ꐩꋊꐩꍂꃅꄮꐽ
4
1 ꊁꄽꂫꃅꑍꊬꌠꆏ，ꑳꀊꊆꑷꂿꋥꅉꇬꁧꂶꌠꆹꀋꇙꀋꑐꃅꄉꇫꋦꌠꉬ，
ꁦꒉꇈꉬꈀꐥꌠꄩꐂ，
ꐕꁦꀮꇈꀮꈀꐥꌠꂦꀋꋌꃅꄉ；
ꊿꄙꀕꃪꀕꃅꄓꌊꁧꋋꂷꇬꏓꇁꌐ。
2 ꊿꋅꈍꑋꀋꎪꃅꁨꏭꉜꄉꇁꇈꑠꃅꉉ：
“ꁨꇁ！ꉪꊇꐯꇯꑳꀊꊆꁧꅂꄉ，
ꑸꇱꏃꃅꌋꑷꂿꂶꌠꇬꆹꂿ。
ꋌꀋꎪꃅꋍꇗꅉꈝꃀꋌꄻꉪꂘ，
ꉪꊇꑌꋍꈭꇁꈛꏦꍬꌠꉬ”ꄷ。
ꑞꃅꆏ，ꉙꅇꂘꅇꆹꀋꎪꃅꑭꉢꄉꅐꇁ，
ꑳꀊꊆꅇꂷꑌꀋꎪꃅꑳꇊꌒꇌꄉꁖꇁꌠꉬ。
3 ꋌꀋꎪꃅꊿꋅꈀꐥꌠꈬꄔꄉꀞꇽꇁ，
ꋌꈜꎴꃅꄷꇩꏤꀉꇨꌠꇢꊭꇬꌤꆿꊨꇽꇁ。
ꋀꊇꆹꂗꍵꋀꌌꆹꈈꋩꇫꎭ，
ꐳꂷꋀꌌꉊꈯꋩꇫꎭ；
ꇩꏤꋋꂷꂗꍵꈻꌊꇩꏤꀊꋨꂷꀋꌉꀐ，
ꋀꊇꌉꈿꁻꏤꃆꂮꑠꑌꀋꌷꀐ。
4 ꊿꋍꂷꋑꀋꋒꊨꏦꑌꃀꌧꊈꌋꆀꀋꃨꂷꅑꌩꁧꇂꃴꑌ，
ꊾꂷꋀꇷꋀꇋꇁꌠꀋꐥ。
ꋋꈨꆹꄙꀕꃪꀕꂽꑼꌊꁈꑳꀊꊆꉉꌠꉬ。
5 ꌞꊿꋅꈀꐥꌠꃅꊨꏦꌦꌋꏭꀍꃈꄚꄉꐥ，
ꄚꉪꊇꆹꑳꀊꊆ-ꉪꏃꃅꌋꏭꇗꅉꃅꄉꐥ，
ꅑꅸꐩꋊꐩꍂꑟ。
ꑱꌝꆀꊿꀱꉈꑴꋀꊨꏦꃅꄷꇁ
6 ꑳꀊꊆꄹꇬ： “ꀊꋨꄹꉇꆏ，
ꉡꆹꀋꎪꃅꐂꀜꌠ、ꊿꈹꉈꏭꁊꇫꎭꈧꌠꌋꆀꉢꌌꇇꇩꍈꈧꌠꐯꇯꉢꏣꏑꌌꋍꈜꇁ。
7 ꉢꀋꎪꃅꐂꀜꌠꁳꇁꇫꋒꇈꌠꉹꁌꐛꎻ，
ꊿꈹꈜꎴꃅꄷꎭꈧꌠꁳꇁꇩꏤꀉꇨꑠꂷꐛꎻ。
ꑳꀊꊆꆹꑭꉢꇓꈓꄉꃰꃅꄻꄉꋀꏲꂠ，
ꅑꅸꐩꋊꐥꍂꑟ。
8 ꆎꆹꆫꃀꑌꑿꆫꃬꅉꉬ！
ꆎꆹꑭꉢꉹꁌꁾꇓꈫꈈꅉꉬ！
ꀋꉊꂴꏭꌅꈌꈧꌠꀋꎪꃅꀱꉈꑴꆏꁳ，
ꑳꇊꌒꇌꃰꃅꌅꈌꀋꎪꃅꏮꉈꑴꆏꁳꌠꉬ。
9 ꀋꃅꆏꑞꃅꃚꋒꑠꂤꃅꄉꏅꌠꉬ？
ꆍꈬꄔꃰꃅꂷꀋꐥꅀ？
ꅽꇖꊩꄟꃀꈧꌠꈔꌐꄉ，
ꆏꀋꃀꌺꒆꑠꂷꌟꃅꆅꇧꁠꀐꅀ？
10 ꑭꉢꀋ！ꆎꆹꀋꃀꌺꒆꑠꂷꌟꃅꐧꏂꐧꆽꃅꆄꇖ，
ꑞꃅꆏ，ꆏꀋꎪꃅꇓꈓꇬꄉꅐꉈꏭꃄꅉꇬꀀꁧ。
ꆏꀋꎪꃅꀠꀙꇍꁧ；
ꀊꄶꇬꄉ，ꆎꆹꈭꋏꊌ，
ꀊꄶꇬꄉ，ꑳꀊꊆꀋꎪꃅꆏꋌꈭꋏꌊꁮꐚꇇꈐꐞꌠꉬ。
11 ꀋꃅꇩꏤꈍꑋꐯꏑꌌꆏꌉꇁꇈꑠꃅꉉ：
‘ꑭꉢꇓꈓꋋꂷꊿꁳꌌꍍꆀꎻ！
ꑓꀠꀕꃅꉪꁳꊌꂿꎻ！’ꄷ。
12 ꄚꋀꊇꆹꑳꀊꊆꉪꐨꋀꇫꅉꀋꐚ，
ꋍꄐꇐꏤꇐꑌꋀꇫꐞꀋꉅ，
ꋀꊇꋌꇱꏣꏑꐯꇯꇬ，
ꋚꏤꏣꏑꄸꉺꇬꅞꌠꌡ。
13 ꑭꉢꀋ！ ꄓꄉꋙꋩꇁꌶ！
ꉡꆹꀋꎪꃅꅽꀑꃚꁳꎸꅍꐛꎻ，
ꅽꑭꁖꁳꐯꂷꐛꎻ。
ꆏꀋꎪꃅꊿꋅꈍꑋꆏꐷꋧꐛꃀꐛꄉ，
ꋀꎆꋚꈧꌠꆏꌞꑳꀊꊆꁵ，
ꋀꁨꇐꈧꌠꆏꌞꃅꃴꃄꅉꌋꂶꌠꁵꌠꉬ。