ꑱꌏꑸꄯꒉ 65

ꏃꃅꌋꊿꆸꉈꆽꁁꈧꌠꇇꇩꍈ

1 ꑳꀊꊆꑠꃅꉉ：

“ꊿꉠꏯꀋꇖꀋꂟꈧꌠ，ꉢꋀꁳꉢꎷꊌꎻ；

ꊿꉢꀋꎹꀋꈹꈧꌠ，ꉢꋀꁳꉢꊊꂿꎻ；

ꉡꆹꇩꏤꉠꂓꀋꄜꀋꇴꈧꌠꏭ：

‘ꉢꄚꇬ！ ꉢꄚꇬ！’ꄷꉉ。

2 ꉡꆹꃅꑍꋋꑍꃅꄉꉹꁌꆸꉈꆸꁁꈧꌠꏭꇇꃭꇬꎷ，

ꋀꊇꆏꊨꏦꉌꂵꈁꏾꃅꄉꈝꃀꀋꂄꀋꎔꑠꍬꁧ。

3 ꉹꁌꋋꈨꅉꀕꃅꉠꂾꄉꉠꇨꇅꃃꅍꃅꇬꎷ，

ꉻꈫꇬꄉꆦꑝꅍꌞ，

ꊖꀌꀠꀂꏽꄉꅿꉗꌒꋌꐔꄀ，

4 ꄃꁧꈬꄔꑌ，ꈊꃀꊿꇬꀋꌋꅉꇬꀀ，

ꃮꎸꋠ，ꋀꊐꅍꊐꀏꌌꎹꒉꁧꀋꎴꌠꇸꅝ；

5 ꋀꊇꉈꑴꌞꊿꏭ：‘ꆏꊁꇫꉆꄉ！ ꁨꉢꊩꄡꇁ，

ꑞꃅꆏ，ꉡꆹꅽꏭꀋꋌꃅꄉꌃꎔ’ꄷ。

ꉢꊿꋋꈨꂿꇬꇨꇅꃃꅩꌬꀕ，

ꃅꑍꋋꑍꃅꄉꃆꄔꐞꃅꐞ。

6 ꇬꉚ！ ꋋꈨꐯꇯꁱꉠꂾꄀꄉꌐꀐ，

ꉢꈍꃅꑌꁱꀋꐭꌙꈈꀕꃅꀋꄉꀐ，

ꉢꋀꇇꇩꀋꍈꀋꉆ，ꇨꐯꇨꃅꋀꇇꇩꍈꄉꋀꀱꑲꆀꍑ。

7 ꉢꋀꊨꏦꑽꃤꌋꆀꋀꁍꁈꑽꃤꇬꈴꄉꋀꏭꀱ。

ꉢꀋꎪꃅꋀꈀꃅꈁꑽꌠꇬꈴꄉꋀꏭꀱ，

ꑞꃅꆏ，ꋀꊇꆹꉘꁌꇬꄉꅿꉗꌒꋌꐔꄀ，

ꁦꀮꇬꄉꉡꍍꋉꄸꄀ，

ꋍꑠꆹꑳꀊꊆꉉꌠꉬ”ꄷ。

8 ꑳꀊꊆꑠꃅꉉ：

“ꑌꃀꌧꊈꌌꎧꏀꋏꉆꑴꌦꀮꊿꊌꂿꇬꆏ，ꑠꃅꉉ：

‘ꍞꇬꄡꎭꃅꄉ，ꉾꃪꌠꇫꐊꑴꌦ’ꄷ；

ꐯꌟꃅ，ꉡꑌꉠꁏꐚꈧꌠꐛꅹꃅ，

ꊿꋋꈨꈍꃅꑌꉢꈔꋏꉱꇤꇫꎭꀋꌐꌠꉬ。

9 ꉢꀋꎪꃅꑸꇱꄷꄉꋍꌺꇖꊂꋊꉢꏃꇁ，

ꒀꄊꊿꈬꄔꄉꊿꉠꁧꇂꇈꌺꋀꃤꐛꈧꌠꉢꏃꇁ；

