ꂱꏦꄯꒉ 3

ꑳꀊꊆꑱꌝꆀꏲꌋꂠꌋꈧꌠꏭꊨ

1 ꄚꄉ，ꉡꆹꑠꃅꉉ：

“ꑸꇱꄰꏲꌋꂠꌋꊈꀋ！ ꑱꌝꆀꄰꌟꒉꌠꂾꊈꀋ！

ꆍꊇꅲꄉ！

ꆍꊇꆹꑞꆏꊒꆽꀕꌠꆍꇬꀋꌧꅀ？

2 ꆍꊇꆹꂄꌠꌁꑷ，ꄸꌠꉁꅉ，

ꉠꉹꁌꇭꀧꇬꑆꐒꐺ，

ꋀꃷꅍꇬꆊꌧꍓꐺ，

3 ꆍꊇꉠꉹꁌꎸꋠꐺ，

ꉠꉹꁌꆍꌌꑅꇷꐒ，

ꋀꃷꅍꆍꅥꆸꐔ，

ꎸꐡꌟꃅꆍꐡꉽꐯꇬꊐꄉ，

ꎸꊈꌟꃅꆍꂃꇉꇬꊐꄉꏬ。

4 ꊁꉮꃤꊜꄮꆏ，ꏲꌋꂠꌋꋋꈨꆹꈧꊰꀕꃅꑳꀊꊆꏭꇖꂟꇁ，

ꄚ，ꑳꀊꊆꋀꇖꅇꂟꅇꀋꅲ，

ꀊꋨꄮꇬꆏ，ꋀꈀꃅꌠꄸꃤꅠꃤꒉꄸꃅ，

ꑳꀊꊆꆹꈍꃅꑌꑓꏮꋀꀋꉜꃅꄉꋀꐞꁧꌠꉬ。

5 ꉉꅷꌋꅇꄜꊿꉠꉹꁌꋀꏃꌊꈜꑽꁧꈧꌠꑟꑲꆏ，

ꋀꊇꆹꈂꀸꋙꈾꅍꊌꇬꆏ，ꏅꄉꑠꃅꉉ：

‘ꋬꂻꈨꅪ！’ꄷ；

ꈀꄸꋚꄻꋀꀋꍈꆏ，ꋀꊇꈀꄸꅥꇤꇁꏭꄐ，

ꑳꀊꊆꑠꃅꉉ：

6 ‘ꑠꅹ，ꆍꊇꆹꃅꒉꆈꏸꀕꌠꊝꄉ，

ꐛꒌꆍꇫꂿꀋꄐ；

ꆈꋧꋪꌠꊝꄉ，

ꈎꌋꆪꍆꀋꄐ。

ꉘꁮꌋꅇꄜꊿꄩꄉꈞꆈꃹꁧꒉꄸꃅ，

ꂵꆧꈨꌬꌫꄮꇁꆈꋧꋪꇬꅜꌠꉬ。

7 ꊿꑓꂿꑴꄷꈧꌠꀋꎪꃅꑊꏦꎲꄏꇁ，

ꈎꌋꆪꍆꈧꌠꈍꃅꑌꎲꅐꁁꅐꇁ；

ꏃꃅꌋꋀꅇꀋꀱꐛꅹ，

ꋀꊇꇇꄻꈂꀸꉱꌌꐺꌠꉬ’ꄷ。

8 ꄚꉡꆹ，ꑳꀊꊆꒌꇁꉢꌵꐛꅹ，

ꊋꃤꈀꇨꀕꌠꐥ，ꄸꈐꊒꆽꀕꌠꀀ，

ꉌꂵꀬꅑꑠꂷꑌꄉ，

ꑸꇱꄰꑽꃤꉢꅔꀖꅐꇁ，

ꑱꌝꆀꄰꄸꃤꉢꄐꌐꎼꇁ。

9 ꑸꇱꄰꏲꌋꂠꌋꊈꀋ！

ꑱꌝꆀꄰꌟꒉꌠꂾꊈꀋ!

ꅇꂷꋋꇬꅲꄡꑟ，

ꆍꊇꆹꊒꆽꀕꑠꀋꃹꃅ，

ꌤꆿꑞꑌꆍꄻꇂꎎꇫꎭꌐꀐ；

10 ꊾꌦꑘꄃꐛꄉꑭꉢꇓꈓꋉ，

ꑽꃤꄸꃤꐆꄉꑳꇊꌒꇌꄻ。

11 ꇓꈓꇬꌟꒉꌠꂾꈧꌠꃴꎆꃴꇁꋠꄉꀞꇽ，

ꆦꑝꊿꈧꌠꊋꁌꍇꌠꉪꄉꊿꉗꊿꂘꐺ，

ꌋꅇꄜꊿꈧꌠꐎꉪꏂꉨꄉꈎꌋꆪꍆꐺ；

ꄚꋀꊇꆏꑳꀊꊆꉘꇉꄉꑠꃅꉉ：

‘ꑳꀊꊆꉪꈬꄔꀋꐥꅀ？

ꉮꃤꈍꃅꑌꉪꌶꀋꇁꌠꄹ’ꄷ。

12 ꑠꅹ，ꆍꒉꄸꃅꄉ，

ꑭꉢꇓꈓꆹꇁꃄꅉꊿꊨꂿꌊꋙꊪꒉꏽꑠꏬꌡ，

ꑳꇊꌒꇌꑌꎏꐡꀉꀜꀊꇁꐛ，

ꁦꀮꑷꂿꂶꌠꆹꌩꋦꇓꋦꅉꐛꁧꌠꉬ。