎍꌠꀋꉬꅀ？
ꒀꄊꄰꀭꇐꌦꌋꆦꑝꅉꇿꇬꐛ？
ꑳꇊꌒꇌꐛꌠꀋꉬꅀ？
6 ꑠꅹ，ꉢꀋꎪꃅꌒꂷꆀꑸꇓꈓꁳꀜꐡꆿꐢꌦꏭꇓꃀꐛꄉ，
ꌌꑌꃀꌧꊈꊪꎻ；
ꉢꀋꎪꃅꇓꈓꇬꇓꂵꈧꌠꆷꇁꄿꇬꊐꄉ，
ꇓꈓꅉꃀꁳꅔꁖꇁꎻ。
7 ꇓꈓꇬꌩꁱꇓꁱꈀꒃꄉꈧꌠꃅꐷꋧꐛꃀꐛꌐ，
ꎼꃅꃏꑽꄉꈁꊌꌠꌩꁱꇓꁱꈧꌠꃆꄔꌌꐗꇫꎭꌐ，
ꉡꆹꋍꌩꁱꇓꁱꈀꐥꃅꈔꋏꇫꎭ；
ꑞꃅꆏ，ꌩꁱꇓꁱꎲꃷꃆꅿꄷꄉꏓꌊꇁꈧꌠꆹ，
ꊁꏭꇁꀉꁁꃅꄷꎲꃷꃆꅿꃤꐛꁧꌠꉬ。
8 ꋋꒉꄸꃅꄉ，ꉡꆹꈨꃅꉩ，
ꃢꈜꀋꈚꑬꅮꀋꅑꃅꄉꈛꎼꐺ；
ꇈꈬꀉꐩꌟꃅꏄꀆ，
ꅐꅑꇢꉠꌟꃅꇕꏒ。
9 ꑞꃅꆏ，ꌒꂷꆀꑸꂷꊂꆹꉃꅉꇬꀋꐛ，
ꁭꁘꅷꒀꄊꃅꄷꈴꇈ，
ꇁꉠꉹꁌꀀꅉꑳꇊꌒꇌꇓꈓꄇꂿꁭꑭꑟꀐ。
ꁮꐚꇁꑳꇊꌒꇌꊫꃛꇁꂯꄉꀐ
10 ꌤꋌꐘꌌꏦꄯꇓꈓꄉꄡꄜ，
ꈍꃅꑌꑳꉨꀋꉆ，
ꀨ.ꑸꃚꇁꇓꈓꌦꏭꈬꇬꄉꆺꀕꂃ。
11 ꎭꃏꇓꈓꉹꁌꊈꀋ！
ꆍꊇꆹꑊꏦꎲꄏꅩꀧꍓꃅꊿꁮꌊꇫꈴꁧ，
ꌒꇂꇓꈓꉹꁌꁖꄇꂿꉈꏭꅐꇁꀋꀬ，
ꀨ.ꑴꑪꇓꈓꊿꐒꉩꏽꄉ，ꆍꇇꀤꇁꀋꄐꀐ。
12 ꂷꇊꇓꈓꉹꁌꉌꂵꐒꌊꇨꊸꌦꄉꏽ，
ꐒꇔꊀꇔꂄꌠꎔꌠꇫꑟꇀꀕꉚ。
ꑞꃅꆏ，ꉮꃤꆹꑳꀊꊆꄷꄉꇁꌊꑳꇊꌒꇌꇓꈓꄇꂿꁭꑭꑞꀐ。
13 ꇁꏣꇓꈓꉹꁌꀋ！ ꃆꇭꊀꄅꌊꈻꍯꈻꎻ；
ꑭꉢꉹꁌꑽꃤꐆꌠꆹꆍꌷꌠꉬ，
ꑱꌝꆀꑽꐪꇁꀦꆹꎹꅷꆍꄷꑟꉆ。
14 ꑠꅹ，ꆏꐮꐞꈁꁠꄻꂿꆺꎭ.ꏦꄯꇓꈓꁵ，
ꑸꇱꑭꇓꈓꀀꌠꃣꉻꈧꌠꆹꀋꎪꃅꐈꋓꑱꌝꆀꃰꃅꈧꌠꊝ。
15 ꂸꆀꎭꇓꈓꉹꁌꊈꀋ！
ꉢꀋꎪꃅꊿꁳꆍꇓꈓꇑꇁꍆꇁꎻ，
ꑱꌝꆀꌟꒉꌠꂾꈧꌠꀋꎪꃅꂁꑸꄗꇂꀀꁧ。
16 ꒀꄊꀋ！ ꅽꌳꃈꅮꆏꇫꉂꈧꌠꐛꅹꃅ，
ꅽꀂꏾꆏꐑꏨꆉꀍꆫꂷꌟꃅꀍꅗꃅꄉꌠꉬ，
ꑞꃅꆏ，ꋀꊇꌞꊿꁮꌊꆎꐞꁧꇁꀐ。