ꑱꌝꆀꊿꏃꃅꌋꐞꁧ
‘ꀊꏀꃅꄉꄮꇬꅽꉂꐪꈁꅼꀕ，
ꑮꑟꄈꄮꇬꅽꉂꏣꈀꎴꀕ，
ꆏꈍꃅꇈꈬꅔꈋꋚꀋꊪꒉꀋꏿꅉꇬꄉꉠꊂꈹꐺꌠ，
ꉢꎺꌐꑴꌦ。
3 ꀊꋨꄮꇬ，ꑱꌝꆀꆹꑳꀊꊆꉜꌊꋍꃤꌃꎔꌠꃅꄉ，
ꋌꌌꋍꋚꁧꒉꁧꇬꂾꂔꈧꌠꃅꄉ；
ꊿꋀꐆꋀꋠꇁꈧꌠꆏꀋꎪꃅꑽꃤꋌꏤꇬꁳ，
ꉮꃤꀋꎪꃅꇁꊿꋋꈨꌸ，
ꋍꑠꆹꑳꀊꊆꉉꌠꉬ’ꄷ”ꄷ。
“ꆍꁍꁈꈧꌠꉜꇬ，
ꑞꉢꃅꑽꄉꋀꉢꐞꌊꌦꌋꂿꄐꀋꐥꑠꊂꈹꁧꇈ，
ꊨꏦꁳꇁꊿꂿꄐꀋꐥꌠꐛꎻꌠꉬ？
6 ꋀꊇꆹ：
‘ꉞꏹꄉꉪꋌꏃꀍꉀꇁꇈ，
ꉪꏁꌌꇈꈬꅔꈋ、ꂥꏂꀠꃅꐬꐛꅉꇬ，
ꃅꃶꃅꌘꌦꇁꈔꅉꇬ、ꊿꇬꀋꈴꅉ、
ꊿꇬꀋꀀꅉꇬꈴꇁꌠꑳꀊꊆꇿꇬꐥ？’ꃅꀋꅲ。
7 ꉡꆹꆍꋋꈨꏃꌊꃄꅉꈁꂄꀕꅉꃹꄉ，
ꆍꁳꀊꄶꇬꋚꂷꒉꂷꌋꆀꅐꇐꈁꂄꈁꎔꀕꌠꋠꎻꂿꄷꌠ；
ꄚꆍꊇꇫꃹꇁꄷꌦꆏ，ꉠꃄꅉꆍꌌꍍꆀꄉ，
ꉠꁍꑗꄉꈁꇁꊽꉌꁕꑠꐛꀐ。
8 ꆦꑝꊿꈧꌠ：‘ꑳꀊꊆꇿꇬꐥꀋ？’ꃅꅲꀋꋻ，
ꄹꏦꄜꊿꈧꌠꑌꉢꀋꌧ，
ꌟꒉꌠꂾꈧꌠꑌꉡꆼꁏ，
ꌋꅇꄜꊿꆹꀠꆀꌦꌋꎁꃅꅇꉉ，
ꂿꄐꀋꐥꑠꊂꈹꁧ。
ꏃꃅꌋꋍꉹꁌꏭꊨꀖ
9 ꑠꅹ，ꉡꆹꆍꊇꌋꆀꐮꅔꀥ，
ꆍꌺꇖꌋꆀꑌꐮꅔꀥ。
ꋍꑠꆹꑳꀊꊆꉉꌠꉬ。
10 ꆍꊇꁨꇉꇳꌌꏸꄝꎿꅔꇬꄉꍣꆫꆹ，
ꊿꁆꌌꏸꄊꃅꄷꄉꋓꉪꁨꃅꍣꄻꒉ，
ꌤꋍꑠꐥꋺꀕꉏ。
11 ꌞꇩꏤꌦꌋꈧꌠꃶꀋꐚꈨꉬꑴꇬ，
ꇩꏤꑞꂷꋍꊨꏦꌦꌋꈧꌠꋌꆦꇫꎭꋺ？
ꄚꉠꉹꁌꈧꌠꆹ，
ꋀꁳꀑꒉꑊꒉꊌꎻꂶꌠꋀꌌꌦꌋꌬꍩꀋꐥꑠꀠꇫꎭꀐ。
12 ꂿꃅꈧꌠꀋ！ ꆍꊇꋋꐛꅹꃅꋌꇰꄡꑟ，
ꑑꃹꏾꌌꀕꄡꑟ，ꈥꅐꀜꅐꉜꉚꑭꀋꐥ！
ꋍꑠꆹꑳꀊꊆꉉꌠꉬ。
13 ꑞꃅꆏ，ꉠꉹꁌꆹꌤꆿꄷꅠꑠꑍꐘꐆ：
ꉠꒉꐬꋇꀕꋆꃅꁖꌠꋀꇤꇫꎭꇈ，
ꋀꊨꏦꎁꃅꒈꇉꋀꅤꄉ，
ꒈꇉꑠꆹꀣꄉꀆꐒꊐꀋꉆ”ꄷ。
ꑱꌝꆀꊿꏃꃅꌋꐞꁧꄉꑗꉘꊝ