ꉹꁌꉢꌊꄻꄉꈧꌠꆹꃅꄷꀊꋩꈚꀋꎪꃅꇁꋀꃤꐛ，

ꉠꁏꐚꈧꌠꀋꎪꃅꀊꄶꇬꀀꌠꉬ。

10 ꎭꇍꐦꀞꆹꀋꎪꃅꇁꑌꑿꆫꁍꐛ，

ꑸꇰꇁꄿꑌꀋꎪꃅꇁꇂꁮꀀꈉꐛ，

ꋋꈨꐯꇯꀋꎪꃅꇁꉹꁌꉢꎷꉢꈹꈧꌠꃤꐛꌐꌠꉬ。

11 ꄚꆍꊇꑳꀊꊆꐞꁧ、ꉠꌃꎔꁧꀋꎺ，

‘ꏧꄓꌦꌋ’ꎁꃅꄉꎧꀞꎸꀞ，

‘ꂱꆀꌦꌋ’ꎁꃅꎧꍔꌺꐛꃅꐮꉔꄉꌠꊿꋋꈨꆹ，

12 ꆍꀑꇬꉢꄐꉢꏤꅅꃅꈌꇬꊐ，

ꆍꊇꐧꊭꈎꄉꊿꇱꌉꇫꎭꌠꉬ；

ꑞꃅꆏ，ꉢꆍꇴꇬ，ꆍꊇꉠꅇꀋꀱ；

ꉢꅇꂷꉉꇬꑌ，ꆍꊇꉠꅇꀋꅲ；

ꀱꆽꃅꌊꌤꆿꉢꉜꇬꄷꅠꌠꑠꃅ，

ꌤꆿꉠꉌꀋꃹꑠꀉꄂꌋꄉꃅꇬꎷ”ꄷ。

13 ꑠꅹ，ꌋꑳꀊꊆꑠꃅꉉ：

“ꇬꉚꄉ！ ꉠꁏꐚꆹꀋꎪꃅꋠꅍꊌ，

ꄚ，ꆍꊇꆏꂮꐚꃴꀆꀕꌠꉬ；

ꇬꉚꄉ！ ꉠꁏꐚꆹꀋꎪꃅꅝꅍꊌ，

ꄚ，ꆍꊇꆏꈌꃶꒉꌤꌠꉬ；

ꇬꉚꄉ！ ꉠꁏꐚꆹꀋꎪꃅꉌꇿꑓꇿ，

ꄚ，ꆍꊇꆏꎲꅐꁁꅐꇁꌠꉬ。

14 ꇬꉚꄉ！ ꉠꁏꐚꆹꀋꎪꃅꉌꂵꇿꄉꇳꉔ，

ꄚꆍꊇꆏꉌꐒꇁꎭꄉꈨꃅꉩ，

ꄸꈐꐒꊀꄉꈨꃅꏅꌠꉬ。

15 ꆍꂓꇫꋒꇈꈧꌠꆹ，

ꀋꎪꃅꇁꉹꁌꉢꌋꄉꈧꌠꍃꅇꏿꅇꐛ；

ꌋꑳꀊꊆꆹꀋꎪꃅꆍꋌꌉꇫꎭꇈ，

ꂓꀉꁁꂷꋌꄻꋍꁏꐚꋉꌠꉬ。

16 ꑠꅹ，ꊿꃄꅉꇬꄉꊨꏦꎁꃅꋬꇖꈨꂟꌠꆏ，

ꀋꎪꃅꀋꎪꀋꎙꌠꏃꃅꌋꂓꄜꄉꇖꂟ；

ꊿꃄꅉꇬꄉꅇꏤꒃꌠꑌ，

ꀋꎪꃅꀋꎪꀋꎙꌠꏃꃅꌋꏭꄐꄉꅇꏤꒃ。

ꑞꃅꆏ，ꋌꃀꎭꐨꅦꑌꈧꌠꊿꇬꀋꎺꀐ，

