ꌩꋚꇓꂷꃆꂮꐛꒌ
ꉡꆏꇬꏭ：“ꃅꎸꄮꐰꌩꋚꇓꂷꑠꈆꉢꊌꂿ”ꄷ。
ꑳꀊꊆꆏꉠꏯ：
“ꉢꉠꑱꌝꆀꉹꁌꇇꇩꍇꄮꑟꇁꀐ，
ꉢꈍꃅꑌꄻꋀꀋꏆꀐ。
3 ꀊꋨꄹꉇꆏ，ꃰꃅꑷꂿꇬꉙꃚꑵꃚꐈꇁꐒꃚꉨꃚꐛ；
ꇿꇬꑌꊿꂿꇓꁨꐛ，
ꆈꁨꇤꊭꀕꌠꉬ”ꄷ。
ꋍꑠꆹꑳꀊꊆꉉꌠꉬ。
ꏃꃅꌋꑱꌝꆀꊿꇇꇩꍈꇁ
4 ꆍꊇꊿꌢꎭꌟꁧꌠꄔꈻ、ꎬꅧꌠꁳꈔꑍꁧꎻꋋꈨ，
ꅇꂷꋍꑠꅲꄡꑟ！
5 ꆍꊇꑠꃅꉉ：“ꅂꀨꋩꑍꈍꄮꋩꌐꆏ，
ꉪꊇꈍꄮꋚꃵꒉꃵꉆ；
ꑬꆏꃅꑍꈍꄮꈳꅐꁧꆏ，
ꉪꊇꈍꄮꋚꂷꒉꂷꀖꄉꃷ；
ꂶꀧꄻꀄꊭꃅꄉꋚꈤꌞꊿꃷ，
ꋂꏣꏣꇓꄻꀉꒉꃅꄉꌞꄷꐎꃼ，
ꐈꋓꃅꋂꏣꈩꄉꌞꊿꋠ。
6 ꐎꂷꌊꊿꌢꎭꌠꁧꌠꃼꌊꇁ，
ꑬꅮꋓꌊꊿꎬꅧꌠꀠꌊꇁ，
ꋙꀜꄻꋚꂷꇬꇱꄉꃷꊿꁳ”ꄷ。
7 ꑳꀊꊆꆹꋍꂓꑸꇱꌌꈌꒉꅍꃅꄉꂶꌠꏭꄐꄉꑠꃅꅇꏤꒃ：
“ꋀꃅꐨꑽꄟꈀꐥꋋꈨꃅ，
ꐩꋊꐩꍂꃅꉢꎺꄉꇬꎷꌠꉬ。
8 ꃄꅉꆹꌤꋍꑠꒉꄸꃅꄉꃅꇙꄡꀋꑟꅀ？
ꉹꁌꄚꈁꀀꌠꃅꐒꊀꄡꀋꑟꅀ？
ꃄꇖꄹꊂꀋꎪꃅꆀꇊꒊꃀꌟꃅꒈꅐꇁꌐ，
ꉞꏹꒊꃀꌟꃅꒈꅐꌦꒉꌤꌦꃅꇬꎷ。
9 ꀊꋨꄹꉇꑞꄮꇬꆏ，
ꉡꆹꉘꁮꁳꂵꆪꈨꌬꀕꃅꈞꆈꃹꁧꎻ，
ꃄꄸꋋꈚꁳꂵꆪꑍꁖꁙꇬꆈꋧꋪꎻ。
ꋍꑠꆹꑳꀊꊆꉉꌠꉬ。
10 ꉢꆍꋨꏦꃅꑍꁳꐈꇁꐒꊀꃅꑍꐛꎻ，
ꆍꉙꇐꑵꇐꈀꐥꌠꃅꐈꇁꌦꏷꉙꇐꐛ；
ꉢꆍꉹꁌꋍꏅꁳꐧꊭꇬꃆꁁꉊꅑꎻ，
ꀂꏾꐑꀎꅗꃅꄉꎻ；
ꆍꁳꌺꄂꆜꌠꌟꃅꐒꊀꎽ，
ꋍꌐꂫꆹꐒꆅꃅꑍꑠꑍꌡ。
11 ꇬꉚꄉ！ ꃅꑍꇫꑟꇁꂯꄉꀐ，
ꉢꀋꎪꃅꃱꉩꄸꌋꁳꇁꃄꅉꇬꌸꎻ；
ꊿꀄꂳꀄꈠꌠꆹꁡꁠꀋꊌꒉꄸꀋꉬ，
ꊿꈌꃶꒉꌤꌠꆹꀆꐒꀋꊌꒉꄷꀋꉬ，
ꋋꆹꑳꀊꊆꅇꂷꀋꅲꒉꄸ。
ꋍꑠꆹꌋꑳꀊꊆꉉꌠꉬ。
12 ꋀꊇꄁꃰꐺ，ꎾꃝꋋꂷꇬꄉꄁꃰꅷꎾꃝꀊꋨꂷꇬꑟ，
ꒈꀑꄉꄁꃰꅷꁭꅐꑟ；ꀱꒉꀱꇁꃅꇬꀥꐺ，
ꑳꀊꊆꅇꂷꎹꐺꇬꎷ，ꄚꋀꋌꎷꀋꊌ。
13 ꀊꋨꄹꉇꆏ，ꑮꆜꅪꎔꌋꆀꌠꆗꌺꄿꑠꀋꎪꃅ
ꈌꃶꒉꌤꄉꀑꃀꑓꏂꋩꌠꉬ。
14 ꊿꌒꂷꆀꑸꃅꄷꑸꏃꂷꌦꀋꃋꌋꀋꃋꏭꄐꄉ
ꅇꏤꒃꈧꌠꑠꃅꉉ：
‘ꄊꇓꈓꀋ！ ꉪꊇꅽꌦꌋꈧꌠꏭꄐꄉꅇꏤꒃ，
ꅀꀙꏂꀠꌦꌋꈧꌠꏭꄐꄉꅇꏤꒃ’ꄷ。
ꊿꋋꈨꆹꀋꎪꃅꐚꇬꄚ，
ꐩꋊꐩꍂꃅꄓꇁꀋꄐꀐꌠꉬ”ꄷ。