ꊕꇤꀧꐷꌠꌊꅺꌡ
19
1-2 ꑳꀊꊆꑠꃅꉉ： “ꆏꊕꄻꇔꇷꂷꄷꊖꇤꀧꂷꃼꌊꇁꑲꆀ，ꉹꁌꈬꄔꇬꅡꈭꌟꒉ、ꆦꑝꌟꒉꈧꌠꌋꆀꐮꐊꑭꇍꊪꇁꄿꉳꇓꑭꄇꂿꏢꁮꇬꉜꄉꒉ，ꀊꄶꇬꄉꑠꃅꅇꂷꉢꅽꏯꈁꉉꈧꌠꄛꇰ： 3 ‘ꒀꄊꃰꃅꌋꆀꑳꇊꌒꇌꉹꁌꊈꀋ！ꆍꊇꑳꀊꊆꅇꂷꅲꄡꑟ。ꄙꀕꃪꀕꉬꉎꂽꑼꌊꁈꑳꀊꊆ-ꑱꌝꆀꏃꃅꌋꄹꇬ：ꇬꉚꄉ！ꉢꀋꎪꃅꉮꃤꁳꇁꃅꄷꋌꈚꇬꌸꎻ，ꊿꋍꑠꈀꈨꌠꆹꀋꎪꃅꋌꇷꅳꀧꄂꌠꉬ； 4 ꑞꃅꆏ，ꋀꊇꌋꆀꋀꁍꁈ、ꒀꄊꃰꃅꈧꌠꐯꇯꉢꋀꇤꇫꎭꄉ，ꃅꄷꋌꈚꋀꌌꍍꆀꀐ。ꋀꊇꄚꇬꄉꌦꌋꋀꇬꀋꌧꑠꏭꅿꉗꌒꅍꐔꄀ，ꉈꑴꃅꄷꋌꈚꁳꊿꅑꑘꀋꐥꌠꌦꅪꐛꎻ。 5 ꋀꊇꆹꀠꆀꌦꌋꆦꑝꅉꋀꋉꄉꇈ，ꊨꏦꌳꃈꅮꌌꃆꄔꇬꐗꄉꆦꑝꅍꃅꌞꀠꆀꌦꌋꁵ。ꋍꑠꆹꉠꁵꅇꀋꉬ，ꉢꋀꏭꑠꃅꉉꀋꋻ，ꉠꉌꂵꑌꑠꃅꉪꀋꋻ。 6 ꑠꅹ，ꇬꉚꄉ！ꃅꑍꑟꇁꂯꄉꀐ，ꃅꄷꋌꈚꋌꊂꆏꄬꃏꄯꌋꆀꑭꇍꊪꇁꄿꀋꂓꃅ，ꊿꌉꇁꄿꂓꀐ。ꋍꑠꆹꑳꀊꊆꉉꌠꉬ。 7 ꉢꄚꋌꈚꇬꄉꒀꄊꌋꆀꑳꇊꌒꇌꊿꏡꁈꁳꀈꈥꀕꎻ，ꀋꎪꃅꋀꁳꁮꐚꂗꍵꑱꃀꇂꃴꌦꎻ，ꇁꊿꋀꀑꇬꒃꐺꈧꌠꇇꈐꃹꎻ。ꋀꂿꈧꌠꆹꉢꄻꃅꃴꇬꉌꊭꌋꆀꃄꅉꇬꑋꁮꉆꁮꋚꈁꄻꎻꌠꉬ。 8 ꉢꀋꎪꃅꇓꈓꋋꂷꁳꈥꅐꀜꅐꄉ，ꇁꊽꒊꅍꐛꎻ；ꊿꄚꈀꈴꐺꌠꃅꇓꈓꋋꂷꎒꐡꐯꀋꉜꌠꋀꂿꇬꆏ，ꇶꑌꋀꋌꇷ，ꒊꑌꋀꒊꒉꌠꉬ。 9 ꋀꊇꋀꁮꐚꌋꆀꋀꀑꇬꒃꈧꌠꇱꈹꌉꅸꇧꁠꇈ，ꁮꐚꇊꇤꏢꀕꇬꊎꄈꄮꇬꆏ，ꉡꆹꀋꎪꃅꋀꁳꋀꊨꏦꌳꃈꅮꎸꌋꆀꐋꀨꎸꋠꎻꌠꉬ’ꄷ。10 ꋍꈭꐨꆏ，ꆏꑴꌠꊿꆎꐊꒉꈧꌠꂾꄉꊕꇤꀧꂶꌠꐷꋧꐛꃀꐛꇫꎭꇈ， 11 ꋀꏭ：‘ꄙꀕꃪꀕꉬꉎꂽꑼꌊꁈꑳꀊꊆꄹꇬ： ꉢꉹꁌꋋꈨꌋꆀꇓꈓꋋꂷꐷꋧꐛꃀꐛꇫꎭ，ꊕꇤꀧꇔꇷꄻꄉꋋꂷꊿꐷꇫꎭꌠꌟꃅ，ꀱꉈꑴꄺꑣꐯꄀꀋꉆꎻ。ꋀꂿꈧꌠꊿꌌꄬꃏꄯꄃꇈ，ꄃꅉꎷꀋꊌꌠꉬ。 12 ꉢꀋꎪꃅꑠꃅꇓꈓꋋꂷꌋꆀꇓꈓꇬꀀꌠꉹꁌꈧꌠꊝꄉ，ꇓꈓꋋꂷꁳꄬꃏꄯꌋꆀꐯꌟꎽ。ꋍꑠꆹꑳꀊꊆꉉꌠꉬ。 13 ꑳꇊꌒꇌꑷꂿꈧꌠꌋꆀꒀꄊꃰꃅꑷꂿꈧꌠꐯꇯꄬꃏꄯꌟꃅꍍꆀꌐꀐ；ꑞꃅꆏ，ꊿꑷꂾꋋꈨꑲꏾꇬꄉꃅꃴꇬꈀꅑꌠꏭꅿꉗꌒꅍꐔꄀ，ꎧꉷꌊꀉꁁꌦꌋꑠꏭꆦꑝ’ꄷ”ꄷ。