ꑳꀊꊆꑱꌝꆀꊿꀞꇽꇁ
9
1 ꌋꂶꌠꆦꑝꅉꏢꁮꉆꌠꉢꊌꂿ，ꋌꑠꃅꉉ：“ꌷꁧꀂꏾꅥꄉ，ꀃꈈꃀꄳꁳꇙꈧꎻ，
ꌷꁧꅥꆸꐔꄉ，ꇁꉹꁌꋍꏅꀂꏾꍑꎻ，
ꊿꇫꋒꇈꈧꌠꑌ，ꀋꎪꃅꂗꍵꌊꉢꌉꇫꎭꌐ；
ꆶꁧꄎꌠꀋꐥ，ꋍꂷꂯꆶꁧꀋꄐ。
2 ꋀꊇꃅꐬꅤꄉꆶꌦꊿꐤꅉꃹꁧꄷꑲꑌ，
ꀋꎪꃅꀊꄶꇬꄉꉢꈻꀍꉀꎼꇁ；
ꋀꅂꂿꃅꃹꁧꄷꑲꑌ，
ꀋꎪꃅꀊꄶꇬꄉꉢꈻꀁꋌꎼꇁ；
3 ꋀꊇꆈꏦꂱꉘꁌꀀꄷꑲꑌ，
ꀋꎪꃅꀊꄶꇬꄉꉢꎹꉢꒃꌊꇁ；
ꋀꊇꉡꐞꌊꂁꎿꉱꀀꁧꄷꑲꑌ，
ꉢꀋꎪꃅꅇꁵꄉꒈꁮꏂꁳꋀꄵꒉꎻ；
4 ꋀꊇꁮꐚꇱꁮꌊꁧꄷꑲꑌ，
ꀋꎪꃅꀊꄶꇬꄉꂗꍵꌊꋀꉢꌉꇫꎭ；
ꉢꑓꌬꃅꍻꋀꁳꄉꇬꎷ，
ꋀꁳꌒꃤꊌꀋꎽꃅ，ꉮꃤꌸꎻ”ꄷ。
5 ꄙꀕꃪꀕꂽꑼꌊꁈꑳꀊꊆꐛꃄꅉꊼꇅꄀꄷꆏ，
ꃄꅉꐯꁧ，
ꃄꅉꇬꈁꀀꌠꃅꀋꎪꃅꉌꐒꇁꎭꌠꉬ；
ꃄꇖꄹꊂꀋꎪꃅꆀꇊꒊꃀꌟꃅꒈꅐꇁ，
ꉞꏹꒊꃀꌟꃅꒈꅐꌦꒉꌤꌦꃅꇬꎷ。
6 ꋋꆹꂿꃅꇬꄉꑷꂿꋉ，
ꃄꅉꇬꄉꃅꃴꃅꑆꋌꄖꄉ，
ꎿꒉꋌꇴꋌꍝꌊꄉ，ꉷꃄꅉꇬꎭꇁꎻ，
ꑳꀊꊆꆹꋍꂓꉬ。
7 ꑳꀊꊆꑠꃅꉉ：“ꑱꌝꆀꊿꀋ！
ꉢꉜꇬ，ꆍꊇꆹꇴꏃꊿꌋꆀꐯꌟ。
ꑱꌝꆀꊿꉞꏹꄉꉢꏃꅐꇁ，
ꃏꆺꌧꊿꑌꏦꃏꄫꄉꉢꏃꅐꇁ，
ꑸꇂꊿꑌꏣꇓꄉꉢꏃꅐꇁꌠꀋꉬꅀ？
8 ꇬꉚ！ꌋꑳꀊꊆꑓꋪꆹꍻꇩꏤꑽꃤꐥꋋꂷꀵꄉ，
ꇩꏤꋋꂷꃄꅉꇬꄉꋌꈔꋏꇫꎭꌠꉬ，
ꄚꑸꇱꄰꑭꊂꃅꈔꋏꇫꎭꌐꌠꀋꉬ”ꄷ。
ꋍꑠꆹꑳꀊꊆꉉꌠꉬ。
9 ꇬꉚ！ ꉢꀋꎪꃅꅇꁵꄉ，
ꀊꏢꌊꋙꏢꌠꌟꃅ，
ꇩꏤꈀꐥꌠꈬꄔꄉꑱꌝꆀꄰꉢꌌꏢ，
ꇓꎓꌹꂷꁳꊰꃄꅉꇬꈿꀋꎽꌠꉬ。
10 ꉠꉹꁌꈬꄔꇬꑽꃤꐆꈧꌠꆹ
‘ꉮꃤꈍꃅꑌꉪꌶꀋꇁ，ꈍꃅꑌꉪꃕꀋꇁ’ꃅꉉ，
ꊿꋋꈨꆹꈀꐥꃅꂗꍵꑱꃀꇂꃴꌦꌐꌠꉬ。
ꑱꌝꆀꊁꇁꋍꑍꀱꌄꆣꇁ
11 ꀊꋨꄹꉇꆏ，ꉢꀋꎪꃅꄊꃥꁁꑳꐡꀐꂶꌠꋈꀱ，
ꎒꈌꐠꈌꈧꌠꋍꑕ；
ꉢꀋꎪꃅꀜꐡꆿꐡꈧꌠꋈꀱꇁ，
ꋈꀱꌊꀋꉊꂴꌡꃅꄉ。
12 ꑱꌝꆀꊿꁳꑱꄏꃅꄷꊿꇫꋒꇈꈧꌠꌋꆀꇩꏤꉠꂓꄜꄉ
ꉠꇂꃴꈀꐥꇁꈧꌠꄩꏲꂠꎽ。
ꋍꑠꆹꑳꀊꊆꉉꌠ，ꋌꀋꎪꃅꌤꋋꈨꃅꌠꉬ。
13 ꇬꉚꄉ！ ꃅꑍꑟꇁꂯꄉꀐ，
ꋙꎴꒈꏢꅷꋙꊪꒉꏽꄮꇬꑟ，
ꑌꃀꌧꊈꄔꎪꅷꊩꄮꏿꄮꑟ；
ꁦꀑꎧꒉꐔꌠꊰꌠꉬ，
ꂋꇁꁦꀮꌺꄩꉱꌠꉬ。
ꋍꑠꆹꑳꀊꊆꉉꌠꉬ。
14 ꉢꑱꌝꆀꉹꁌꌞꊿꁮꌊꁧꈧꌠꁳꀱꉈꑴꇁꎻ；
ꋀꊇꀋꎪꃅꇓꈓꈥꅐꀜꅐꈧꌠꋈꀱꄉꀊꄶꀀꇁ；
ꑌꃀꌧꊈꏩꏪꊪꄉ，ꑌꃀꌧꊈꌌꎧꋏꅝ，
ꌩꋚꇓꂷꄻꉻꈫꊪꄉ，ꌩꋚꇓꂷꑢꋠ。
15 ꉢꋀꁳꋀꊨꏦꃅꄷꋦꎻ，
ꋀꊇꋌꊂꆏꈍꃅꑌꃄꅉꉢꄻꋀꇖꈚꌠꇬꄉ
ꌞꊿꇱꐴꍠꇬꀋꎭꀐ”ꄷ。
ꋍꑠꆹꑳꀊꊆ-ꅽꏃꃅꌋꉉꌠꉬ。