ꑱꆀꂱꊿꍞꒉꇸꇉꇬꊐ
38
1 ꂷꄤꄰꌺꏃꃓꄝꑸ、ꀠꏂꃚꇙꄰꌺꏸꄊꆀ、ꏂꆺꂰꑸꄰꌺꒀꏧ、ꂷꏸꑸꄰꌺꀠꏂꃛꇓꏤꈧꌠꆏ，ꑱꆀꂱꉹꁌꏭꅇꂷꑠꃅꉉꌠꋀꊌꈨ： 2 “ꑳꀊꊆꑠꃅꉉ：‘ꉹꁌꄚꇓꈓꇬꐥꇈꈧꌠꆹꀋꎪꃅꂗꍵꑱꃀ、ꃱꉩꄸꌋ、ꆄꁮꈺꁘꑠꇱꈔꋏꇫꎭꌠꉬ，ꄚꊿꈌꊰꄉꅐꉈꏭꏦꇍꄂꊿꐊꁧꈧꌠꆏꀋꎪꃅꇫꐥꄎ，ꀋꎪꃅꊨꏦꀑꇬꀧꌋꃅꄉꐥꄎꌠꉬ’ꄷ。 3 ꑳꀊꊆꑠꃅꉉ：‘ꇓꈓꋋꂷꆹꀋꎪꃅꇁꀠꀙꇍꃰꃅꂽꑼꇇꈐꃹ，ꀋꎪꃅꀠꀘꇍꃰꃅꇑꅜꌠꉬ’ꄷ”ꄷ。4 ꄚꄉ，ꌟꒉꌠꂾꈧꌠꆏꃰꃅꏭ：“ꃰꃅꀋ！ ꆏꈀꎭꀕꃅꊿꋋꂷꌉꇫꎭ，ꑞꃅꆏ，ꋋꆹꂽꑼꌋꆀꉹꁌꇓꈓꇬꋒꇈꈧꌠꏭꅇꂷꑠꉉꄉ，ꋀꁳꑭꇇꊋꀋꑌꎻ。ꊿꋋꂷꉹꁌꎁꃅꋬꂻꀋꇖꃅ，ꀱꌊꋀꁳꉮꃤꌸꎻ”ꄷ。
5 ꑭꄂꏦꃰꃅꆏꋀꏭ：“ꋌꆍꇇꈐꇬꀀ，ꆍꊇꌌꈍꃅꄿꂿ，ꉢꆍꀋꏢꀋꇍ”ꄷ。 6 ꄚꄉ，ꑱꆀꂱꋀꒃꌊꄉꋀꍞꃰꃅꌺꂷꏸꑸꃤꒉꇸꇉꂶꌠꇬꊐꒉ，ꒉꇸꇉꂶꌠꆏꐏꁇꂽꑼꐷꈭꇬꐛ；ꋀꊇꆹꏦꀨꏢꌊꑱꆀꂱꋀꎿꀁꋌꊐ，ꒉꇸꇉꂶꌠꀆꐒꇬꀋꀀ，ꑘꀨꀉꄂꀀꄉ，ꑱꆀꂱꉙꑘꀨꇬꊐꀐ。
7 ꀊꋨꄮꇬ，ꃰꃅꆹꀝꑸꂱꄇꂿꁬꌠꏢꁮꇬꑌ，ꃰꃅꑷꂿꇬꐥꌠꇴꏃꊿꑱꀨ.ꂰꇍꂶꌠꑱꆀꂱꋀꇱꍞꒉꇸꇉꇬꊐꀐꃅꑠꋌꈨꇬꆏ， 8 ꃰꃅꑷꂿꇬꄉꁖꇁꇈ，ꃰꃅꏭ： 9 “ꉠꌌꁈꉠꃰꃅꀋ！ ꊿꋋꈨꀋꂄꆈꒉꀕꃅꌋꅇꄜꊿꑱꆀꂱꊝꄉ，ꑱꆀꂱꋀꍞꒉꇸꇉꇬꊐꀐ；ꋋꆹꈍꃅꑌꀊꄶꇬꄉꂮꐚꌦꇁꀐꌠꄹ，ꑞꃅꆏ，ꇓꈓꇬꋚꀋꐥꀐ”ꄷ。
