ꊕꄻꇔꇷꌋꆀꊗꑗꌊꅺꌡ
18
1 ꑳꀊꊆꅇꂷꇁꌊꑱꆀꂱꄷꑟꄉ，ꇬꏭ： 2 “ꆏꄓꊕꄻꇔꇷꑶꌠꅍꉜꄉꒉ，ꉢꀊꄶꇬꄉꆏꁳꉠꅇꂷꊌꈨꎻꂿ”ꄷ。 3 ꑠꃅꄉ，ꉢꒉꌊꊕꄻꇔꇷꑶꌠꅍꑟꇬꆏ，ꋋꆹꊕꄻꅍꃰꇌꋍꃅꏮꐺꇶꌠꄩꄉꊐꅍꄻꐺꅊꇈ。 4 ꊕꄻꇔꇷꇇꈐꇬꊐꅍꊗꑗꌌꄻꄉꈧꌠꆿꐛꑲꆏ，ꊗꑗꈧꌠꋌꌌꊐꅍꀉꁁꋍꑵꄻꇫꎭ，ꋌꌌꈍꃅꄻꏾꆏꈍꃅꄉꄻ。5 ꋋꇅꇬꆏ，ꑳꀊꊆꅇꂷꇁꌊꉠꄹꑟꄉ，ꉠꏯ： 6 “ꑱꌝꆀꄰꀋ！ꉢꊕꄻꇔꇷꊗꑗꈧꌠꋏꌠꌟꃅꆍꊝꀋꉆꅀ？ꑱꌝꆀꄰꀋ！ꇬꉚ！ꊗꑗꈧꌠꊕꄻꇔꇷꇇꈐꀀꇬꈍꃅꐙꆏ，ꆍꉠꇇꈐꀀꇬꑌꈍꃅꐙꌠꉬ。ꋍꑠꆹꑳꀊꊆꉉꌠꉬ。 7 ꉢꈍꄮꇬꇩꏤꂷꏭꅀꊿꋅꁯꏭꉢꋀꐴꍠ、ꐅꀘ、ꅥꐷꇁꄷꉉꇬ， 8 ꀋꄸꄷꉢꈁꉉꌠꇩꏤꋋꂷꅀꊿꋅꋋꁯꋀꄸꃤꅠꃤꈧꌠꐞꄉꀱꇁꑲꆏ，ꉡꆹꀋꎪꃅꉠꉪꐨꄺꀱꄉ，ꉮꃤꉢꄐꉢꏤꄉꈧꌠꄻꋀꌶꇁꀋꎽ。 9 ꄚꉢꈍꄮꇬꇩꏤꂷꏭꅀꊿꋅꁯꏭꉢꋀꋈꄻ、ꊩꉘꇁꄷꉉꇬ， 10 ꀋꄸꄷꋀꊇꌤꆿꉢꉜꇬꄷꅠꌠꃅꄉ，ꉠꅇꃅꀋꅲꑲꆏ，ꉡꆹꀋꎪꃅꉠꉪꐨꄺꀱꄉ，ꌒꃤꉢꈁꉉꄉꈧꌠꄻꋀꀋꁵꌠꉬ。 11 ꆏꀋꃅꒀꄊꊿꌋꆀꑳꇊꌒꇌꉹꁌꈧꌠꏭ：‘ꑳꀊꊆꆹꉮꃤꋌꄐꏤꌊꉪꄉꏤꄉꆍꇇꇩꍈꇁꂿꄷꀐ。ꆍꊇꈀꄸꑌꄷꅠꈝꃀꏡꌠꐞꇁ，ꊨꏦꃅꐨꑽꑌꄺꀱ’ꄷꉉ。
12 ꄚꋀꊇꆏ：‘ꀋꍑ！ꉪꊇꆹꊨꏦꄐꏤꄉꈧꌠꇬꈴꄉꃅ，ꈀꄸꑌꊨꏦꆸꉈꆽꁁꌠꉌꂵꄷꅠꂶꌠꈴꄉꃅꇬꎷ’ꄷ”ꄷ。
ꑱꌝꆀꉹꁌꆹꑳꀊꊆꋀꇬꀋꎺꀐ
13 ꑠꅹ，ꑳꀊꊆꑠꃅꉉ：
“ꆍꊇꌞꇩꏦꈧꌠꇬꊼꇅꅲꇫꁧ，
ꈀꄸꂷꌤꑠꃅꐙꑠꈨꋺ？
ꑮꆜꌺꌡꌠꑱꌝꆀꆹꌤꊽꐬꆠꑓꆠꑠꐘꋌꃅꇬꅜꀐ。
14 ꆀꀠꇍꁧꇬꃰꐎꈧꌠꇓꈉꄩꄉꐯꁧꋺꑴꅀ？
