ꑱꆀꂱꄯꒉ 36

ꀠꇊꑳꀊꊆꑷꂿꇬꄉꄯꒉꎭꆱꀘꊾꇰ

1 ꒀꑭꑸꄰꌺꒀꑸꏠꂶꌠꒀꄊꃰꃅꄻꇖꈎꐛꄻꈎꌠ，ꑳꀊꊆꅇꂷꇁꌊꑱꆀꂱꄷꑟꄉ，ꇬꏭ： 2 “ꆏꄯꒉꎭꆱꋐꒃꌊꄉ，ꒀꑭꑸꒀꄊꇩꏤꃰꃅꄺꄮꇬꄉꅑꅸꀃꑍꑟꌠ，ꑱꌝꆀ、ꒀꄊꌋꆀꇩꏤꈀꐥꌠꃆꂮꅇꂷꉢꅽꏯꈁꉉꈧꌠꁱꇬꄀꄉꌐ。 3 ꒀꄊꇩꏤꉹꁌꈧꌠꆹꉢꉮꃤꄻꋀꌶꇁꎻꂿꄷꃅꑠꋀꈨꄉ，ꋍꂷꋑꀋꋒꄺꀱꂠꀱꌊꑽꈜꄸꈜꀋꍬꃅꐞꇁꇬꌬꀋꄿ，ꑠꃅꇬꆹ，ꋀꃅꑽꏿꑽꅍꌋꆀꑽꃤꉢꄻꋀꏆꌠꉬ”ꄷ。

4 ꑠꃅꄉ，ꑱꆀꂱꆹꆀꆺꑸꄰꌺꀠꇊꂶꌠꋌꇴꌊꇁꀐ。ꀠꇊꆏꑳꀊꊆꅇꂷꑱꆀꂱꏭꈁꉉꈧꌠꃅꋌꁱꄯꒉꎭꆱꇬꄀꄉꌐ。 5 ꑱꆀꂱꆏꀠꇊꏭ：“ꉢꊿꄝꑳꀊꊆꑷꂿꇬꆹꀋꎽꀐ。 6 ꑠꅹ，ꃅꑍꋚꈻꄹꉇꌠꆏ，ꆏꆹꌊꑳꀊꊆꑷꂿꇬꄉ，ꑳꀊꊆꅇꂷꉠꈌꇬꈴꄉꆏꁱꄯꒉꎭꆱꇬꄀꄉꈧꌠꀘꉹꁌꌋꆀꇓꈓꈧꌠꇬꄉꇁꌠꒀꄊꊿꇰ。 7 ꑠꃅꑲꆏ，ꋀꊇꈧꊰꀕꃅꑳꀊꊆꏭꇖꂟꇁꇈ，ꋍꂷꋑꀋꋒꄺꀱꂠꀱꌊꑽꈜꄸꈜꀋꍬꃅꐞꇁꇬꌬꀋꄿ，ꑞꃅꆏ，ꑳꀊꊆꆹꋌꇨꇅꃃꅩꌬꀕꃅꉹꁌꋋꈨꊝꑴꄷꉉꀐ。 8 ꆀꆺꑸꄰꌺꀠꇊꆏꑱꆀꂱꈁꉉꌠꈴꄉꃅ，ꑳꀊꊆꑷꂿꇬꄉꑳꀊꊆꅇꂷꁱꄯꒉꎭꆱꇬꄀꄉꈧꌠꋌꀘꊾꇰꀐ。

9 ꒀꑭꑸꄰꌺꒀꑸꏠꒀꄊꇩꏤꃰꃅꄻꉬꈎꐛꄹꈎꈬꆪꀕꌠꆏ，ꑳꇊꌒꇌꉹꁌꌋꆀꒀꄊꃅꄷꇓꈓꈧꌠꇬꄉꑳꇊꌒꇌꇁꌠꉹꁌꈧꌠꃅ，ꑳꀊꊆꂾꄉꋚꈻꄷꄜꉺꌐ。 10 ꑠꃅꄉ，ꀠꇊꆹꌊꎭꃓꄰꌺꄹꏦꂘꃀꏸꂷꆀꑸꑳꁨꌠꇬꄉ，ꄯꒉꎭꆱꇬꅑꌠꑱꆀꂱꅇꂷꈧꌠꋌꀘꉹꁌꋍꏅꇰ，ꑳꋋꁨꆹꑳꀊꊆꑷꂿꐷꈭꉎꈚꌠꇬꐛ，ꀃꈈꀊꏀꄷꐫꌠꃹꆹꈌꇬꊫꎍ。

