ꑱꆀꂱꄯꒉ 1

ꑱꆀꂱꄯꒉ

ꑳꀊꊆꑱꆀꂱꌊꄻ

1 ꄚꐰꋋꈨꆹꀝꑷꂱꃅꄷꑸꆆꄳꇓꈓꆦꑝꊿꑭꇍꏦꄰꌺꑱꆀꂱꅇꂷꉬ。 2 ꑸꂱꄰꌺꒀꑭꑸꒀꄊꃰꃅꄻꊯꌕꈎꐛꄹꈎꌠ，ꑳꀊꊆꅇꂷꇁꌊꑱꆀꂱꄷꑟ。 3 ꒀꑭꑸꄰꌺꒀꑸꏠꒀꄊꃰꃅꄺꄮꇬꅑꅸꒀꑭꑸꄰꌺꑭꄂꏦꒀꄊꃰꃅꄻꊯꊪꈎꉬꆪꐛꄮꑟꇬ，ꑳꀊꊆꅇꂷꅉꀕꃅꇁꌊꑱꆀꂱꄷꑟꇬꎷ。ꑭꄂꏦꃰꃅꄻꄽꂫꋋꈓꆏꑳꇊꌒꇌꉹꁌꊿꁮꌊꁧ。

4 ꑳꀊꊆꅇꂷꇁꌊꉠꄹꑟꄉ，ꉠꏯ： 5 “ꆏꉢꄻꅽꀉꂿꀃꃀꇬꊐꀋꄉꑴꌦꇯꆐ，ꉢꆏꌥꀐ；ꆏꒆꎼꀋꇁꑴꌦꇯꆐ，ꆎꆹꉢꄻꌃꎔꐋꀋꌡꃅꄉ，ꆏꁳꇩꏤꈧꌠꇬꌋꅇꄜꊿꄻꎻꀐ”ꄷ。

6 ꉡꆏꇬꏭ：“ꌋꑳꀊꊆꀋ！ꉡꆹꈎꄜꀊꏀꇨ，ꈍꃅꉉꄡꑟꌠꉢꇬꀋꌧ”ꄷ。

7 ꑳꀊꊆꆏꉠꏯ：

“ꆏꈎꄜꀊꏀꇨꃅꄡꉉ，

ꑞꃅꆏ，ꆏꉢꇱꁆꌌꈀꄸꂷꄷꒉꎻꆏ，

ꆏꈀꄸꄷꒉꑲꆀꍑ；

ꉢꅽꏯꅇꂷꑞꈨꉉꄷꆏ，ꆏꑞꉉ。

8 ꆏꋀꄡꏦ，ꑞꃅꆏ，ꉡꆹꆎꐊꄉꆎꈭꋏ。

ꋍꑠꆹꑳꀊꊆꉉꌠꉬ”ꄷ。

9 ꋍꈭꐨꆏ，ꑳꀊꊆꋍꇇꋌꐛꉠꈂꀸꇬꄀꄉꉠꏯ：“ꇬꉚ！ꉠꅇꂷꈧꌠꉢꄻꅽꈂꀸꇬꊐꄉꀐ。 10 ꀃꑍꆏ，ꆏꉢꄻꊿꋅꌋꆀꇩꏤꈧꌠꄩꌅꈌꌬꄉ，ꆏꁳꐴꍠ、ꐅꀘ、ꅥꐷ、ꆷꇫꎭꎻ，ꉈꑴꆏꁳꋈꄻ、ꊩꏾꎻ”ꄷ。

ꑱꆀꂱꐛꒌꇣꋲꑍꑵꋌꊌꂿ

11 ꑳꀊꊆꅇꂷꇁꌊꉠꄹꑟꄉ，ꉠꏯ：“ꑱꆀꂱꀋ！ ꑞꆏꊌꂿ？”ꄷ。

ꉡꆏꇬꏭ：“ꌧꑳꌩꇇꐘꉢꊌꂿ”ꄷ。

12 ꑳꀊꊆꆏꉠꏯ：“ꆏꉜꌊꀋꑽ，ꑞꃅꆏ，ꉡꆹꉠꅇꂷꐏꁇꄉ， ꉠꅇꂷꁳꅇꅐꎻꌠꉬ”ꄷ。

13 ꑳꀊꊆꉈꑴꉠꏯ：“ꑞꆏꊌꂿꀋ？”ꄷ，

ꉡꆏꇬꏭ：“ꉽꐯꒉꈾꀕꄉꑠꁍꒈꀑꏭꄉꉷꎼꇁꌠꉢꊌꂿ”ꄷ。

14 ꑳꀊꊆꉠꏯ：“ꉮꃤꀋꎪꃅꒈꀑꏭꄉꅐꇁ，ꇁꃅꄷꋌꈚꇬꉹꁌꈀꐥꃅꌸꌠꉬ。 15 ꇬꉚꄉꅊꇈ！ ꉡꆹꒈꀑꏭꇩꏤꈧꌠꇬꊿꋅꈀꐥꃅꉢꇳꍝꌊꇁꌠꉬ。ꋀꊇꇁꌊꃰꃅꑋꅉꋀꄻꑳꇊꌒꇌꇓꈓꄇꂿꁭꑭꐕꄉ，ꈭꀕꇍꀕꇊꄉꇓꉻꏭꌠꅥꌉ，ꉈꑴꒀꄊꃅꄷꇓꈓꈀꐥꅉꃅꅥꌉꇁ。ꋍꑠꆹꉢꑳꀊꊆꉉꌠꉬ。 16 ꉹꁌꋋꈨꉡꐞꌊꄉ，ꀉꁁꌦꌋꑠꏭꅿꉘꌒꅍꐔꄀꁧ，ꊨꏦꇇꄻꄉꌠꏭꀍꃈꄚ，ꉡꆹꋀꑽꃤꆈꒉꀕꑠꐛꅹꃅ，ꋀꏭꀞꇽꅇꂷꄛꇰ。 17 ꑠꅹ，ꆏꐧꃬꉊꅑꄉ，ꄓꌊꅇꂷꉢꅽꏯꉉꈧꌠꈀꐥꃅꄜꋀꇰ；ꆏꋀꂿꇬꃨꆰꌋꀋꌸ，ꑠꀋꉬꑲꆏ，ꉢꆏꁳꋀꂾꄉꀊꅰꃅꃨꆰꎻꌠꉬ。 18 ꇬꉚ！ ꉢꀃꑍꆏꁳꇁꇓꈓꈫꈈꌠ、ꎸꅍꌷꁧ、ꐯꊖꁋꐛꄉ，ꃅꄷꋌꈚꇬꒀꄊꃰꃅ、ꇛꌺ、ꆦꑝꊿꌋꆀꉹꁌꈧꌠꏭꄘꑣꎻ。 19 ꋀꊇꆏꌉꇁꇬ，ꅽꄩꊋꀋꄐ，ꑞꃅꆏ，ꉢꆎꐊꐺ，ꆎꈭꋏ。ꋍꑠꆹꉢꑳꀊꊆꉉꌠꉬ”ꄷ。