ꑳꀊꊆꑱꌝꆀꊿꊂꅇꎹ
6
1 ꆍꊇꑳꀊꊆꅇꂷꅲꄡꑟ，ꋌꑠꃅꉉ：“ꄓꇁ！ꁧꇂꇈꌺꂾꄉꆍꊨꏦꎁꃅꅔꀥ；
ꁦꀮꇈꀮꁳꆍꅇꂷꊌꈨꎻ。
2 ꁧꇂꇈꌺꈧꌠꀋ！ ꆍꊇꑳꀊꊆꈍꃅꅇꎹꌠꅲꇁ！
ꐩꋊꐩꍂꃅꇫꋦꌠꃄꅉꅉꃀꀋ！ ꅲꄉ！
ꑞꃅꆏ，ꑳꀊꊆꋍꉹꁌꊂꅇꎹ，
ꋌꑱꌝꆀꊿꌋꆀꐮꅔꀥ。
3 ꉠꉹꁌꊈꀋ！ ꉢꆍꂾꈴꀋꄿꅍꑞꈨꃅ？
ꌤꑞꈨꉢꃅꇬꅜꄉꆍꉌꅧꑓꇤꌠꉬ？
ꆍꊇꉉꉡꇰ!
4 ꉡꆹꆍꊇꉞꏹꄉꉢꏃꅐꇁꋺ，
ꁏꐚꄻꀊꄶꐤꅉꇬꄉꆍꊇꉢꈭꋏꌊꇁ。
ꃀꑭ、ꑸꇍꌋꆀꂰꆀꀊꏤꉢꁆꌌꆍꂾꐊꄉꆍꏃꂠꎽ。
5 ꉠꉹꁌꊈꀋ！ ꀋꉊꂴꏭꃀꑸꃰꃅꀠꇍꈍꃅꄉꏂꇫꌠꆍꎺꄉꄡꑟ，
ꀘꇓꄰꌺꀠꇂꈍꃅꋍꏭꅇꀱꌠꑌꆍꎺꄉꄡꑟ，
ꌤꆿꏃꄝꇓꈓꅑꅸꏣꏧꇓꈓꑟꌠꈀꅐꈧꌠꑌꎺꄉꄡꑟ，
ꑠꃅꄉ，ꆍꁳꑳꀊꊆꑖꉬꌠꃅꐨꊨꄅꎻ”ꄷ。
ꑳꀊꊆꇫꉌꃹꐨ
6 ꉢꑳꀊꊆꂿꆹ，
ꋍꉎꀋꐥꌠꏃꃅꌋꂾꄉꀍꃈꄚꆹꇬ，
ꑞꌞꇬꁳꄡꑟꀋ？
ꉢꋋꂿꆹꇬ，
ꇂꇤꌺꋍꈓꐛꑠꌌꐗꌐꆦꑝꅍꃅꌞꑲꆀꍑꅀ？
7 ꑳꀊꊆꆹꑻꇅꄙꇁꃪꃅꌞꋌꁳꌠꉌꃹꑴꅀ？
ꒀꒉꄙꀕꃪꀕꀋꈘꏡꃅꌞꋌꁳꌠꄻꈴꑴꅀ？
ꉢꉠꑽꃤꒉꄸꃅ，ꉠꌺꒉꂶꌠꌞꉆꑴꅀ？
ꉢꉠꄸꃤꐛꅹꃅ，ꉠꇜꀕꌳꃈꅮꌞꉆꑴꅀ？
8 ꐧꇁꃰꊿꊈꀋ!
ꑳꀊꊆꆹꑞꆏꂄꇁꎔꌠꉬꌠꋌꄐꌐꆏꀦꀐ。
ꋌꅽꄹꑞꈨꇖꀋ？
ꆏꃅꐨꊒꆽꀕ，ꊾꎭꃅꉇꑭꑌ，
ꉌꂵꆺꀋꒉꄇꀋꒉꃅꄉꅽꏃꃅꌋꐊꐺꑲꆏꍑꀐ。
ꑳꀊꊆꑱꌝꆀꊿꇇꇩꍈ
9 ꑳꀊꊆꆹꇓꈓꋋꂷꇴꄉꇬꏭꅇꉉ，
ꊿꅽꂓꁌꒉꌠꆹꇯꍝꃅꌧꅍꂿꅍꐥꌠꉬ；
ꃣꉻꌋꆀꇓꈓꇬꉹꁌꋍꏅꊈꀋa！
ꆍꊇꇫꅲꄡꑟ。
10 ꊿꄸꀁꇬꎆꋚꀋꎴꀋꈻꑠꇫꎍꑴꌦꌠꀋꉬꅀ？
ꋙꈤꂶꀧꋀꄻꀄꊭꃅꄉꊽꇨꇅꃃꑠꁨꌠꀋꉬꅀ？
11 ꀋꄸꄷꊿꊾꋠꋂꏣꌬ，
ꊿꀸꏣꇓꋀꄻꐣꁙꊐꌊꐺꇬ，
ꊿꋍꑠꉢꉜꌊꑽꃤꀋꐥꃅꄉꉆꑴꅀ？
12 ꇓꈓꈐꏭꊿꌣꈚꈧꌠꆹꊋꒉꊋꁧꅸ，
ꇓꈓꉹꁌꈧꌠꆹꈂꀸꈱꅇꏅꅇꉉ，
ꉐꆂꐈꅇꋓꅇꏅ。
13 ꑠꅹ，ꉢꅽꇇꇩꍈꄉ，ꆏꂷꊂꌸ；
ꅽꑽꃤꒉꄸꃅ，ꉢꆏꁳꐡꈥꅐꎻꌠꉬ。
14 ꆏꋟꆹꋠꑴꇬ，ꋠꂊꇁꀋꉆ，
ꅽꀃꃀꄡꇗꁖꏯꀕꇬꎷ。
ꆏꏓꏡꇬꎷꑴꇬ，ꊵꑵꈨꆏꋋꊭꀋꄉ；
ꋍꍈꊭꄉꄷꑲꑌ，ꉢꏮꊿꂗꍵꇇꁉꊭꌊꐺꌠꁵꌠꉬ。
15 ꆏꋚꇕꇗꑴꇬ，ꄚꋚꁧꆏꋋꎴꀋꊌ；
ꆏꏝꃴꀋꍰꎪꑴꇬ，ꄚꀋꍰꒀꒉꌌꅽꇭꀧꌎꅍꀋꊌ；
ꆏꑌꃀꌧꊈꄔꎪꑴꇬ，ꄚꑌꃀꌧꊈꎧꆏꋌꊊꅝꀋꄐꌠꉬ。
16 ꑞꃅꆏ，ꆎꆹꉣꆺꃰꃅꄰꏦꃤꈧꌠꌬ，
ꑸꉳꃰꃅꄰꃄꄟꑽꄟꈧꌠꈀꐥꃅꆏꇬꍪ，
ꋀꏂꇐꇫꇐꈧꌠꈴꄉꃅ；
ꑠꅹ，ꉡꆹꀋꎪꃅꆏꁳꐡꈥꅐꎻ，
ꅽꉹꁌꁳꊽꒊꅍꐛꎻ，
ꆍꊇꀋꎪꃅꌞꇩꏤꊿꂾꄉꎲꅐꁁꅐꌠꉬ。