ꌅꈌꌬꂶꌠꀨꆀꉿꄉꒆꇁ
5
1 ꉹꁌꋍꏅꊈꀋa！ ꀋꃅꐯꏑꌌꂽꁥꃅꄉ；ꁮꐚꉪꌉꇁꀐ，
ꄯꁯꌊꑱꌝꆀꌟꒉꌠꂾꁧꇉꏶꇁꀐ。
2 ꑱꃔꄣ-ꀨꆀꉿꀋ！
ꆎꆹꒀꄊꃅꄷꇓꈓꈧꌠꈬꄔꇬꀄꊭꍈꉬꑴꇬ，
ꄚꊁꇁꋍꑍꆏ，ꊾꂷꅽꄹꄉꅐꇁ，
ꋌꉠꎁꃅꑱꌝꆀꈬꄔꇬꌅꈌꌬ；
ꋍꊧꀨꆹꀃꌋꀊꆨꂴꇬꂾꇯꆐꇫꋦꌠꉬ。
3 ꑠꅹ，ꑳꀊꊆꆹꑱꌝꆀꊿꋌꏮꁮꐚꁵ，
ꅑꅸꌋꅪꀉꑳꁨꂶꌠꀉꑳꒆꎼꇀꄮꑟꌠꉬ；
ꀊꋨꄮꇬꆏ，ꋍꃺꑌꀉꁁꈧꌠꑌꀋꎪꃅꀱꑱꌝꆀꊿꄷꑟꇁꌠꉬ。
4 ꋋꆹꀋꎪꃅꑳꀊꊆꊋꃤꈀꇨꀕꌠꉘꇉ，
ꋌꑳꀊꊆ-ꋍꏃꃅꌋꂓꊽꃪꉬꂶꌠꉘꇉ；
ꋌꄓꇬꉆꄉꋍꑿꈧꌠꆫꉘ，
ꋀꁳꀀꌒꑌꌒꎻ；
ꑞꃅꆏ，ꀊꋨꄮꇬꆏ，ꋋꆹꀋꎪꃅꐤꒉꋍꉎꀋꐥ，
ꅑꅸꃅꋮꆸꈈꑟ。
5 ꋋꆹꄮꐽꋌꌌꂶꌠꉬ。
ꈭꋏꌋꆀꈔꋏ
ꑸꎽꊿꉪꃅꄷꌉꇁ，
ꉪꃰꃅꑷꂿꄔꈻꇀꄮꇬꆏ。
ꉪꊇꆹꆫꃀꏃꑹꌊꄻꄉ，
ꏃꌋꂠꌋꉆꑼꌐꋉꄉꇬꌉꆹꎻ。
6 ꋀꊇꀋꎪꃅꂗꍵꈻꌊꑸꎽꃅꄷꏲꂠ，
ꑱꃀꆗꌌꆀꇊꃅꄷꌄꇤꐺ。
ꑸꎽꊿꉪꃅꄷꉄꌎꇁ，
ꉪꃅꋮꄔꈻꇀꄮꇬꆏ，
ꋋꆹꀋꎪꃅꉪꈭꋏꇁꌠꉬ。
7 ꑸꇱꄰꊿꇫꋒꇈꈧꌠꆹꌞꊿꋅꈍꑋꈬꄔꐥꇬ，
ꑳꀊꊆꄷꄉꇁꌠꍑꒉꌡ；
ꂷꉐꐛꇁꁬꇁꆰꌺꌸꌠꌡ；
ꋀꊇꆹꊾꑌꉘꀋꇉ，
ꐧꇁꃰꊿꀋꊫꀋꁱ。
8 ꑸꇱꄰꊿꇫꋒꇈꈧꌠꆹ，
ꌞꇩꏤꌋꆀꌞꊿꋅꈍꑋꈬꄔꐥꇬ，
ꌩꏪꇓꃴꑋꁮꉆꁮꈬꄔꆿꅪꀋꀮꌡ；
ꆿꅪꀊꏀꀉꇨꍶꑿꈬꇬꃹꇁꂷꑌꌡ；
ꋌꈀꈴꒈꅉꆏ，ꀋꎪꃅꋌꍺꇽ、ꄔꈻꇧꁠ，
ꊾꂷꇫꁌꄎꌠꀋꐥ。
9 ꆏꇇꐕꀊꂥꃅꄉ，ꅽꁮꐚꄩꊋꅊꇈ！
ꅽꁮꅽꐚꐯꇯꈔꋏꇫꎭꌐꅊꇈ。
10 ꑳꀊꊆꑠꃅꉉ：
“ꀊꋨꄹꉇꑞꄮꇬꆏ，
ꉢꀋꎪꃅꆍꈬꄔꄉꃆꀞꈧꌠꈔꋏꇫꎭ，
ꌉꈿꍮꊪꈧꌠꐆꐯꀋꉜꇫꎭ；
11 ꅽꇩꏤꈐꏭꇓꈓꈧꌠꐅꀘꇫꎭ，
ꅽꁾꇓꈀꐥꅉꃅꄹꆷꇫꎭ；
12 ꆍꇇꈐꇬꃔꌤꈧꌠꃅꈔꋏꇫꎭꌐꄉ，
ꆍꃅꄷꈎꌋꆪꍆꌠꇬꀋꐥꀐꌠꉬ。
13 ꉢꀋꎪꃅꆍꈬꄔꇬꌩꁱꇓꁱꆍꒃꄉꈧꌠꌋꆀꌦꌋꌷꁧꈧꌠꐯꇯꈔꋏꇫꎭꄉ，
ꆍꊇꆍꇇꄻꄉꈧꌠꏭꇗꅉꀋꃅꀐꌠꉬ。
14 ꉢꀋꎪꃅꆍꈬꄔꄉꑸꎹꇁꌦꁱꌊꁱꈧꌠꍠꆷꇫꎭ，
ꆍꇓꈓꈧꌠꐅꀘꇫꎭꌐ；
15 ꉡꆹꀋꎪꃅꇨꇅꃃꐯꃃ、ꃃꋩꅩꑳꀕꃅꄉꇩꏤꉠꅇꃅꀋꅲꈧꌠꇇꇩꍈꌠꉬ”ꄷ。