ꏃꃅꌋꇁꌊꐧꇁꃰꊿꀞꇽ
66
1 ꑳꀊꊆꑠꃅꉉ：“ꃅꃴꆹꉠꑋꅉ，
ꃄꅉꆹꉠꑭꁆꊘꅉ。
ꆍꊇꉠꎁꃅꑷꂿꈍꃅꐙꂷꋉꂿꄷꌠꉬ？
ꉠꑬꆏꅉꆹꇿꇬꐛ？
2 ꋍꑠꈀꐥꃅꉢꄻꄉꌐꌠ，
ꋋꈨꐯꇯꉢꄻꇬꐙꎻꌠꉬ。
ꉢꇬꉚꇫꅲꌠꆹꊿꆺꀋꒉꄇꀋꒉ、ꉌꂵꉪꁏꏡꁏ、ꉠꅇꂷꈨꇬꑑꃹꏾꌌꀕꈧꌠꉬ。
ꋍꑠꆹꑳꀊꊆꉉꌠꉬ。
3 ꄚꊿꉌꂵꈁꏾꃅꄉꃅꑽ、ꄷꅠꌠꌤꆿꑠꌌꉌꇿꅍꃅꄉꇈ，
ꇂꁮꌉꌌꆦꑝꇬꊿꌉꌠꌡ，
ꑾꌺꌌꆦꑝꇬꈌꇵꊨꅥꆸꐔꌠꌡ，
ꋚꂷꒉꂷꌌꆦꑝꇬꃮꌦꌌꆦꑝꌠꌡ，
ꅿꉗꌒꋌꐔꄀꌊꆦꑝꇬꌦꁱꌊꁱꏭꆦꑝꌠꌡꋍꑠꆹ，
4 ꉢꀋꎪꃅꇨꐯꇨꃅꋀꇇꇩꍈꄉ，
ꋀꇫꏦꌠꁳꇁꋀꌶꎽ；
ꑞꃅꆏ，ꉢꋀꇴꇬ，ꋀꊇꉠꅇꀋꀱ；
ꉢꅇꂷꉉꇬꑌ，ꋀꊇꉠꅇꀋꅲ；
ꀱꆽꃅꌊꌤꆿꉢꉜꇬꄷꅠꌠꑠꃅ，
ꌤꆿꉠꉌꀋꃹꑠꀉꄂꌋꄉꃅꇬꎷ”ꄷ。
5 ꊿꑳꀊꊆꅇꂷꈨꇬꑑꃹꏾꌌꀕꈧꌠꀋ！
ꆍꊇꋍꅇꂷꋍꑠꅲꄡꑟ：
“ꆍꃺꑌꆍꌂꆍꑷ、ꉠꂓꐛꅹꃅꆍꋌꈹꇫꎭꈨꌠꆹ：
‘ꑳꀊꊆꀑꒉꑊꒉꊌꄉ，
ꉪꁳꆍꉌꇿꑓꇿꐨꊌꂿꎻꅊꇈ！’ꃅꉉ。
ꄚ，ꎲꄏꑊꏦꌠꆹꋀꊇꉬ。
6 ꇓꈓꇬꏞꃚꏇꃚꇫꈌꐚ！
ꑷꂿꇬꑌꃚꋒꇫꅐꇁ！
ꑠꆹꑳꀊꊆꋍꁮꐚꈧꌠꄷꋪꒃꌠꃚꋒꉬ。
7 ꑭꉢꇓꈓꆹꀃꃀꀋꈢꃅꄉꀉꑳꒆ，
ꀋꆅꀋꈻꑴꌦꇯꆏ，ꌹꂷꒆꎼꇁꀐ。
8 ꇩꏤꂷꋍꑍꀉꄂꃅꇬꐙꇁꄎꑴꅀ？
ꊿꋅꁯꋍꇅꀉꄂꃅꇫꅐꇁꄎꑴꅀ？
ꄚ，ꑭꉢꇓꈓꆹꀃꃀꋍꇅꈢꄷꌦꆏꌳꃈꅮꒆꀐ，