ꈜꎴꃅꄷꇉꅶꁖꇁꌠꒈꌺꈺꍠꀕꌠꌤꁧꋺꑴꅀ？
15 ꄚꉠꉹꁌꆹꉢꋀꇬꀋꎺꃅ，
ꌦꌋꂿꄐꀋꐥꑠꏭꅿꉗꌒꅍꐔꄀꁧ，
ꑠꃅꄉ，ꋀꊇꆹꋀꇫꈴꌠꀊꆨꈝꃀꏢꇬꄉꈩꐛꃪꏾ，
ꈭꃀꈝꃀꄺꑣꀋꋻꑠꏢꍬꁧ。
16 ꋀꃄꅉꈥꅐꀜꅐꆘꅝ，
ꐥꍂꃅꄉꇁꌞꒊꅍꐛ；
ꊿꃅꄷꋌꈚꈴꈀꐺꌠꀋꎪꃅꋌꇰꀒꆹꇤꌠꉬ。
17 ꉡꆹꀋꎪꃅꊷꆳꁏꇁꌠꃅꆳꌟꃅꁮꐚꂾꄉꋀꊇꉢꁌꉢꀘꇫꎭꌠꉬ。
ꋀꊇꉮꃤꊜꄮꇬꆏ，
ꉡꆹꑓꏮꋀꀋꉜꃅ，ꇱꄓꏮꋀꉚꄉꌠꉬ”ꄷ。
ꑱꌝꆀꏡꁈꏂꌊꑱꆀꂱꉮ
18 ꄚꄉ，ꋀꊇꆏ：“ꁨꇁ！ꉪꊇꏡꁈꏂꌊꑱꆀꂱꉮꂿ；ꑞꃅꆏ，ꉪꈬꄔꇬꆦꑝꊿꄹꏦꉉꌠꐥ，ꀑꁮꅺꐳꌠꇖꊩꄟꃀꑌꐥ，ꌋꅇꄜꊿꑌꐥ，ꑞꑌꀋꇎꅍꀋꐥ。ꁨꇁ！ꉪꊇꅇꂷꉐꂷꈨꎹꌊꋍꊂꄉꑲꆀ，ꋍꅇꂷꈧꌠꋍꇬꑋꄡꅲꂿ”ꄷ。
19 ꑳꀊꊆꀋ！ꆏꈀꎭꀕꃅꉠꇖꅇꂟꅇꅲ，
ꊿꉠꊂꅇꎹꈧꌠꅇꂷꊼꇅꅲ。
20 ꊿꂄꃅꌠꄸꊌꑵꅀ？
ꄚꋀꊇꆹꃅꐬꅤꌊꉠꀑꇬꉮꂿꄷ！
ꆏꈀꎭꀕꃅꉢꈍꃅꅽꂾꄉꋀꎁꃅꅇꂄꉐꎔꉉ，
ꈍꃅꅽꏯꇨꇅꃃꋀꄡꊝꄷꇖꂟꋺꌠꎺꄉꅊꇈ。
21 ꑠꅹ！ꋀꌳꃈꅮꈧꌠꃱꉩꄸꌋꊝꅊꇈ，
ꋀꊇꂗꍵꑱꃀꇂꃴꄉꌦꅊꇈ；
ꋀꀋꃀꈧꌠꌺꌦꇖꌦꇈ，ꃆꍸꃀꅐꌐꅊꇈ，
ꋀꁦꋠꈧꌠꌦꈔꌐꅊꇈ，
ꋀꌠꆗꇷꄙꈧꌠꌉꈿꅉꄉꂗꍵꑱꃀꌊꊿꌉꌦꌐꅊꇈ。
22 ꆏꁮꐚꁳꋋꇅꃅꅸꇁꋀꄷꊐꎻꄮꇬꆏ，
ꐬꆠꌠꏄꃚꀅꃚꋀꑳꇬꄉꅐꇁꌠꊿꊌꈨꅊꇈ；
ꑞꃅꆏ，ꋀꊇꃅꐬꅤꄉꉡꒃꏭꄐ，
ꀋꌋꀕꃅꐱꂫꄵꄉꉡꑬꒃꂿꄷ。
23 ꑳꀊꊆꀋ！ꋀꉡꏂꉢꇫꌠꏡꁈꈀꐥꃅꆏꅉꐚꌐ，
ꆏꑴꌠꋀꑽꃤꈧꌠꄻꋀꄡꏆ，
ꅽꂾꄉꋀꄸꃤꅠꃤꈧꌠꌩꎳꇬꄡꎭ。
ꋀꊇꅽꂾꄉꃪꐛꇬꄚꅊꇈ，
ꆏꇨꇅꃃꅩꌬꀕꃅꋀꇇꇩꍈꅊꇈ。