14 “ꑱꌝꆀꊿꆹꁏꐚꈨꉬꑴꅀ？
ꀁꇬꄉꒆꎼꇁꇬꇯꆐꁏꐚꐛꌠꉬꑴꅀ？
ꑞꃅꄉꌞꊿꇱꁮꌊꁧꌠꉬ？
15 ꆿꅪꀋꀮꋀꏭꉜꄉꂇ，ꋀꏭꉜꄉꏅ，
ꋀꃄꅉꈥꅐꀜꅐꆘꅝ；
ꇓꈓꈧꌠꊿꐗꇫꎭꇈ，
ꇁꊿꀋꋦꃮꀋꀆꅉꐛꀐ。
16 ꆎꆹꇊꃛꊿꌋꆀꄊꀘꆀꊿꇱꅥꀍꂷꏅ。
17 ꋍꑠꆹꅽꊨꏦꃅꊨꏦꄀꌠꀋꉬꅀ？
ꑳꀊꊆ-ꅽꏃꃅꌋꆎꈭꏃꈜꏁꄮꇬ，
ꋌꆏꇤꇫꎭꌠꒉꄸꀋꉬꅀ？
18 ꀃꑍꋋꄮ，ꆏꑞꃅꉞꏹꄉꆀꇊꒊꃀꀆꐒꅝꁧꌠꉬ？
ꑞꃅꑸꎽꄉꒀꃔꇁꄂꒊꃀꇬꀆꐒꅝꁧꌠꉬ？
19 ꅽꊨꏦꄸꃤꅠꃤꆹꀋꎪꃅꆎꇇꇩꍈ，
ꆏꇗꅉꆼꁏꌠꌤꆹꀋꎪꃅꅽꏯꊨꀖ。
ꑠꃅꉜꎼꇁꇬ，ꆏꑳꀊꊆ-ꅽꏃꃅꌋꐞꁧ，
ꉌꂵꇬꉡꁌꀋꒉꏦꀋꃪꌠꑠꆹ，
ꌤꆿꇯꍝꃅꄷꅠ、ꉌꂵꆅꌠꉬ。
ꋍꑠꆹꄙꀕꃪꀕꉬꉎꂽꑼꌊꁈꑳꀊꊆꉉꌠꉬ。
ꑱꌝꆀꊿꏃꃅꌋꏭꇗꅉꃅꇁꀋꅲ
20 ꆏꀋꉊꅽꇁꄉꆏꆸꐔꇫꎭ，ꅽꏦꀨꆏꁌꇫꎭꄉ：
‘ꉢꈍꃅꑌꑳꀊꊆꎁꃅꌤꀋꃅ’ꄷꉉ，
ꆏꁦꌺꇈꌺꄩ、ꌩꁧꃴꇉꀕꌠꇂꃴꄉꐧꊭꈎꌌꎼꃅꃏꑽꐺ。
21 ꉢꆎꊩꉘꌊꑌꃀꌧꊈꋍꉎꀋꐥꌠꐛꎻꂿꄷꄉ，
ꇗꂷꈀꉾꀕꌠꌊꊪꏽ；
ꆏꈍꃅꉠꂾꄉꐈꇁꇈꈬꋦꌠꑌꃀꌧꊈꇇꀕꀋꉾꀊꃪꌠꅑꑠꐛꌠꉬ？
22 ꆏꒊꊪꏤꒀꌋꆀꒈꋌꅍꈍꑌꃅꌌꋌꇬꑌ，
ꅽꑽꃤꐪꌐꆹꄇꇖꀕꃅꉢꂿꑴꌦ。
ꋍꑠꆹꑳꀊꊆꉉꌠꉬ。
23 ꆏꈍꃅ：
‘ꉡꆹꀋꍍꀋꆀ，ꀠꆀꌦꌋꊂꈹꀋꁧ’ꃅꉉꉆ？
ꆏꅽꃅꐨꇉꈫꇁꄿꄉꈀꃅꈧꌠꊼꇅꉜ，
ꅽꊨꏦꃄꄟꑽꄟꈧꌠꊼꇅꉪꏡꉚ；
ꆎꆹꁖꅖꉼꃀꃄꈌꄐꃅꇬꀥꐺꇬꎷꑠꏢꌡ。
24 ꆎꆹꑾꃅꏷꀕꇈꈬꐤꂷꌟꃅ，
ꇈꈬꅔꈋꐥꋻꅑꀐ，
ꉌꂵꏾꅍꄓꇁꄮꇬꆏ，ꌗꁮꌗꆐꏂ，
ꃅꎭꄮꇬꈀꄸꂷꋋꈻꌊꉈꑴꇁꄎ？
ꋌꎷꐺꌠꆹꊊꍈꑌꀋꅐ，
ꃆꃀꃅꎭꄮꇬꆏ，ꀋꎪꃅꋌꎹꊊꌠꉬ。
25 ꆏꌦꌋꊂꈹꄉꑭꆹꅪꇳꇵ、ꆺꄝꃵꌣꀕꃅꄡꐺ。
ꄚꆎꆏ：‘ꀋꍑ！ ꉡꆹꌞꌦꌋꉌꃹ，