ꌤꆿꋍꑠꈀꄸꋋꂿꋺ？ ꈀꄸꋋꈨꋺ？
9 ꑳꀊꊆꆹ‘ꉢꊾꂷꀉꑳꒅꄮꑟꇬ，
ꋌꄛꀉꑳꀋꒆꎻꉆꑴꅀ?’ꄷ。
ꅽꏃꃅꌋꆹ‘ꉢꊿꁳꌺꒆꎻꑲꆏ，
ꋍꀿꑳꋍꄉꒆꎼꀋꇁꎻꉆꑴꅀ？’ꄷ。
10 ꆍꑳꇊꌒꇌꉁꅉꈧꌠꀋ！
ꋋꌋꆀꐯꈽꄉꉌꇿ，ꋍꎁꃅꉌꂵꇿ；
ꆍꋍꎁꃅꉌꐒꇁꎭꈧꌠꀋ！
ꉌꈯꑓꈜꃅꋌꈽꄉꉌꇿ；
11 ꆍꁳꋍꉌꌒꏹꌠꂣꈐꇬꄉꀉꆂꅝꂊꎻ，
ꋍꀑꒉꑊꒉꀋꃷꎵꌠꇬꄉꀉꆂꅝꇎꄉ，
ꉌꂵꇿꌐꀋꉆꎻ”ꄷ。
12 ꑳꀊꊆꑠꃅꉉ：
“ꇬꉚꄉ！ ꉡꆹꋬꂻꒊꃀꒉꌠꌟꃅꄻꋌꁳ；
ꇩꏤꈀꐥꌠꎆꋚꑌꒈꌺꈴꂋꏿꌠꌟꃅꋌꊌꇁ。
ꆍꊇꉌꂵꈁꉪꀕꃅꄉꏶꅝꌠꉬ；
ꆍꊇꀋꎪꃅꋌꄌꂣꈓꇬꊐꄉ、ꁡꊭꇬꑍꄉꉔꌠꉬ。
13 ꀉꂿꂷꈍꃅꄉꋍꌳꃈꅮꉌꌒꄀꆏ，
ꉡꑌꈍꃅꄉꆍꉌꌒꄀꌠꉬ；
ꆍꊇꀋꎪꃅꑳꇊꌒꇌꄉꉌꌒꄀꅍꊌꌠꉬ。
14 ꋍꑠꆍꊌꂿꇬꆏ，ꆍꊇꉌꂵꇿꐯꇿ，
ꆍꊇꁬꇁꆰꌺꒆꌠꌟꃅꊈꒆꆊꅑꇁ；
ꑳꀊꊆꈀꇨꀕꌠꊋꃤꆹꋍꁏꐚꇭꀧꇬꄉꉜꅐꇁꉆ，
ꄚꋍꁮꐚꈧꌠꆏ，ꋌꇨꇅꃃꅩꌬꀕꃅꇫꊝ。
15 ꇬꉚꄉ！ꑳꀊꊆꆹꀋꎪꃅꃆꄔꈬꇬꄉꀁꋌꇁ，
ꋍꌉꈿꂽꍯꆲꇨꁏꌠꌡ，
ꇨꇅꃃꅩꌬꀕꃅꋪꒃꇁ，
ꃆꄔꉐꆂꌊꊾꇇꇩꍈꇁ；
16 ꑳꀊꊆꆹꃆꄔꌋꆀꂗꍵꑱꃀꌊꐧꇁꃰꊿꀞꇽꇁ，
ꊿꑳꀊꊆꇱꌉꇫꎭꌠꀉꑌꐯꀉꑌꃅꐥ。
