ꑭꄂꏦꃰꃅꑱꆀꂱꏭꋍꎁꃅꇖꂟꄷ
37
1 ꒀꑭꑸꄰꌺꑭꄂꏦꆹꒀꑸꏠꄰꌺꇰꆀꑸꎃꊐꄉꒀꄊꃰꃅꄻꀐ，ꑞꃅꆏ，ꀠꀘꇍꃰꃅꆀꀯꏧꆀꌒꋌꁳꒀꄊꃰꃅꄻꎻ。 2 ꄚꑭꄂꏦ、ꋍꇛꌺꈧꌠꌋꆀꀊꄶꇬꉹꁌꈧꌠꆹꑳꀊꊆꅇꂷꌋꅇꄜꊿꑱꆀꂱꇇꄧꈴꄉꈁꉉꌠꅲꀋꅲ。3 ꑭꄂꏦꃰꃅꆏꏂꆺꂰꑸꄰꌺꒀꏧꌋꆀꂷꑭꑸꄰꌺꆦꑝꊿꑭꃓꑸꑋꋌꁆꌌꌋꅇꄜꊿꑱꆀꂱꂿꒉꎻꇈ，ꇬꏭ：“ꆏꈀꎭꀕꃅꉪꎁꃅꄉꑳꀊꊆ-ꉪꏃꃅꌋꏭꇖꂟ”ꄷ。 4 ꀊꋨꄮꇬ，ꑱꆀꂱꆹꈏꃹꉇꅐꃅꉹꁌꈬꄔꐺꉆ，ꑞꃅꆏ，ꋌꋀꒃꏦꑳꇬꀋꊐꑴꌦ。 5 ꉞꏹꃰꃅꂽꁥꌠꉞꏹꄉꇽꎼꇁꀐ；ꋍꑠꏦꇍꄂꊿꑳꇊꌒꇌꇓꈓꇊꌉꐺꈧꌠꈨꇬꆏ，ꋀꊇꑳꇊꌒꇌꇓꈓꄉꎞꉈꑴꁧꀐ。
6 ꑳꀊꊆꅇꂷꇁꌊꌋꅇꄜꊿꑱꆀꂱꄷꑟꇈ，ꇬꏭ： 7 “ꑳꀊꊆ-ꑱꌝꆀꏃꃅꌋꑠꃅꉉ： ‘ꆍꊇꑴꌠꆍꋌꁆꌌꉠꏯꇖꂟꇁꌠꒀꄊꃰꃅꂶꌠꏭꉉꒉ，ꇬꉚꄉꅊꇈ！ ꉞꏹꃰꃅꂽꆍꇇꀤꇁꈧꌠꆹꀋꎪꃅꋀꀱꉞꏹꁧꌠꉬ。 8 ꄚꄉ，ꏦꇍꄂꂽꀱꉈꑴꇓꈓꋋꂷꌉꇁꇈ，ꇓꈓꂶꌠꋀꇑꅜꄉ，ꃆꄔꌌꋀꐗꇫꎭꌠꉬ’ꄷ。 9 ꑳꀊꊆꉈꑴꑠꃅꉉ： ꆍꊇꊨꏦꈱꊨꏦꊏꄉ，‘ꏦꇍꄂꂽꀋꎪꃅꉪꐞꁧꌠꉬ’ꃅꄡꉉ，ꑞꃅꆏ，ꏦꇍꄂꂽꆹꈍꃅꑌꆍꐞꀋꁧ。 10 ꏦꇍꄂꂽꋌꁥꃅꄉꆍꌉꇧꁠꌐꄷꑲꑌ，ꋀꂽꑼꂷꊂꌸꀋꌦꃅꇫꋒꇈꈧꌠꆹꈍꃅꑌꊨꏦꍆꑳꇬꄉ，ꄓꌊꇓꈓꋋꂷꋀꐗꇫꎭꌠꉬ”ꄷ。
ꑱꆀꂱꊿꒃꏦꑳꇬꈢ
