ꑳꀊꊆꇨꇅꃃꅩꌬꃅꑱꄏꊿꊝ
63
1 ꑱꄏꃅꄷꀧꌦꇂꇓꈓꄉꇁꌠ，ꃢꈜꀊꅪꈚ，ꏦꄻꉺꄻ，ꊋꃤꈀꇨꀕ，
ꑭꁘꀊꐯꃅꐕꄉꁨꏭꇁꂶꌠꈀꄸꉬ？
ꋋꆹꉢ，
ꑖꉬꈴꄉꅇꉉ、ꊋꃤꈀꇨꀕꌠꌊꊾꈭꋏꂶꌠꉬ。
2 ꆏꑞꃅꃢꈜꀊꅪꌠꈚꌠꉬ？
ꅽꃢꈜꑞꃅꊿꎧꄔꎧꋏꐺꈧꌠꃤꌡꌠꉬ？
3 ꉢꀉꄂꎧꋏꅉꇬꎧꄔꐺ，
ꇩꏤꈧꌠꈬꄔꇬꊾꂷꉡꐊꌠꀋꐥ。
ꉢꇨꇅꃃꄉ，ꋀꊇꉢꌌꀜ，
ꉢꇨꇅꃃꅩꌬꀕꃅꋀꊝꄉꋀꊇꉢꌌꄔꈻ。
ꋀꌦꅪꀜꉠꃢꈜꇬꉖꄉ，
ꉠꃢꈜꋌꍍꋌꆀꅩꇉꀕꌐ。
4 ꑞꃅꆏ，ꋪꒃꃅꑍꉠꉌꂵꇬꀀ，
ꉠꈭꋏꃅꈎꇫꑟꇁꀐ。
5 ꉢꀑꐕꅶꍯꉜꇬ，
ꊾꂷꉡꇇꀤꌠꀋꐥ；
ꊾꂷꉡꄎꑣꌠꀋꊌꄉꉢꋌꇰꈌꉛꀕ。
ꑠꅹ，ꉡꆹꉠꊨꏦꆧꁨꌊꊾꈭꋏ，
ꉠꇨꇅꃃꐨꇁꉡꄏꉡꑣ。
6 ꉢꇨꇅꃃꄉ，ꉹꁌꈧꌠꉢꌌꀜ； ꉢꇨꇅꃃꅩꌬꀕꄉꋀꁳꎧꅝꎧꑱꎻ， ꋀꌦꅪꈧꌠꑌꉢꉷꃄꅉꇬꎭ。
ꑳꀊꊆꂄꃅꄉꑱꌝꆀꊿꊝ
7 ꉡꆹꑳꀊꊆꄻꉪꈀꇖꌠ、ꋍꎭꃅꉇꑭꌋꆀꀋꑍꀋꈤꌠꉂꐪ、ꋌꄻꑱꌝꆀꄰꁵꌠꑆꊋꈀꄖꀕꑠꐛꅹꃅ，
ꋍꀋꑍꀋꈤꌠꉂꐪꌋꆀꃅꐨꌌꀮꄑꋭꈧꌠꄜꉺ。
8 ꋌꄹꇬ：“ꋀꊇꆹꇯꍝꃅꉠꉹꁌꉬ，
ꉢꀋꁏꉢꀋꆽꌠꌳꃈꅮꉬ”ꄷ。
ꑠꃅꄉ，ꋋꆹꋀꈭꋏꌋꄻꀐ。
9 ꋀꊇꎭꇂꅦꇨꈁꄽꊜꄮꇬ，
ꋋꑌꋀꈽꄉꎬꅧ，
ꄷꀋꁧꋍꊨꏦꑭꄑꄉꋀꈭꋏꇁa，
ꋌꀋꑍꀋꈤꌠꉂꐪꌋꆀꎭꃅꉇꑭꑌꄉꋀꈭꋏ，
ꀃꌋꀊꆨꇯꆐꅉꀕꃅꋀꋌꄌꂣꈐꊐꄉ、ꋌꄻꇱꄓꁠꄉꇬꎷ。