10 ꃰꃅꆏꇴꏃꊿꑱꀨ.ꂰꇍꏭ：“ꆏꄚꇬꄉꊿꌕꊰꑹꏃꁨꒉ，ꑱꆀꂱꀋꌦꑴꌦꇯꆐ，ꒉꇸꇉꇬꄉꈻꀍꉀꎼꇁ”ꄷ。
11 ꄚꄉ，ꑱꀨ.ꂰꇍꆏꊾꈨꋌꏃꃰꃅꑷꂿꈴꇈ，ꇁꌊꎆꋚꄉꑳꇂꃴꑳꑠꁨꇬꄉꑸꀬꈨꌋꆀꃢꈜꀉꁘꈨꋌꒃꌊ，ꄻꏦꀨꇬꒆꄉꎿꒉꇸꇉꇬꑱꆀꂱꄷꎼꒉꀐ。 12 ꇴꏃꊿꑱꀨ.ꂰꇍꆏꑱꆀꂱꏭ：“ꆏꑸꀬꋋꈨꌋꆀꃢꈜꀉꁘꋋꈨꄝꏦꀨꇬꄀꄉ，ꄻꅽꀄꃹꇂꃴꆏ”ꄷ。 13 ꑠꃅꄉ，ꏦꀨꌊꒉꇸꇉꇬꄉꑱꆀꂱꋀꈻꀍꉀꎼꇁꀐ。ꑱꆀꂱꆹꄡꇗꐏꁇꂽꑼꐷꈭꇬꐥꑴꌦ。
ꑭꄂꏦꃰꃅꂁꄉꑱꆀꂱꏭꅇꂷꅲ
14 ꑭꄂꏦꃰꃅꆹꊿꋌꁆꌌꌋꅇꄜꊿꑱꆀꂱꏃꑳꀊꊆꑷꂿꇬꀃꈈꌕꁬꀕꌠꈴꄉꋍꄷꇁꎻ。ꃰꃅꆏꑱꆀꂱꏭ：“ꉢꅽꏯꌤꐘꅲ，ꆏꋍꍈꂯꉢꃀꂁꄉꀋꉆ”ꄷ。
15 ꑱꆀꂱꆏꑭꄂꏦꏭ：“ꀋꄸꄷꉢꉉꆎꇰꑲꆏ，ꉢꆏꌉꇬꀋꎭꌦꅀ？ ꈍꃅꋭꌠꉢꉉꆎꇰꄷꑲꑌ，ꆏꉠꅇꃅꀋꅲꌠ”ꄷ。
16 ꑭꄂꏦꃰꃅꆏꀋꌋꀕꃅꑱꆀꂱꏭ：“ꉢꀑꇬꄻꉪꁳꌠꐩꋊꐩꍂꃅꇫꐥꌠꑳꀊꊆꏭꄐꄉꅇꏤꒃ： ꉢꈍꃅꑌꆏꀋꌉ，ꆎꏮꊿꅽꀑꇬꒃꐺꈧꌠꇇꈐꑌꀋꊐꌠꉬ”ꄷ。
17 ꑱꆀꂱꆏꑭꄂꏦꏭ：“ꑳꀊꊆ-ꄙꀕꃪꀕꉬꉎꂽꑼꌊꁈ、ꑱꌝꆀꏃꃅꌋꑠꃅꉉ：‘ꀋꄸꄷꆏꅐꉈꏭꄉꀠꀘꇍꃰꃅꂽꏃꌊꁈꈧꌠꏭꈌꊰꒉꑲꆏ，ꅽꀑꇬꆹꈍꃅꑌꀋꆺ，ꇓꈓꋋꂷꑌꈍꃅꑌꊿꐗꇬꀋꎭ，ꆎꌋꆀꅽꑭꊂꑌꀋꎪꃅꇫꐥꄎꌠꉬ。 18 ꀋꄸꄷꆏꀠꀙꇍꃰꃅꂽꏃꌊꁈꈧꌠꏭꈌꊰꀋꒉꑲꆏ，ꇓꈓꋋꂷꆹꀋꎪꃅꇁꏦꇍꄂꊿꇇꈐꃹꄉ，ꃆꄔꌊꋀꐗꇫꎭꌠꉬ，ꆎꑌꋀꇇꈐꆶꀋꄐꌠꉬ’ꄷ”ꄷ。