ꐯꇯꉠꂾꄉꐘꀋꈨꀐ”ꄷ。

ꃅꃴꃄꅉꀊꏀꌠꄻ

17 “ꇬꉚ！ ꉢꃅꃴꃄꅉꀊꏀꌠꄻ！

ꋌꃀꌤꆿꈧꌠꊿꇬꀋꎺꌐꀐ，

ꉌꂵꇬꑠꎺꀋꇁꀐ；

18 ꆍꊇꆹꉢꈀꄻꄉꌠꐛꅹꃅꐩꋊꐩꍂꃅꉌꇿꑓꇿꄡꑟ；

ꇬꉚ！ꑞꃅꆏ，ꉢꑳꇊꌒꇌꇓꈓꋋꂷꄻꌊꊿꁳꉌꇿꎻꂿꄷꌠ，

ꇓꈓꈐꏭꉹꁌꈧꌠꁳꇁꌞꉌꇿꅍꐛꎻꂿꄷꌠ。

19 ꉡꆹꀋꎪꃅꑳꇊꌒꇌꐛꅹꃅꉌꇿꑓꇿ，

ꑞꃅꆏ，ꉠꉹꁌꈧꌠꉌꇿꌐ，

ꀊꄶꇬꉨꃚꏄꃚꌋꆀꐒꃚꊀꃚꑠꇫꈌꀋꐚꀐ。

20 ꀊꄶꇬꆹꀉꑳꀿꏂꒆꈍꑋꑍꐛꃅꁮꆘꅝꌠꀋꐥꀐ，

ꃀꌠꈎꀋꇎꆪꀋꇎꃅꄉꌦꌠꑌꀋꐥꀐ；

ꑞꃅꆏ，ꊿꋍꉐꈎꊌꄉꌦꌠꆹꀉꑳꌺꌗꑴꌦ，

ꊿꋍꉐꈎꀋꊌꃅꌦꌠꆹꊿꌌꍃꊌꏿꊌꌠꃅꄉꌠꉬ。

21 ꋀꊇꑲꋉꇣꄉꀊꄶꇬꀀ，

ꉻꈫꇬꑌꃀꌧꊈꊪꄉꂶꀕꑢꅝ；

22 ꑲꋉꇣꄉꌊꌞꊿꀋꏀꀐ，

ꋙꊪꒉꏽꌌꌞꊿꀋꍈꀐ，

ꑞꃅꆏ，ꉠꉹꁌꆹꀋꎪꃅꌩꁧꌟꃅꀊꉗꃅꄉꇫꋦ，

ꉹꁌꉢꌊꄻꄉꌠꀋꎪꃅꋀꊨꏦꃅꄉꑽꄉꌠꌬꈧꌠꉬ。

23 ꋀꊇꆹꈍꃅꑌꎬꅧꌊꀈꈥꀋꈥꀐ，

ꋀꈀꒆꌠꀉꑳꌺꑌꑗꉘꀋꊝꀐ，

ꑞꃅꆏ，ꋀꊇꌋꆀꋀꌺꇖꊂꋊꐯꇯꑳꀊꊆꋬꂻꄻꋀꁳꀐ。

24 ꋀꊇꉠꄹꀋꇖꀋꂟꑴꌦꇯꆐ，ꉢꈌꁧꋀꁳꀐ；

ꋀꊇꈌꋊꄉꇖꂟꄮꇬꆏ，ꉢꋀꅇꅲꀐ。

25 ꆿꃀꌋꆀꑾꌺꀋꎪꃅꐮꐊꄉꏜꋠ，

ꆿꅪꑌꀋꎪꃅꇂꁮꌟꃅꄉꏜꋠ，

ꁮꏂꀋꎪꃅꌦꏭꋚꃅꋠ；

ꉠꌃꎔꁧꋋꂷꇬꇿꉬꄿꂿ，

ꋋꈨꐯꇯꊾꑌꀋꉮ、ꀉꁁꐥꇐꑌꀋꉮꀐ；

ꋍꑠꆹꑳꀊꊆꉉꌠꉬ”ꄷ。