ꀠꏂꉼꇓꀋꂄꃅꑱꆀꂱꊝ
20
1 ꑱꂴꄰꌺꆦꑝꊿꀠꏂꉼꇓꆹꑳꀊꊆꑷꂿꏲꂠꌟꒉꂶꌠꄻ。ꋌꑱꆀꂱꅇꂷꋋꈨꋌꊌꈨꇬꆏ， 2 ꌋꅇꄜꊿꑱꆀꂱꋌꌌꅥꄁꇈ，ꄚꌧꆽꈜꌊꋌꎤꑳꀊꊆꑷꂿꇬꀝꑷꂱꀃꈈꉎꁬꌠꈐꏭꊐꄉ。 3 ꊁꄹꉇꆏ，ꀠꏂꉼꇓꆹꑱꆀꂱꋌꃑꇫꎭ。ꄚꄉ，ꑱꆀꂱꆏꇬꏭ：“ꑳꀊꊆꋌꊂꆏꅽꏯꀠꏂꉼꇓꄷꀋꄹꃅ，ꂸꇱꇓ.ꂰꌒꀙꄷꇴꌠꉬa。 4 ꑞꃅꆏ，ꑳꀊꊆꑠꃅꉉ：‘ꇬꉚꄉ！ꉡꆹꆎꌋꆀꅽꐋꀨꈧꌠꁳꐬꆠꑓꆠꎻ；ꅽꐋꀨꈧꌠꁮꐚꇱꌉꌦꇫꎭꌠꑓꀠꀕꃅꆏꊌꂿꌠꉬ。ꉢꀋꎪꃅꒀꄊꊿꈧꌠꈀꐥꃅꏮꀠꀘꇍꃰꃅꇇꈐꊐꄉ，ꋌꁳꁮꌊꀠꀙꇍꁧꎻ，ꋌꁳꂗꍵꑱꃀꌊꌉꌦꇫꎭꎻ。 5 ꉢꇓꈓꋋꂷꈐꏭꎆꋚꌋꆀꁨꇐꄉꇐꇵꂷꅧꇗꀕꃅꎹꌊꇁꌠ、ꋍꑞꋍꑵꁌꇐꈤꌠꌋꆀꒀꄊꃰꃅꃤꁌꇐꈀꈤꀕꌠꑠꐯꇯꏮꁮꐚꇇꈐꊐ。ꁮꐚꋀꇏꋀꑣꇁꇈ，ꇑꅜꑣꅜꅍꈨꌠꈀꐥꃅꁮꐚꇱꁮꌊꀠꀙꇍꁧꌠꉬ。 6 ꀠꏂꉼꇓꀋ！ꆎꌋꆀꅽꑱꈐꑱꑭꊿꈧꌠ、ꅽꐋꀨꌋꅇꂷꃶꀋꐚꑠꆏꄜꋀꇰꈧꌠꐯꇯꊿꁮꌊꀠꀘꇍꁧꇈ，ꌥꑌꀊꄶꇬꄉꌦ，ꄃꑌꌌꀊꄶꇬꄃꇫꎭꌠꉬ’ꄷ”ꄷ。ꑱꆀꂱꆹꑳꀊꊆꏭꅫꏒꅇꉉ
7 ꑳꀊꊆꀋ！ꆏꈱꉡꊏꄉ， ꉢꆏꇱꊏꅞꀐ。
ꆎꆹꉠꏭꀋꋌꃅꀉꇨꄉ，ꉠꄩꊋꀐ。
ꉢꃅꑍꋋꑍꃅꇁꌞꒊꅍꐛ，
ꊿꋍꂷꋑꀋꋒꉢꒈꉢꈧꐺ。
8 ꉢꋍꃢꋑꀋꋒꅇꂷꉉꄮꇬꆏ，ꏅꁖꇁꇬꎷ，
ꉢꃚꐓꄉ“ꊋꒉꊋꁧꅸꌠꌋꆀꈔꑍꌠꇫꅐꇁꀐ”ꃅꏅ。
ꑞꃅꆏ，ꑳꀊꊆꅇꂷꈧꌠꐛꅹꃅ，
ꉡꆹꃅꑍꋋꑍꃅꑊꏦꎲꄏ，
ꊿꌌꁒꐀꇬꎷ。
9 ꀋꄸꄷꉡꆹ：“ꉢꑳꀊꊆꋋꂷꃆꂮꀋꉉꀐ，