11 ꎭꃓꇖꑳ、ꏸꂷꆀꑸꄰꌺꂰꇠꑸꆏꄯꒉꎭꆱꇬꑳꀊꊆꅇꂷꈧꌠꈀꐥꃅꋌꊌꈨꇈ， 12 ꋌꒉꌊꃰꃅꑷꂿꇛꌺꂶꌠꑳꁨꌠꇬꑟꇬꆏ，ꌟꒉꌠꂾꈧꌠꈀꐥꃅꀊꄶꇬꑌꌐꅊꇈ，ꄹꏦꂘꃀꑱꆀꎭꂸ、ꏃꂷꑸꄰꌺꄃꆾꑸ、ꑸꇱꀧꄰꌺꑱꆀꇂꄉ、ꎭꃓꄰꌺꏸꂷꆀꑸ、ꉳꇂꆀꑸꄰꌺꑭꄂꏦꌋꆀꀉꁁꌟꒉꈧꌠꃅꇫꐥꌐ。 13 ꂰꇠꑸꆏꄯꒉꎭꆱꇬꅇꂷꀠꇊꀘꉹꁌꇰꄉꋌꊌꈨꈧꌠꈀꐥꃅꋌꉉꋀꊇꇰ。

14 ꄚꄉ，ꌟꒉꌠꂾꈧꌠꆏꇴꏂꆜ、ꏃꆀꂰꑸꇖꑳ、ꆀꄣꑸꌺꒀꄂꂶꌠꋀꇤꅷꊩꌺꃅꀠꇊꏭ：“ꄯꒉꎭꆱꆏꀘꉹꁌꇰꋐꌠꄻꇇꊭꌊꄚꇬꇁ”ꄷꀠꆹꎻ。ꑠꃅꄉ，ꆀꆺꑸꄰꌺꀠꇊꆹꄯꒉꎭꆱꋐꌠꋌꄻꇇꊭꌊꋀꄷꑟꇁꀐ。 15 ꌟꒉꌠꂾꈧꌠꀠꇊꏭ：“ꆏꇫꑌꄉꄯꒉꎭꆱꋌꋐꀘꉪꇰ”ꄷ。ꄚꄉꄯꒉꋐꌠꀠꇊꀘꋀꇰꀐ。 16 ꅇꂷꈧꌠꋀꊌꈨꇬꆏ，ꋀꋌꇷꇧꁠꄉꏮꐮꈁꑓꉜꐺꌐꇈ，ꀠꇊꏭ：“ꉪꊇꅇꂷꋋꈨꈀꐥꃅꄜꌊꃰꃅꇰꆹꑲꆀꍑꀐ”ꄷ。 17 ꋀꊇꀠꇊꏭ：“ꅇꂷꋋꈨꈍꃅꄉꆏꁱꎼꇁꌠꉬ？ ꑱꆀꂱꈌꇬꅐꇁꌠꉫꀕ”ꄷ？

