ꑱꌝꆀꊿꒉꐙꆿꐛꀐ
7
1 ꉢꐤꐥꑭꀋꐥꀐ! ꉡꆹꃅꎸꄮꐰꌩꋚꇓꂷꑢꀜꌡ，ꉈꑴꑌꃀꌧꊈꀉꊂꑌꌡ，ꅝꉆꑠꀮꎹꀋꊌ，
ꀋꃨꂶꂷꂔꏜꉠꉌꂵꉪꅉꐛꑠꂷꑌꇬꀋꅑꀐ。
2 ꊿꀋꎪꀋꎙꌠꆹꃄꅉꇬꄉꈔꑍꀐ，
ꋧꃅꇬꊿꊒꆽꀕꑠꂷꇬꀋꐥꀐ；
ꋍꂷꋑꀋꋒꈛꄵꇬꀀꄉꊿꌉꊾꆳꐺ，
ꐱꂦꌊꄉꊨꏦꃺꑌꂦꐺ。
3 ꋀꇇꆹꄸꃅꅠꑽꉔꐯꉔ，
ꇛꌺꌋꆀꀞꇽꊿꐯꇯꃴꎆꃴꇁꇖ，
ꌅꌺꂾꌺꈧꌠꋀꉌꂵꏾꅍꄷꅠꌠꋀꉉꎼꇁ，
ꋀꊇꐮꈻꐯꎷꌌꏂꇫꐺ。
4 ꋀꈬꄔꈀꉾꀕꂶꌠꆹ，ꍲꁧꀕꀉꄂꌡ；
ꈀꊒꆽꀕꂶꌠꑌ，ꍲꉲꌩꏮꀉꄂꌡ。
ꅽꐏꁇꊿꈁꉉꋺꌠꌟꃅ，
ꏃꃅꌋꆎꇇꇩꍈꌠꃅꑍꇫꑟꇁꀐ，
ꆍꊇꀋꎪꃅꉌꃶꑓꋩꌊꈍꃅꇮꀋꐚꌠꉬ。
5 ꃷꇎꉘꄡꇉ，
ꐋꀨꉈꄡꊪ；
ꄷꀋꁧꅽꑮꃀꅽꂣꈐꇬꀀꂶꌠꏭꂯ，
ꅽꅇꂷꋓꉪꁨꄉꉉ。
6 ꑞꃅꆏ，ꌹꆹꀋꁧꉜꄸ，
ꀋꃋꇁꀋꃀꋥꑣ，
ꑮꃀꇁꀉꁧꄘꑣ；
ꊨꏦꑱꈐꊿꇁꊨꏦꁮꐚꐛ。
7 ꉢꑴꅉꃅꇬꆹ，ꑳꀊꊆꉘꇉꄉꐥ，
ꉡꈭꋏꌠꏃꃅꌋꂶꌠꇁꉚ；
ꉠꏃꃅꌋꆹꀋꎪꃅꉠꇖꅇꂟꅇꅲꌠꉬ。
ꑳꀊꊆꋍꉹꁌꈭꋏꇁ
8 ꉠꁮꉠꐚꈧꌠꀋ！ ꆍꊇꑠꃅꄡꇿ，
ꉢꃪꐛꇬꄚꑴꇬ，ꄓꇁꑴꌦꌠꉬ；
ꉢꆈꋧꋪꅉꑌꑴꇬ，
ꄚꑳꀊꊆꇁꉠꁨꑭꐛꌠꉬ。
9 ꉢꑳꀊꊆꏦꃤꐆꐛꅹ，
ꑳꀊꊆꇨꇅꃃꉡꊝꇬꉢꋰꄉꇬꎷ，
ꅑꅸꋌꉠꃆꑘꉉꇁ，
ꉠꎁꃅꑗꊨꈨꇚꇀꄮꇬꑟ。
ꋌꀋꎪꃅꉢꋌꏃꁤꇅꇄꅉꃹꄉ，
ꋍꑖꉬꉢꊌꂿꌠꉬ。
10 ꀊꋨꄮꇬꆏ，ꉠꁮꉠꐚꆹꋍꑠꋌꊌꂿꄉꑊꏦꎲꄏꏽꌠꉬ，
ꋌꉠꏯ：“ꑳꀊꊆ-ꅽꏃꃅꌋꇿꇬꐥ？”ꃅꉉꋺ。
ꋌꑗꉘꊝꌠꄇꇖꀕꃅꉢꂿꇁꌠꉬ，
