ꂱꏦꄯꒉ 2

ꊾꆼꍅꆹꅷꈧꌠꉮꃤꐥꀐ

1 ꊿꀀꈤꇬꀀꄉꑽꃤꄸꃤꏂꇫ、ꀋꂄꆈꒉꀕꌠꄐꏤꐺꈧꌠꆹꉮꃤꐥꀐ！

ꋀꇇꊋꑌꏢꑌꐛꅹ，ꃅꄜꄷꌦꆏꄓꄉꄸꃅꅠꑽ。

2 ꋀꊇꌞꃄꅉꉌꃹꑲꆏ，ꋀꍆꌌꁧ，

ꋀꊇꌞꑳꇤꉪꑲꆏ，ꋀꇑꌊꁧ；

ꋀꊇꑳꌌꁈꌋꆀꋍꑱꈐꑱꑭꊿꊏꐺ，

ꌞꊿꌋꆀꋍꁨꇐꄉꇐꃅꋀꇑꋀꍆꌌꁧꌐ。

3 ꑠꅹ，ꑳꀊꊆꑠꃅꉉ：

“ꇬꉚꄉ！ ꉢꄐꏤꄉꉮꃤꁳꊰꇁꊿꋋꁯꑭꊂꌸꎻ；

ꉮꃤꋋꈨꇁꆍꇵꆹꎑꄉꈍꃅꑌꇬꇔꀋꄐꌠꉬ。

ꆍꊇꀂꏾꄊꌊꐺꀋꄐ，

ꑞꃅꆏ，ꀊꋨꇅꆹꉮꃤꌸꄮꉬ。

4 ꀊꋨꄹꉇꑞꄮꇬꆏ，ꊿꀋꎪꃅꆍꎁꃅꉙꑵꌠꐥ，

ꉌꐒꇁꎭꃅꄉꑠꃅꌦꏷꉙꇐꑵ：

‘ꉪꊇꀜꐡꆿꐛꉱꇤꀐ，

ꉠꉹꁌꁨꇐꄉꇐꌞꃤꐛꁧꀐ；

ꑳꀊꊆꆹꉪꄷꄉꋋꈨꋌꌌꁧꇈ，

ꉪꃄꅉꊁꅉꋌꁸꊿꉪꇏꉪꁮꇁꈧꌠꁵ！’ꄷ。

5 ꑠꅹ，ꆍꊇꆹꑳꀊꊆꉹꁌꈬꄔꇬꄉꌐꂷꉅ、ꏦꀨꌭꄉꃄꅉꁸꇁꉆꑠꂷꀋꐥꀐ。

ꑳꀊꊆꌋꅇꄜꊿꃶꀋꐚꌠꏭꊨꀖ

6 ꋀꊇꆏꑠꃅꉉ：

“ꌋꅇꄡꄜ，ꈀꄸꑌꋍꑠꄜꁊꀋꉆ，

ꑊꏦꎲꄏꑠꈍꃅꑌꉪꌶꀋꇁꌠꄹ”ꄷ。

7 ꑸꇱꄰꀋ！ ꆍꊇꆹ：

“ꑳꀊꊆꉌꊸꌊꋰꀋꉆꀐꅀ？

ꋌꌤꑠꃅꐙꌠꃅꑴꅀ？”ꄷꉉ。

ꆍꊇꑠꃅꉉꉆꑴꅀ？

ꉠꅇꂷꉐꂷꆹꊿꃅꐨꊒꆽꀕꈧꌠꇬꈲꏣꐥꌠꀋꉬꅀ？

8 ꄚ，ꀋꑍꊂꋋꇅꇬꆏ，ꆍꊇꆹꁮꐚꌟꃅꄓꌊꉠꉹꁌꏭꇁ，

ꊿꌉꈿꅉꇬꄉꀱꇁꇈ，ꉪꅍꏡꅍꀋꐥꃅꈝꃀꈴꇁꈧꌠꃢꈜꆍꇔꌌꁧ。

9 ꉠꉹꁌꈬꄔꇬꀋꃀꈧꌠꀁꇬꀀꌒꑌꌒꅉꇬꄉꆍꈹꉈꏭꎭ，

ꉠꀑꒉꑊꒉꑌꋀꀉꑳꈧꌠꇭꀧꇬꄉꐩꋊꐩꍂꃅꆍꇑꌊꁧꀐ。

10 ꄓꄉꁧꌶ！ ꄚꋌꈚꆹꆍꀀꈉꑌꈇꀋꉬꀐ，

ꑞꃅꆏ，ꄚꋌꈚꍍꆀꄉꀜꐡꇁ，

ꄷꀋꁧꀜꐡꐯꀋꉜꌠꉬ。

11 ꀋꄸꄷꊿꉌꂵꐈꑭꋓꑭꑌꇈꈰꏅꄉ：

“ꉢꆍꊇꎧꐎꎦꆈꊌꇁꌠꃆꂮꄜꆍꇰꂿ”ꃅꉉꑲꆏ，

ꊿꀊꋨꂷꆹꉹꁌꋋꈨꌌꌋꅇꄜꊿꂷꃅꄉꌠꉬ。

12 ꑸꇱꄰꀋ！ ꉢꀋꎪꃅꆍꊇꉢꏓꐯꇯ，

ꑱꌝꆀꉹꁌꇬꋒꇈꈧꌠꀋꎪꃅꉢꏣꏑꌌꋍꈜꇁ；

ꀋꇊꆏꑿꉻꇬꀀꌠꑾꊈꌡ，

ꆫꁍꇬꐥꌠꑌꑿꌡ，

ꊻꂷꃷꁨꀉꑌꄉ，ꐭꃚꏇꃚꎓꁨꎓꀆꄑꌠꉬ。

13 ꈭꀺꈛꀺꂶꌠꋀꂾꐊ，

ꋀꊇꋌꏃꇓꈓꄇꂿꋀꅥꁖꇈ，ꄇꂿꈴꄉꅐꉈꏭꁧꌠꉬ；

ꋀꃰꃅꋀꂾꐊ，

ꑳꀊꊆꋀꏃꂠ。