18 ꀠꇊꆏꋀꏭ：“ꅇꂷꋋꈨꈀꐥꃅꋌꉉꉡꇰꄉ，ꂷꋶꌊꉢꁱꄯꒉꎭꆱꇬꄀꄉꌠꉬ”ꄷ。

19 ꌟꒉꌠꂾꈧꌠꆏꀠꇊꏭ：“ꑱꆀꂱꆐꑊꐯꇯꂁꇬꀀꄉ，ꆐꑊꂁꇿꇬꀀꌠꊿꁳꅉꐚꄡꎽ”ꄷ。

ꒀꑸꏠꄯꒉꎭꆱꋌꐗꇫꎭ

20 ꄯꒉꎭꆱꋐꌠꌟꒉꌠꂾꈧꌠꄻꄹꏦꂘꃀꑱꆀꎭꂸꀁꇬꄉꇈꈭꐨꆏ，ꃰꃅꑷꂿꐷꈭꇬꄉꃰꃅꂿꆹꇈ，ꅇꂷꈧꌠꋀꄜꃰꃅꇰꌐ。 21 ꄚꄉ，ꒀꄂꂶꌠꃰꃅꇱꇤꅷꄯꒉꎭꆱꋐꌠꒃꒉꎻ，ꒀꄂꆏꄹꏦꂘꃀꑱꆀꎭꂸꑳꁨꌠꇬꄉꄯꒉꋐꌠꋌꒃꌊꇁꇈ，ꋌꀘꃰꃅꌋꆀꌟꒉꌠꂾꃰꃅꏢꁮꉆꈧꌠꇰ。 22 ꀊꋨꄮꆹꈬꆪꀕꌠꉬ，ꃰꃅꆏꋍꑷꂿꈜꈼꄮꐰꀀꂶꌠꇬꄉꐯꀻꌅꏢꌊꃆꄔꏥꇬꇫꑌ。 23 ꒀꄂꅇꂷꌕꊭꇖꊭꀘꄷꌦꆏ，ꃰꃅꂶꌠꄹꏦꂘꃀꅅꃅꏼꋌꈻꌊꄯꒉꎭꆱꋐꌠꋌꐡꆼꈘꇈ，ꋌꇵꃆꄔꇬꊐꄉꐗꇫꎭꌐꀐ。 24 ꃰꃅꌋꆀꇛꌺꈧꌠꆹꅇꂷꋋꈨꋀꊌꈨꇬ，ꋀꏸꀋꏦ，ꐒꊀꄉꃢꈜꋀꐞꏅꇫꑌꀋꎭ。 25 ꑱꆀꇂꄉ、ꄃꆾꑸꌋꆀꏸꂷꆺꑸꏤꆏ，ꈧꊰꀕꃅꃰꃅꏭꄯꒉꎭꆱꋌꋐꐗꇬꄡꎭꄷꇖꂟ，ꄚꃰꃅꆹꋀꅇꃅꀋꅲ。 26 ꋌꀱꌊꋍꌺꑳꇁꂱ、ꑸꌦꆀꄰꌺꑭꆾꑸꌋꆀꑸꀨꄃꄰꌺꏂꆀꂰꑸꏭꅇꁵꄉꄹꏦꂘꃀꀠꇊꌋꆀꌋꅇꄜꊿꑱꆀꂱꑋꒃꌊꇁꄷ。ꄚꑳꀊꊆꆹꋍꑊꋌꂁꇬꊎꄉ。

ꑱꆀꂱꆹꀠꇊꁳꄯꒉꎭꆱꀉꁁꋐꁱꎻ

27 ꄯꒉꎭꆱꑱꆀꂱꅇꂷꀠꇊꁱꇬꄀꄉꋐꌠꃰꃅꐗꇫꎭꈭꐨꆏ，ꑳꀊꊆꅇꂷꇁꌊꑱꆀꂱꄷꑟꄉ，ꇬꏭ： 28 “ꆏꄯꒉꎭꆱꀉꁁꋐꒃꌊꇁꑲꆀ，ꅇꂷꂴꏭꄯꒉꎭꆱꒀꄊꃰꃅꒀꑸꏠꐗꇫꎭꋐꌠꇬꈁꅑꈧꌠꃅꁱꇬꄀꄉꌐ。 29 ꉉꅷꃰꃅꒀꑸꏠꃆꂮꑟꇬꆏ，ꆏꑴꌠꇬꏭꑳꀊꊆꑠꃅꉉꄷ： ꄯꒉꎭꆱꋌꋐꆏꐗꇫꎭꇈ，ꆏꅇꂷ‘ꆏꑞꃅꀠꀘꇍꃰꃅꀋꎪꃅꄉꃅꄷꋌꈚꇬꊾꌋꆀꎇꃀꍅꑓꃅꋌꈔꋏꇫꎭꌐꃅꑠꁱꇬꄀꄉꌠꉬ？ ’ꄷꑠꉉ。 30 ꑠꅹ，ꒀꄊꃰꃅꒀꑸꏠꃆꂮꆏ，ꑳꀊꊆꑠꃅꉉ： ꋍꌺꇖꊂꋊꄊꃥꃰꃅꑋꅉꑌꑠꂷꀋꐥ；ꋍꂿꆹꊿꇵꇫꎭꄉ，ꑍꆏꃅꊸꆗ，ꌊꆏꉈꄲꆽꌠꉬ。 31 ꉡꆹꋋꌋꆀꋍꌺꇖꊂꋊ、ꋍꇛꌺꈧꌠꑽꃤꐆꐛꅹꃅꋀꇇꇩꍈ。ꉮꃤꉢꈁꉉꄉꈧꌠꁳꇁꋀꊇꌋꆀꑳꇊꌒꇌꇓꈓꉹꁌ、ꒀꄊꊿꌸꎻ，ꑞꃅꆏ，ꑠꃅꄷꑲꑌ，ꋀꊇꉠꅇꀋꅲ”ꄷ。

32 ꄚꄉ，ꑱꆀꂱꆹꄯꒉꎭꆱꀉꁁꋐꋌꄻꆀꆺꑸꄰꌺꀠꇊꁵꄉ，ꋌꁳꑱꆀꂱꈌꇬꈴꄉ，ꅇꂷꁱꄯꒉꎭꆱꒀꄊꃰꃅꒀꑸꏠꐗꇫꎭꋐꌠꇬꄀꄉꈧꌠꁱꎻ，ꅇꂷꀉꁁꐯꌟꃅꑠꈨꑌꁦꎆꃅꁱꇬꇯꄉ。