ꑱꌏꑸꄯꒉ 53

1 ꉪꈁꁊꌠꆹꈀꄸꂷꇬꑅꌠꐥ？

ꑳꀊꊆꊋꃤꈀꇨꀕꌠꄻꈀꄸꀨꋺ？

2 ꋋꆹꅿꁮꍈꌟꃅꑳꀊꊆꂾꄉꒆꀉꒉ，

ꐴꀠꃄꅉꀊꃹꅉꇬꋦꌠꌡ。

ꋌꐛꇴꐛꉻꋼꂷꀋꉬꐛꅹ，ꉪꍻꇬꀋꀵ，

ꋌꀑꑊꅪꁧꎔꂷꀋꉬꐛꅹ，ꉪꇬꀋꁯ。

3 ꋋꆹꊿꇬꉚꄸ，ꊿꇱꇤꇫꎭ；

ꎭꇂꅦꇨꈁꄽꊝ，ꅉꀕꃅꄉꉰꃤꆅꃤꌸ。

ꊿꃅꋌꉚꄸꄉ，ꈁꑓꉱꌌꑓꏮꋌꉚꂷꀋꊌ，

ꉪꊇꑌꋋꁌꀋꒉ。

4 ꇯꍝꃅꇬ，ꋋꆹꉪꉮꃤꆅꃤꋌꇔꌊꁧꀐ，

ꉪꎭꇂꅦꇨꑠꑌꋌꀵꌊꁧꌐ；

ꉪꊇꉂꆏ，ꋌꊿꌌꅥꏶꌠꆹꏃꃅꌋꇫꇇꇩꍈꌠꉬꎻꈁ。

5 ꄚꋋꆹꉪꑽꃤꎁꃅꄉꊿꌌꉀꌉ，

ꉪꄸꃤꎁꃅꄉꊿꌌꍑꍅ。

ꋌꊿꌌꇇꇩꍈꐛꅹ，ꉪꊇꋬꂻꊌ；

ꋌꊿꌌꅥꏶꐛꅹ，ꉪꆅꄚꄉꌒ。

6 ꉪꊇꉬꇮꑿꆘꅝꈨꌡ，

ꋍꂷꋑꀋꋒꆸꉈꌊꊨꏦꈜꍬꁧ；

ꄚꉪꋍꏅꑽꃤꈀꐥꃅꑳꀊꊆꇱꇔꋍꇭꀧꇬꄀꌐ。

7 ꋌꊿꌌꆼꍅꆹꆋꄉꎭꇂꅦꇨꊜꄮꇬ，

ꁰꇬꑌꀋꐭ；

ꋋꆹꑾꌺꊿꇱꈻꌊꌉꁧꂷꌡ，

ꉈꑴꑾꂷꑾꎭꋍꊿꇇꈐꀀꇬꀋꏅꌠꌟꃅ，

ꋋꑌꁰꇬꀋꐭ。

8 ꋌꊿꒃꌊꀞꇽꇈ，ꊿꇱꈻꌊꇫꈴꁧ；

ꋋꆹꉠꉹꁌꑽꃤꒉꄸꃅꋧꃅꇬꄉꊿꌌꅥꏶꇈꊿꇱꈔꋏꇫꎭ，

ꃅꋊꀊꋨꋏꇬ，ꊿꈀꄸꂷꋍꑠꋌꉪꇫꑟꄎ？

9 ꋌꊋꒉꊋꁧꅸꃅꊾꊝꀋꋻ，

ꈂꀸꐈꋓꅇꂷꉉꄉꊾꊏꀋꋻꑴꇬ，

ꊿꌌꊿꄸꈽꄉꄃ，

ꌣꈚꌠꌋꆀꄃꁧꋍꂷꄃ。

10 ꄚ，ꋌꊿꌌꍑꍅꄉꎭꇂꅦꇨꊝꑠꆹꑳꀊꊆꉪꐨꉬ；

ꋍꀑꇬꑳꀊꊆꌌꑽꃤꋊꆦꑝꅍꃄꄮꇬꆏ，

ꋋꆹꀋꎪꃅꋍꊂꋊꋌꊌꂿ，

ꈎꆪꀊꎴꃅꄉꇫꐥꌠꉬ。

ꌤꆿꑳꀊꊆꇫꉌꃹꌠꆹ，

ꀋꎪꃅꋍꇇꈐꇬꄉꁟꑻꀕꃅꀕꐛꌠꉬ。

11 ꋌꎭꇂꅦꇨꈁꄽꊝꈭꐨꆏ，

ꀋꎪꃅꁨꑭꋌꊌꂿꄉ，ꉌꂵꒈꊭꑙꌠꉬ。

ꊿꀉꑌꈨꉠꁏꐚꑖꉬꋋꂷꋀꌧꐛꅹꇁꑖꉬꌠꐛ，

ꋌꀋꎪꃅꋀꑽꃤꄸꃤꀵꄜꌠꉬ。

12 ꑠꅹ，ꉡꆹꋌꁳꊿꇰꀋꃀꌠꈽꄉꀑꒉꑊꒉꊌꎻ，

ꈀꇨꀕꈧꌠꈽꄉꌉꈿꁮꅜꅍꁸꎻ，

ꑞꃅꆏ，ꋋꆹꉈꌦꇲꇱꃅꄉꀑꇬꁮ。

ꋌꊿꇤꑽꊿꈧꌠꇱꄉꑴꇬ，

ꄚꋋꆹꊿꈍꑋꑽꃤꋌꀵꄜꌊꁧ，

ꉈꑴꑽꊿꈧꌠꎁꃅꄉꈼꂟ。