ꑱꌏꑸꄯꒉ 64

1 ꆏꃅꃴꀺꄉꀁꋌꇁꅊꇈ，

ꁧꇁꇈꌺꃅꅽꂾꄉꇙꈧꐺꅊꇈ。

2 ꌩꀊꃶꌠꌊꃆꄔꏦ，

ꃆꄔꐞꄉꀆꐒꈾꇁꌠꌟꃅ，

ꅽꁮꐚꁳꅽꂓꒉꌗꒉꅉꐚꎻ，

ꇩꏤꈧꌠꁳꅽꂾꄉꑑꃹꏾꌌꀕꌐꎽ！

3 ꆎꆹꉪꊇꉪꇫꑟꀋꄐꌠꌤꆿꊽꃪꉬꑠꃅꋺ，

ꀊꋨꄮꇬꆏꀁꋌꇁꄉ，ꁧꇂꇈꌺꈧꌠꃅꅽꂾꄉꇙꈧꐺꌐ。

4 ꀃꌋꀊꆨꅑꅸꇁꇬ，ꋍꑠꆹꊿꇫꈨꀋꋻ，ꊽꅳꀧꎟꀋꋻ，ꊿꇫꂿꀋꋻ，

ꆏꀉꄂꑲꆏ，ꀉꁁꌋꊿꋋꇁꉚꈧꌠꎁꃅꌤꆿꑠꃅꄎꂷꀋꐥ。

5 ꆎꆹꊿꉌꇿꃅꑖꉬꈴꄉꃅ、ꅽꈭꈜꋀꎺꈧꌠꉜꅲꇁ；

ꇯꍝꃅꇬ，ꆏꇨꇅꃃꋺ，ꑞꃅꆏ，ꉪꊇꑽꃤꐆꀐ；

ꉪꊇꀊꉗꏢꃅꑽꃤꐆꀐ，ꈭꋏꊌꄎꑴꌦꅀ？

6 ꉪꊇꐯꇯꊿꁧꀋꎴꈨꌡ，

ꉪꑖꉬꌠꃅꐨꈧꌠꃅꃢꈜꍍꆀꈨꌡ；

ꉪꊇꈀꄸꑌꌩꏾꌟꃅꀊꃶꆘꅝ，

ꉪꑽꃤꆹꆲꏂꌟꃅꉪꋌꁏꌊꁧ。

7 ꊿꅽꂓꄜꄉꇖꂟꇀꂷꀋꐥ，

ꊿꏟꈯꀕꃅꌦꆏꀳꂷꀋꐥ，

ꑞꃅꆏ，ꆎꆹꑓꏮꉪꀋꉜꃅ，

ꉪꁳꊨꏦꑽꃤꄸꃤꈬꇬꄉꑍꁧꎻ。

8 ꄚ，ꑳꀊꊆꀋ！ ꆏꀋꃅꄡꇗꉪꀉꄉꉬ！

ꉪꊇꆹꊗꑗ，ꆎꆹꊕꄻꇔꇷꉬ；

ꉪꊇꐯꇯꅽꇇꄻꄉꌐꌠꉬ。

9 ꑳꀊꊆꀋ！ ꆏꅩꌬꀕꃅꇨꇅꄡꃃ，

ꐩꋊꐩꍂꃅꉪꑽꃤꎺꄡꄉ；

ꆏꈀꎭꀕꃅꉪꉚꉪꅲꇁ，

ꑞꃅꆏ，ꉪꊇꐯꇯꅽꉹꁌꉬ。

10 ꅽꌃꎔꇓꈓꈧꌠꇁꇈꈬꅔꈋꐛꀐ；

ꑭꉢꇓꈓꇁꇈꈬꅔꈋꐛꀐ，

ꑳꇊꌒꇌꈥꅐꀜꅐꀐ。

11 ꉪꎔꃨꉼꏒꀕꌠꌃꎔꑷꂿꂶꌠꃆꄔꇱꐗꇫꎭꀐ，

ꑷꂿꋋꂷꆹꉪꁍꁈꆎꍗꆎꀴꅉꉬ。

ꉪꇫꉌꃃꈧꌠꈀꐥꃅꀜꐡꆿꐢꌐꀐ。

12 ꑳꀊꊆꀋ！ ꌤꆿꋍꑠꇫꅐꇬ，ꆏꋰꄉꄎꑴꌦꅀ？

ꆏꌙꈈꀕꃅꄉ，ꉪꁳꎭꇂꅦꇨꑠꒈꒊꌠꊝꎻꅀ？