ꀋꎪꃅꋀꊂꈹꁧ’ꄷ。
ꑱꌝꆀꊿꑊꏦꎲꄏꑠꊝꇁ
26 ꏄꍿꊿꒃꅜꄉꈍꃅꎲꄏꆏ，
ꑱꌝꆀꄰꌋꆀꋀꃰꃅ、ꇛꌺ、ꆦꑝꊿ、
ꌋꅇꄜꊿꑌꑠꃅꎲꄏꌠꉬ。
27 ꋀꊇꌩꄹꏭ：‘ꆎꆹꉠꀉꄉꉬ’ꄷ；
ꇓꂵꏭ：‘ꆎꆹꉡꒆꂶꌠꉬ’ꄷ。
ꋀꊇꈁꑓꏮꉢꀋꉜꃅ，ꇱꄓꏮꌊꉠꏯꉜꄉ，
ꄚꋀꊇꎭꇂꅦꇨꊜꄮꇬꆏ，
ꉠꏯ：‘ꄓꌊꉪꈭꋏꇁ！’ꃅꉉ。
28 ꆏꅽꊨꏦꎁꃅꄻꄉꌠꌦꌋꈧꌠꇿꇬꐥꀋ？
ꆏꉮꃤꊜꄮꇬ，ꋀꁳꆎꈭꋏꇁꎻꇆ！
ꒀꄊꀋ！ ꅽꌦꌋꈧꌠꃷꁨꆹꅽꇓꈓꈧꌠꌋꆀꐯꑖ。
29 ꆍꊇꑞꃅꉠꈌꀥꉐꀥꌠꉬ？
ꆍꊇꐯꇯꉡꆼꁏꌐ。
ꋍꑠꆹꑳꀊꊆꉉꌠꉬ。
30 ꉢꆍꌳꃈꅮꅥꏶꇬ，ꅥꏶꌊꀈꈥꀕ，
ꑞꃅꆏ，ꋀꊇꉠꉙꅇꂘꅇꍬꀋꅲ。
ꆍꊇꆹꆿꅪꊾꋠꌠꌟꃅ，
ꆍꌋꅇꄜꊿꈧꌠꅅꃅꌊꆍꌉꇫꎭ。
31 ꊿꃅꋊꋋꋏꇬꐥꈧꌠꀋ！
ꆍꊇꋓꉪꁨꄉꑳꀊꊆꅇꂷꅲ。
ꑱꌝꆀꊿꉜꇬ，ꉢꋋꂷꇈꈬꅔꈋꌡꅀ？
ꅀꃅꄷꆈꋧꀕꅉꌡ？
ꉠꉹꁌꑞꃅ‘ꉪꊇꆹꊨꏦꄿꐨꃅꐥꁧꂯ，
ꏮꅽꄹꀋꇁꀐ’ꃅꉉꌠꉬ？
32 ꑮꆜꈍꃅꋍꊨꏦꅑꃚꅑꅺꀋꎺꂯ？
ꑮꃀꀊꏀꈍꃅꋍꊨꏦꑮꃢꑮꈚꀋꎺꂯ？
ꄚꉠꉹꁌꆹꃅꑍꀋꃷꎵꃅꉢꀋꎺꀐ。
33 ꆏꇯꍝꃅꊿꄇꊾꑣꉔꐯꉔ，
ꅽꌧꅍꑠꆏꄻꃆꅿꄷꅠꈧꌠꂘ。
34 ꅽꃢꈜꏾꂪꇬꊿꌢꎭꅑꑘꀋꐥꌠꌦꅪꇬꅑ，
ꊇꅉꇬꋀꊇꑲꅤꄉꆎꈐꇁꌠꑠꆏꇬꀋꂿ。
35 ꌤꆿꋍꑠꇫꅐꑴꇬ，ꄚꆎꆏ：‘ꉢꅑꅍꍈꀋꐥ；
ꑳꀊꊆꈍꃅꑌꇨꇅꃃꉡꊝꀋꇁ’ꄷ。
ꇬꉚꄉꅊꇈ！ ꉡꆹꀋꎪꃅꆎꇔꅲꇁꌠꉬ，
ꑞꃅꆏ，ꅽꊨꏦꆹ：‘ꉢꑽꃤꀋꐆ’ꃅꉉ。
36 ꆏꑞꃅꐰꀥꉎꀥꃅꅽꈳꏦꄺꀱꌠꉬ？
ꆏꀋꉊꑸꎽꇩꏤꒉꄸꃅꑊꏦꎲꄏꌠꌟꃅ，
ꀋꎪꃅꉞꏹꇩꏤꒉꄸꃅꑊꏦꎲꄏꌠꉬ。
37 ꆏꀋꎪꃅꇇꄻꈁꑓꉱꄉꉞꏹꃅꄷꐞꁧꌠꉬ；
ꑞꃅꆏ，ꆏꇫꉘꇉꈧꌠꆹꑳꀊꊆꇱꇤꇫꎭꄉ，
ꆎꇇꀤꇇꄻꀋꄐꀐ”ꄷ。