ꋍꂓꄜꄉꅇꂷꑌꀋꉉꀐ”ꄷꇬ，
ꋍꅇꂷꈧꌠꀋꇊꆏꃆꄔꌟꃅꉠꇬꇉꇬꐞ，
ꇉꉠꃷꅍꈐꏭꀀꌠꌡꄉ，
ꉢꇬꋮꀋꄐ，ꉠꈯꉢꀋꌅ。
10 ꉡꆹꊿꈍꑋꐮꅳꀧꇬꌕꄉ：
“ꀊꈫꀊꇋꃅꊽꐬꆠꌠꐛꀐ，
ꑷ！ꉪꊇꊿꋋꂷꉉꌊꉎꌟꒉꇰꁧꂿ！”ꃅꑠꉢꈨꇁ；
ꐋꀨꉠꉌꂵꇬꇯꈧꌠꂯꑓꉜꏿꄉꉢꁳꃪꐛꎻ，
ꋀꊇꆏ：“ꋌꌞꊿꊏꅜꑲꆏ，
ꉪꊇꋍꄩꊋꄉꋍꄷꋪꒃꉆꀐ！”ꃅꉉ。
11 ꄚꑳꀊꊆꆹꌳꈄꀬꅑꊿꇫꏦꑠꂷꌟꃅꉢꈽꐥ，
ꑠꅹ，ꊿꉢꉮꇁꈧꌠꉠꄩꊋꀋꄐꃅꐚꇬꄚꌐ；
ꋀꊇꌤꃅꇬꌧꅍꂿꅍꀋꐥꐛꅹ，ꎲꄏꑊꏦꇧꁠ，
ꋀꎲꃤꄏꃤꑠꆹꐩꋊꐩꍂꃅꊿꇬꀋꎺꇁꀋꉆꀐꌠꉬ。
12 ꑖꊿꎖꉺ、ꃰꊿꉌꃀꆏꉜꈴꌠꄙꀕꃪꀕꉬꉎꂽꑼꌊꁈꑳꀊꊆꀋ！
ꆏꈀꎭꀕꃅꉢꁳꆏꋀꄷꋪꒃꌠꊌꂿꎻ，
ꑞꃅꆏ，ꉠꃆꑘꏡꌠꊨꄅꃅꉢꄜꆎꇰꀐ。
13 ꆍꊇꑳꀊꊆꏭꉙꑵ！ ꑳꀊꊆꏭꀮꄑ！ ꑞꃅꆏ，ꋋꆹꊿꄷꅠꈧꌠꇇꈐꇬꄉꌢꎭꌟꁧꂶꌠꀑꇬꋌꈭꋏꌊꇁ。
14 ꃅꑍꉡꒆꀊꋨꄹꉇꍃꊌꏿꊌꅊꇈ！
ꉠꀉꂿꉡꒆꀊꋨꄹꉇꋬꂻꀋꊌꅊꇈ！
15 ꊿꉠꀉꄉꏭ“ꆏꌹꂷꊌꀐ”ꃅꄜꄉ，
ꉠꀉꄉꁳꉌꇿꎻꀊꋨꂷꍃꊌꏿꊌꅊꇈ！
16 ꊿꀊꋨꂷꆹꇓꈓꑳꀊꊆꇫꎭꃅꀋꉈꃅꋌꐆꀱꆽꃅꇫꎭꂶꌠꌡꅊꇈ！
ꋋꆹꃅꄜꆏꆄꃚꏄꃚꋌꈨꇁꅊꇈ，
ꂵꆧꆏꌉꈿꇳꃚꉔꃚꋌꈨꇁꅊꇈ；
17 ꑞꃅꆏ，ꋋꆹꉢꋋꂷꒆꎼꀋꇁꌦꇯꆐꌉꇬꀋꎭ，
ꉠꀉꂿꀃꃀꁳꇁꄃꁧꐛꄉꉢꁳꐩꋊꐩꍂꃅꀊꄶꇬꀀꀋꎽ。
18 ꉢꑞꃅꀉꂿꀃꃀꇬꄉꒆꎼꇁꌠꉬ？ ꑞꃅꉢꁳꎭꇂꅦꇨꌋꆀꐒꇂꊀꃤꑠꊝꄉ， ꋋꐥꍂꃅꎲꄏꑊꏦꎻꌠꉬ？