ꑳꀊꊆꆹꑱꌝꆀꊿꉂ
54
1 ꌋꅪꌺꒆꇖꉘꀋꄐꌠꀋ！ ꆏꉌꇿꃅꇳꉔ；ꌋꅪꀉꑳꒆꀋꋻꌠꀋ！ ꃚꐕꉐꐓꄉꇳꉔ；
ꑞꃅꆏ，ꌋꅪꊿꇤꇫꎭꌠꆹꌐꃶꁨꌠꏭꀋꋌꃅꌳꃈꅮꀉꑌ。
ꋍꑠꆹꑳꀊꊆꉉꌠꉬ。
2 ꅽꁁꑳꋥꅉꍔꀊꐯꃅꄉ，
ꅽꁁꑳꂪꌦꁬꌠꍔꆙꄉ，ꍕꉈꑴꇁꄡꎽ；
ꅽꏦꀨꀊꎴꃅꈻꄉ，ꅽꌩꇺꈬꃅꄩꄉ。
3 ꑞꃅꆏ，ꆎꆹꅶꍯꏭꉜꄉꍔꆙ，
ꇩꏤꋋꈨꃅꇁꅽꌺꇖꊂꋊꃤꐛ，
ꇓꈓꊿꀋꋦꃮꀋꀆꈧꌠꁳꊿꋦꊿꀀꇁꎻ。
4 ꏸꄡꏦ！ ꑞꃅꆏ，ꆎꆹꈍꃅꑌꎲꀋꄏꑊꀋꏦ；
ꉈꏠꌋꀋꌸ！ ꑞꃅꆏ，ꆎꆹꀋꎪꃅꎲꀋꅐꁁꀋꅐ。
ꅽꀊꏀꄮꇬꎲꄏꅍꈧꌠꆹꀋꎪꃅꆏꇬꀋꎺꁧꌠꉬ，
ꆏꃆꍸꃀꅐꄉꉈꏠꅍꈧꌠꑌꆏꇬꀋꎺꁧꌠꉬ。
5 ꑞꃅꆏ，ꆎꄻꂶꌠꆹꅽꌐꃶꉬ，
ꄙꀕꃪꀕꂽꑼꌊꁈ-ꑳꀊꊆꆹꋍꂓ，
ꆎꈭꋏꌠꆹꑱꌝꆀꌃꎔꂶꌠꉬ，
ꋋꆹꋧꃅꋋꂷꇬꏃꃅꌋꉬꄷ。
6 ꑳꀊꊆꆎꇳꍝ，
ꀋꇊꆏꌋꅪꊿꇤꇫꎭꄉꉌꐒꇁꎭꑠꂷꇳꍝꌊꉈꑴꇁꌠꌡ，
ꑮꃀꋋꂷꆹꀊꏀꄮꇬꒃꄉꇈꊿꇤꇫꎭꌠꉬ。
ꋍꑠꆹꅽꏃꃅꌋꉉꌠꉬ。
7 ꆏꉢꇤꇫꎭꌠꆹꀂꉗꌹꍈꀉꄂ，
ꄚꉡꆹꎭꃅꉇꑭꈁꅼꀕꌠꑌꄉꆏꏁꉈꑴꇁ。
8 ꉢꇨꇅꃃꌌꇬꇉꒉꈾꌟꃅꈾꄉ，
ꀂꉗꌹꍈꑓꏮꆏꀋꉜ，
ꄚꉡꆹꀋꑍꀋꈤꌠꉂꐪꑌꄉꆎꎭꃅꉈ；
ꋍꑠꆹꑳꀊꊆ-ꅽꈭꋏꌋꉉꌠꉬ。
9 ꋍꑠꆹꃅꋊꇊꑸꐤꄮꇬꌋꆀꐯꌟ；
ꉡꆹ‘ꉢꇊꑸꐤꄮꇬꌟꃅꏃꃅꒊꊝꂋꑠꁳꋧꃅꋋꂷꉱꇁꀋꎽꀐ’ꄷꅇꏤꒃꄉꀐ，
ꀋꃅꑌꉢꅇꏤꒃꄉꇨꇅꃃꆏꀋꊝ、ꅽꏯꀋꊨꀐ。
10 ꁧꇂꇈꌺꊈꐺꉆ，
ꁦꀮꇈꀮꇘꑐꉆ，
ꄚꉠꀋꑍꀋꈤꉂꐪꆹꈍꃅꑌꆎꐞꀋꁧ，
ꉠꋬꂻꌠꏤꐪꑌꀋꇙꀋꑐꌠꉬ；
ꋍꑠꆹꆎꎭꃅꉈꌠꑳꀊꊆꉉꌠꉬ。
11 ꎭꇂꅦꇨꊝ、ꆳꇁꉏꇨꌸ、ꊿꆎꉌꌒꄀꌠꀋꊌꌠꇓꈓꀋ！
ꇬꉚ！ ꉢꀋꎪꃅꇓꂵꁌꇐꈤꌠꌊꆎꋈꄻ，
ꇓꃴꁌꇐꈤꌠꌊꅽꅉꃀꋉ，
12 ꉢꇓꅪꁌꇐꈤꌠꌊꅽꇓꈓꑷꂿꋉ，
ꇓꂵꏷꇅꀕꌠꌊꅽꇓꈓꄇꂿꄻ，
ꇓꂵꁌꇐꈤꌠꌊꅽꀊꈫꀊꇋꇓꉻꏭꌠꋉ。
13 ꅽꌳꃈꅮꐯꇯꑳꀊꊆꉙꅇꂘꅇꊪ，
ꅽꌳꃈꅮꀋꎪꃅꄉꋬꂻꁣꀋꐥꌐꌠꉬ。
14 ꆎꆹꀋꎪꃅꑖꉬꐛꅹꃅꋦꈬꋦꈈ，
ꀋꎪꃅꆼꍅꆹꆋꑠꀋꊝ，
ꏦꇁꃪꅍꑌꀋꐥꀐꌠꉬ；
ꆎꆹꀋꎪꃅꐬꆠꑓꆠꑠꀋꊝ，
ꐬꆠꑓꆠꑠꈍꃅꑌꆏꊩꀋꇁ。
15 ꊿꆏꅣꆏꌉꇁꌠꐥꄷꑲꑌ，
ꋋꆹꉢꋀꁳꑠꃅꎻꌠꀋꉬ；
ꊿꆏꅣꆏꌉꈀꇁꌠꆏ，
ꀋꎪꃅꅽꐛꅹꃅꐚꇬꄚꌠꉬ。
16 ꇬꉚ！ꃆꄔꂡꄉꌉꉂꌉꈾꋩꌠꇔꇷꆹꉢꄻꄉꌠ；
ꊿꌉꊾꆳ、ꊾꈔꋏꂶꌠꑌꉢꄻꄉꌠ。
17 ꌉꉂꌉꈾꄻꌊꆏꌉꆎꆳꂿꄷꈧꌠꆹꂿꄐꀋꐥꌐ；
ꀞꇽꄮꇬꊿꅽꊂꅇꎹꇁꌠꆹ，
ꀋꎪꃅꆏꀥꅇꀋꊌꌠꉬ。
ꋍꑠꆹꑳꀊꊆꁏꐚꁨꇐꄉꇐꉬ，
ꉠꄹꄉꋀꊌꌠꑖꉬꀕ。
ꑠꆹꑳꀊꊆꉉꌠꉬ。