10 ꄚꋀꊇꆏꀱꌊꋍꅇꃅꉐꃅꀋꅲꄉ，ꋍꌃꎔꒌꁳꉌꐒꎻ；
ꑠꅹ，ꋌꁏꇁꋀꁮꐚꐛꄉ，ꋍꊨꏦꑭꄑꌊꋀꅥꌉꇁ。
11 ꀊꋨꄮꇬꆏ，ꋍꉹꁌꈧꌠꆹꋀꎺꇁꀋꉊꂴꏭꃀꑭꐤꄮꇬꄀꄉꑠꃅꉉ：
“ꉹꁌꌋꆀꑌꑿꆫꉘꊿꈧꌠꎿꃀꇬꄉꋌꏃꀍꉀꇁꂶꌠꇿꇬꐥ？
ꋍꌃꎔꒌꋌꄻꋀꈬꄔꌵꇁꎻ，
12 ꀑꒉꑊꒉꌠꆧꁨꌊꃀꑭꇇꀤ，
ꉹꁌꂾꄉꎿꒉꋌꁸꑍꄷꎭꄉ，
ꋍꊨꏦꂓꁳꐩꋊꐩꍂꃅꇫꋦꎻꇈ，
13 ꋀꊇꋌꏃꎿꒉꈁꅼꀕꅉꇬꈴꇁꂶꌠꇿꇬꐥ？”ꄷ。
ꋀꊇꆹꃆꀞꌟꃅꇈꈬꅔꈋꈴꐺꇬ，ꈩꀋꐛꃪꀋꏾ；
14 ꉈꑴꎇꃀꍅꑓꇉꈫꇁꄿꀁꋌꒉꌠꌡ，
ꑳꀊꊆꒌꋀꁳꑬꆏꅉꊌꎻ；
ꆎꆹꑠꃅꅽꉹꁌꏃꂠꄉ，
ꊨꏦꂓꁳꀑꒉꑊꒉꊌꎻꌠꉬ。
ꑱꌝꆀꊿꑳꀊꊆꏭꋀꇇꀤꇁꄷꇖꂟ
15 ꆏꈀꎭꀕꃅꉬꉎꅽꀀꅉꌃꎔ、ꏁꇅꁤꇅꒉꂶꌠꇬꄉꉪꆫꃬ。
ꅽꉌꂵꁨꐞꄑꌠꌋꆀꅽꃅꐨꈀꇨꀕꌠꇿꇬꉬ？
ꅽꄸꈐꉪꉈꀋꇬꑓꀋꑣ、ꉪꎭꃅꀋꉈꆘꅝꀐ。
16 ꑸꀨꇁꉳꉪꀋꌧ，
ꑱꌝꆀꑌꉪꀋꏚꑴꇬ，
ꄚꆎꆹꉪꀉꄉꉬ。
ꑳꀊꊆꀋ！ꆎꆹꉪꀉꄉꉬ；
ꀃꌋꀊꆨꅑꅸꇁꇬꇯꆐ，ꅽꂓꆹ“ꉪꈭꋏꌋ”ꄷ。
17 ꑳꀊꊆꀋ！ꆏꑞꃅꉪꁳꅽꈭꈜꐞꁧꎻꌠꉬ？
ꆏꑞꃅꉪꁳꉌꂵꆸꉈꆽꁁ、ꆎꁌꀋꒉꏦꀋꃪꎻꌠꉬ？
ꆏꈀꎭꀕꃅꅽꁏꐚꐛꅹꃅ、ꃣꉻꅽꁨꇐꄉꇐꈧꌠꐛꅹꃅꀱꉪꉚꉪꅲꇁ。
18 ꅽꉹꁌꈧꌠꆹꀂꉗꌺꍈꅽꌃꎔꈚꌠꋀꊌ，
ꄚꀃꑍꋋꄮꆏ，ꋌꈚꉪꁮꐚꇱꄔꈻꇧꁠꀐ。
19 ꉪꊇꆹꇁꊿꆏꉪꏲꂠꀋꋻꑠꈨꌡ，
ꊿꅽꇂꃴꐥꀋꋻꈨꌡꀐ。