17 ꊿꊨꏦꇭꀧꌋꆀꉌꂵꋀꄻꁦꎴꃅꄉꈧꌠꆹ，ꉻꈫꇬꃹꆹꇈ，ꋀꈬꄔꇬꊾꂷꊂꈹꄉꃮꎸ、ꀉꉌꎸꌋꆀꀉꁁꊽꉌꁕꌠꑠꋠ，ꊿꋍꑠꆏꀋꎪꃅꐯꇯꈔꑍꌐꌠꉬ。ꋍꑠꆹꑳꀊꊆꉉꌠꉬ。
18 ꋀꈀꃅꈁꑽꌠꌋꆀꈁꉪꈁꏣꌠꃅꉢꅉꐚꌐ。ꊿꋅꈀꐥꌠꌋꆀꇩꏤꈀꐥꌠꏣꏑꐯꇯꄮꑟꀐ；ꋀꊇꆹꀋꎪꃅꉠꀑꒉꑊꒉꉜꇁꌠꉬ。 19 ꉡꆹꋀꈬꄔꄉꌋꃅꐨꑽꑌꃅ，ꋀꈬꄔꊿꀋꌦꃅꇫꐥꇈꈧꌠꉢꁆꌌꄣꏂ、ꁌꇍ、ꉹꁻꂓꅑꌠꇐꄓ、ꄲꀠ、ꑸꊉꇩꏤꈧꌠꇬꁧꎻ，ꉈꑴꁆꌌꈜꎴꃅꄷꎿꅔꇬꀀꌠꊿꉠꂓꌗꈨꀋꋻ、ꉠꀑꒉꑊꒉꂿꀋꋻꌠꑠꄷꑌꁧꎻ；ꋀꊇꆹꀋꎪꃅꇩꏤꀊꋨꈨꇬꄉꉠꀑꒉꑊꒉꄜꉺꌠꉬ。 20 ꋀꊇꀋꎪꃅꌞꇩꏤꈧꌠꇬꄉ ，ꃆꀞ、ꍮꊪ、ꏬꌆ、ꇳꇐ、ꁖꅖꉼꃀꑠꌊꆍꃺꑌꈧꌠꏃꀱꉈꑴꉠꌃꎔꁧꑳꇊꌒꇌꑟꇁꇈ，ꆦꑝꅍꃅꌞꑳꀊꊆꁵꌠꉬ。ꑠꆹꑱꌝꆀꊿꊐꅍꊐꀏꁦꎴꌠꌊꆦꑝꅍꊐꌊꑳꀊꊆꑷꂿꇬꇁꌠꌋꆀꐯꌟ。ꋍꑠꆹꑳꀊꊆꉉꌠꉬ。 21 ꉡꑌꀋꎪꃅꋀꈬꄔꇬꄉꊾꈨꌋꌊꆦꑝꊿꄻ，ꆺꃥꊿꄻ，ꋍꑠꆹꑳꀊꊆꉉꌠꉬ。
22 ꉢꄻꄉꌠꃅꃴꃄꅉꀊꏀꑠꆹꐩꋊꐩꍂꃅꉠꂾꋦ，
ꆍꌺꇖꊂꋊꌋꆀꆍꂓꉺꑌꀋꎪꃅꑠꃅꇫꋦꇬꎷꌠꉬ。
ꋍꑠꆹꑳꀊꊆꉉꌠꉬ。
23 ꋍꃢꋑꀋꋒꅂꀨꋩꑍꌋꆀꑬꆏꃅꑍꑞꄮꇬꆏ，
ꐧꇁꃰꊿꃅꉠꂾꄉꉠꏯꇗꅉꃅꇁꌐ。
ꋍꑠꆹꑳꀊꊆꉉꌠꉬ。
24 ꋀꊇꆹꀋꎪꃅꁖꉈꏭꄉꊿꉡꆼꁏꈧꌠꂿꉜꒉꌠꉬ。
ꑞꃅꆏ，ꁯꄸꋀꋠꈧꌠꆹꐩꋊꐩꍂꃅꀋꌦ，
ꃆꄔꋀꐗꈧꌠꑌꐩꋊꐩꍂꃅꀋꑍ，
ꐧꇁꃰꊿꈀꐥꃅꄉꋀꌂꏷꈌꀕꌠꉬ”ꄷ。