19 ꑭꄂꏦꃰꃅꆏꑱꆀꂱꏭ：“ꉢꒀꄊꊿꏦꇍꄂꂽꏯꈌꊰꒉꀐꈧꌠꏦ，ꉢꈍꃅꑌꏦꇍꄂꂽꇱꏮꒀꄊꊿꈧꌠꇇꈐꊐꄉ，ꋀꌌꈁꏾꃅꒊꈧꏭꐛ”ꄷ。
20 ꑱꆀꂱꆏꇬꏭ：“ꏦꇍꄂꊿꆹꈍꃅꑌꆏꋀꏮꒀꄊꊿꀋꁵꌠꄹ，ꆏꈀꎭꀕꃅꑳꀊꊆꅇꂷꉠꇇꄧꈴꄉꉉꈧꌠꅲ，ꑠꃅꑲꆏ，ꅽꇬꈲꏣꐥ，ꅽꀑꇬꑌꀋꎪꃅꀋꆺꌠꉬ。 21 ꀋꄸꄷꆏꋀꏭꈌꊰꀋꅲꌠꆹꉬꑲꆏ，ꑳꀊꊆꑠꃅꉠꏯꉉꄉꀐ： 22 ꇬꉚꄉꅊꇈ！ ꒀꄊꃰꃅꑷꂿꇬꋒꇈꌠꌋꅪꈧꌠꃅꊿꏃꀠꀙꇍꃰꃅꑷꂿꇬꇛꌺꈧꌠꄷꁧꌐꌠꉬ。ꌋꅪꋋꈨꆹꑠꃅꉉ：
‘ꐋꀨꅽꉌꂵꇬꇯꌠꆎꊏꇁ，
ꆏꋀꇱꊏꅜ；
ꅽꏸꑭꉔꇁꑘꀨꈬꇬꃹ，
ꄚꋀꊇꆹꆏꋀꇤꇫꎭ’ꄷ。
23 ꅽꑮꃀꈧꌠꌋꆀꅽꀊꃋꈧꌠꆹꀋꎪꃅꊿꏃꏦꇍꄂꊿꄷꁧ；ꆎꑌꀋꎪꃅꋀꇇꈐꆶꁧꀋꄐꃅ，ꀠꀙꇍꃰꃅꇱꒃꅜ；ꇓꈓꋋꂷꑌꀋꎪꃅꃆꄔꌊꊿꐗꇫꎭꌠꉬ”ꄷ。
24 ꑭꄂꏦꆏꑱꆀꂱꏭ：“ꉣꑊꅇꂷꋋꈨꊿꁳꅉꐚꄡꎽ，ꑠꀋꉬꑲꆏ，ꅽꀑꇬꄚꄉꆺꌠꉬ。 25 ꀋꄸꄷꇛꌺꈧꌠꉢꅽꏯꅇꉉꌠꋀꈨꄉ，ꇁꌊꅽꏯ：‘ꉉꉪꇰ，ꆏꃰꃅꏭꑞꉉ，ꃰꃅꅽꏯꑞꄹꌠꉉꎼꇁ，ꉪꂾꂁꀋꉆ，ꑠꀋꉬꑲꆏ，ꆏꉪꌉꇫꎭꌠꉬ’ꃅꅲꇁꑲꆏ， 26 ꆏꑴꌠꋀꏭ：‘ꉢꃰꃅꏭꇖꂟꄉꉡꎭꌊꒀꇂꄉꑳꂶꌠꇬꊐꄡꁧ，ꉢꌦꀊꄶꎍꁧꂵ’ꄷꉉ”ꄷ。