ꀊꋨꄮꇬꆏ，ꋋꆹꀋꎪꃅꏦꈜꇬꑘꀨꌟꃅꊿꌌꄔꎪꌠꉬ。
11 ꅽꇓꈓꇓꉻꋈꀱꃅꑍꑠꑍꇫꑟꇁꌠꉬ！
ꀊꋨꄹꉇꆏ，ꅽꃅꋮꄹꌐꀊꐯꃅꄉꍔꆙꌠꉬ。
12 ꀊꋨꄹꉇꆏ，
ꊿꑸꎽꇩꏤꄉꇁ，
ꉞꏹꇩꏤꇓꈓꈧꌠꇬꄉꇁ，
ꉞꏹꄉꅑꅸꒀꃔꇁꄂꒊꃀꇬꑟꌠa，
ꎾꃝꋋꂷꄉꅑꅸꎾꃝꀊꋨꂷꑟꌠ，
ꁧꋋꂷꄉꅑꅸꁧꀊꋨꂷꑞꌠꃅꅽꄹꇁꌐꌠꉬ。
13 ꄚꑠꃅꑴꇬ，
ꉹꁌꀊꄶꀀꈧꌠꄸꃅꅠꑽꒉꄸꃅ，
ꃄꅉꋌꈚꆹꀋꎪꃅꈥꅐꀜꅐꌠꉬ。
ꑳꀊꊆꑱꌝꆀꎭꃅꉈ
14 ꆏꈀꎭꀕꃅꅽꄯꁯꌌꄉꅽꉹꁌꆫꇁ，
ꋀꊇꆹꅽꑌꑿ、ꅽꁨꇐꄉꇐꉬ；
ꋀꊇꀉꄂꀕꃅꌩꏪꇓꃴꐥ，
ꄚꋀꀊꈫꀊꇋꆏꃅꂂꃅꎔꇬꐙ，
ꋀꁳꀋꉊꂴꏭꌟꃅ，ꀠꎭꃅꄷꌋꆀꏸꆺꃅꄷꄉꋀꆫꋀꉘꌠꊌꎻꅊꇈ。
15 ꑳꀊꊆꆏ： “ꆍꊇꉞꏹꄉꅐꇁꄮꇬꌟꃅ，
ꉡꆹꀋꎪꃅꌤꇣꋲꌠꃅꋀꀦꌠꉬ”ꄷꉉ。
16 ꌞꇩꏤꈧꌠꋍꑠꋀꊌꂿꇬꆏ，
ꋀꊇꊋꃤꀉꒉꃅꑴꇬ，
ꄡꇗꑊꏦꌦꄉꏽ；
ꋀꊇꈍꃅꑌꇇꌌꈂꀸꉱ，
ꅳꀧꇉꁧꆘꅝꌠꉬ。
17 ꋀꊇꁮꏂꌟꃅꌦꏭꑽ，
ꃄꅉꇬꄉꈛꑀꌠꇘꇙꌡ，
ꑑꃹꏾꌌꀕꃅꋀꍆꈌꄉꅐꇁꌠꉬ；
ꋀꊇꀋꎪꃅꑳꀊꊆ-ꉪꏃꃅꌋꏦꇧꁠ，
ꆎꂿꇬꋀꐬꆠꌦꄉꏽꌠꉬ。
18 ꀉꁁꌦꌋꑞꂷꆏꌟꃅꑽꃤꄻꊿꏆꄎ？
ꑽꃤꋌꄻꋍꉹꁌꇫꋒꇈꈧꌠꏆꄐ？
ꋋꆹꐩꋊꐩꍂꃅꇨꇅꃃꇬꀋꎹ，
ꑞꃅꆏ，ꋌꀋꑍꀋꈤꌠꉂꐪꑌ。
19 ꆏꀋꎪꃅꀱꉈꑴꉪꎭꃅꉈꇁ，
ꉪꑽꃤꄸꃤꆏꄔꑭꁆꇂꃴꊐ，
ꉪꑽꃤꈀꐥꃅꄉꆏꍞꎾꃝꆈꃃꃆꅉꊐꌠꉬ。
20 ꆎꆹꀃꌋꀊꆨꆏꉪꁍꁈꏭꅇꏤꒃꄉꌠꇬꈴꄉ，
ꀋꎪꀋꎙꃅꑸꇱꊝ，
ꀋꑍꀋꈤꌠꉂꐪꑌꄉꑸꀨꇁꉳꊝꌠꉬ。