ꉳꀠꇵꈼꅇꂟꅇ
3
1 ꄚꐰꋋꈨꆹꌋꅇꄜꊿꉳꀠꇵꈼꅇꂟꅇꉬ，ꉌꎭꉙꃚꌊꄉꉙꌠꉬ。
2 ꑳꀊꊆꀋ！ ꅽꂓꅽꌗꉢꊌꈨꀐ；
ꑳꀊꊆꀋ！ ꅽꃅꐨꑽꑌꉢꋌꃪ。
ꆏꈀꎭꀕꃅꀕꋊꋋꋏꇬꄉꅽꂓꌗꌋꆀꃅꐨꑽꑌꁳꇫꅐꇁꎻꌦ，
ꃅꈎꋋꈍꑋꈓꇬꄉꄇꇖꀕꃅꇫꅐꇁꎻ。
ꆏꇨꇅꃃꄮꇬ，ꎭꃅꉇꑭꍈꑌꅊꇈ。
3 ꏃꃅꌋꆹꄝꂸꃅꄷꄉꇁ，
ꌃꎔꂶꌠꆹꀠꇂꉘꁌꄉꇁ。
ꋍꀑꒉꑊꒉꆹꂿꃅꈧꌠꉱꈴ，
ꋋꍗꋋꀴꃚꋒꃄꅉꇬꃅꐛꈴ。
4 ꋍꀑꑊꁨꑭꆹꈨꑭꌟꃅꏁꌬꀕ，
ꋍꇇꈐꇬꋍꊋꃤꑠꂁꇬꊎꄉ，
ꏁꇅꁨꇅꒉꌠꁨꑭꇫꅐꇁ。
5 ꃺꒌꆅꏂꋍꂾꐊ，
ꆄꁮꈺꁘꋍꊂꈹ。
6 ꋌꄓꇬꉆꆏ，ꃄꅉꃅꇙꈴ，
ꋌꏮꇬꉚꆏ，ꇩꏤꃅꇙꈧ。
ꁦꀮꐩꋊꃅꇫꋦꌠꐡꁧ，
ꁦꌺꐩꍂꃅꇬꐙꌠꉙꁧ。
ꋍꈭꇁꈛꏦꐩꋊꐩꍂꄻꀋꀱ。
7 ꇴꎭꃅꄷꁁꑳꊿꐆꐯꀋꉜa，
ꂰꄆꃅꄷꁁꑳꇙꈧꐺꑠꉢꊌꂿ。
8 ꑳꀊꊆꀋ！ ꆏꇨꇅꃃꒊꃀꊝꌠꉬꑴꅀ？
ꆏꇨꃃꅩꌬꀕꃅꒈꌺꊝꌠꉬꑴꅀ？
ꆏꃃꋩꅩꑳꀕꃅꎿꃀꊝꌠꉬꑴꅀ？
ꆏꅽꃆꀞꋩꐺ，
ꊋꐛꌠꌉꈿꍮꊪꄩꑌꐺ，
9 ꅽꉹꆏꀖꎼꇁꀐ，
ꅽꉈꆏꄵꄉꀐ，
ꒊꃀꌊꃄꅉꆏꁸꑍꄷꎭ。
10 ꁧꇂꇈꌺꆎꂿꑑꃹꏾꌌꀕ；
ꒈꅐꃪꂡꅶꁉꍤꁆꌩ，
ꆈꃃꃆꅉꂆꃚꇫꅐꇁ，
ꒈꂃꒊꆱꀏꀱꄩꆽꏽ。
11 ꅽꉈꁻꎼꇁꇬꏁꌬꀕ，
ꅽꐳꅝꎼꇁꇬꆗꐥꀕ，
ꉘꁮꆧꁨꄚꄉꆏꇬꅑ。
12 ꆏꇨꇅꃃꌊꃄꇖꄹꊂꆏꏮꈴ，
ꃃꋩꅩꑳꀕꃅꇩꏤꈧꌠꄔꎪꐺ。
13 ꆏꅐꉈꏭꄉꅽꉹꁌꈭꋏꇁ，
ꆏꌐꋉꄉꂶꌠꈭꋏꇁ；
ꊿꄸꑳꁭꆏꐆꆏꀘꇫꎭꌐ，
ꑳꇤꐴꑭꄇꇖꀕꃅꇬꁖꇁb，
14 ꋀꊇꆹꆲꏂꌟꃅꉪꋌꁏꂱꑱꅉꁊ，
ꀋꌋꀕꃅꎭꌠꅧꌠꋀꇣꋠꑠꉌꃹ。
ꄚꆎꆹꋍꐳꌊꋍꂽꑼꀂꏾꆏꉀꈴ。
15 ꆏꃅꋩꎾꃝꄔꈻꐺ，
ꎿꒉꄚꄉꀏꀱꄩꆽꏽ。
16 ꃚꋒꋋꈨꉢꊌꈨꇬꆏ，
ꉢꋌꇷꑑꃹꏾꌌꀕ，ꀑꑆꃺꎬꈠꍅ；
ꃷꅍꁯꐛꋃꐛ，
ꏾꌌꀕꃅꉆꅉꇬꉆ；
ꉢꌙꈈꀕꃅꉮꃤꇁꊿꉪꌉꉪꐆꇁꈧꌠꌸꌠꇁꉚ。
17 ꀋꃨꂷꅑꌩꁧꅿꁮꀋꅿ，
ꑌꃀꌧꊈꌩꁧꂶꂷꀋꅑ，
ꏝꃴꀋꍰꁦꁧꑣꅍꀋꊌ，
ꃄꅉꇬꋙꂷꇬꀋꅐ，
ꑿꉻꇬꑾꂷꇬꀋꀀ，
ꇌꉻꇬꇋꏢꇬꀋꉆ；
18 ꄚꑠꃅꑴꇬ，ꉡꆹꑳꀊꊆꐛꅹꃅꄉꉌꇿꑓꇿ，
ꉡꈭꋏꌠꏃꃅꌋꐛꅹꃅꄉꉌꃈꑓꌒ。
19 ꌋꑳꀊꊆꆹꉠꊋꃤꉬ，
ꋌꉠꑭꁘꁳꊴꃀꐜꅪꌟꃅꀥꐳꎻ，
ꉢꁳꈛꎼꀊꂥꅉꇬꏮꐺꄎꎻ。
ꑵꉙꋋꊱꏮꉙꑵꌟꒉꁵꄉ，ꁮꑟꃘꌺꇱꄉꑵꎽ。