11 ꏦꇍꄂꂽꈧꌠꉞꏹꃰꃅꂽꈧꌠꏦꐛꅹꑳꇊꌒꇌꄉꎞꉈꑴꁧꄮꇬ， 12 ꑱꆀꂱꆹꑳꇊꌒꇌꀋꐥꃅꀝꑷꂱꃅꄷꉜꄉꁧꇈ，ꀊꄶꇬꋊꃤꈧꌠꈬꄔꄉꁍꑗꄉꈁꋍꃤꁦꌠꁸꆹ。 13 ꑱꆀꂱꇁꌊꀝꑷꂱꄇꂿꄷꁬꌠꑞꄮꇬꆏ，ꉳꇂꆀꑸꇖꑳ、ꏃꆀꂰꑸꄰꌺꑲꅿꑸꈿꌬꌟꒉꂶꌠꑱꆀꂱꋌꒃꄉꇈ，ꇬꏭ：“ꆏꏦꇍꄂꊿꐋꁧꏢꉨꀒ！”ꄷ。 14 ꑱꆀꂱꆏꇬꏭ：“ꀊ！ꆏꈱꅇꏅꅇꑠꄡꉉ！ ꉢꏦꇍꄂꊿꐋꁧꌠꀋꉬ”ꄷ。 ꄚꑲꅿꑸꆹꑱꆀꂱꅇꂷꅲꀋꅲꃅꄉ，ꑱꆀꂱꋌꒃꌊꌟꒉꌠꂾꈧꌠꄷꁧꀐ。 15 ꌟꒉꌠꂾꈧꌠꑱꆀꂱꂿꇬꋀꇨꇅꃃꄉ，ꑱꆀꂱꋀꌌꅥꄁꇈ，ꋀꈢꄹꏦꂘꃀꒀꇂꄉꑳꂶꌠꇬꊐꄉ，ꑞꃅꆏ，ꑳꋋꂷꋀꄻꏦꑳꃅꄉꀐ。
ꑱꆀꂱꆏꇬꏭ：“ꐥ！ ꆏꀋꎪꃅꊿꇱꏮꀠꀘꇍꃰꃅꇇꈐꊐꌠꉬ”ꄷ。 18 ꑱꆀꂱꉈꑴꇬꏭ：“ꉢꃅꑽꏿꑽꆎꊝꅀ、ꅽꇛꌺꈧꌠꊝꅀ、ꅽꉹꁌꈧꌠꊝꌠꉥ，ꆍꊇꉢꋋꂷꒃꏦꑳꇬꈢꌠꉬ？ 19 ꌋꅇꄜꊿꅽꏯ‘ꀠꀘꇍꊿꈍꃅꑌꃅꄷꋌꈚꌉꀋꇁ’ꃅꉉꋺꈧꌠꀋꃅꇿꇬꐥ？ 20 ꉠꌌꁈꉠꃰꃅꀋ！ ꆏꀋꃅꈀꎭꀕꃅꉠꅇꊼꇅꅲ，ꆏꈌꁧꄉꉢꁳꅽꂾꄉꇖꂟꎻꅊꇈ，ꉢꏁꉈꑴꄹꏦꂘꃀꒀꇂꄉꑳꂶꌠꇬꊐꄡꁧꀐ，ꉢꌦꀊꄶꇬꎍꁧꂵ”ꄷ。
21 ꄚꄉ，ꑭꄂꏦꃰꃅꆹꅇꁵꄉꑱꆀꂱꋌꈢꐏꁇꂽꑼꐷꈭꇬꊐꄉꇈ，ꋍꑍꋑꀋꋒꊿꁆꌌꎬꁱꃷꅉꏦꈜꇬꄉꎬꁱꂷꒃꌊꇫꍈꇁꇬꎷ，ꅑꅸꇓꈓꇬꎬꁱꂷꎹꅉꀋꊌꄮꇬꑟ。ꑱꆀꂱꆹꑠꃅꊿꈢꐏꁇꂽꑼꐷꈭꇬꊐꄉ。