ꏃꃅꌋꀋꎪꃅꑳꇊꌒꇌꈭꋏꇁ
52
1 ꑭꉢꀋ！ ꀀꐚꇁ！ ꀀꄓꇁꌶ！ꅽꊋꃤꄻꈚꄉ！
ꌃꎔꇓꈓꑳꇊꌒꇌꀋ！ ꅽꃢꎔꈚꎔꄻꈚꄉꌶ！
ꑞꃅꆏ，ꀃꑍꇈꉈꆏ，
ꊿꌐꍓꏦꃤꃅꀋꋻ、ꁧꀋꎴꌠꆹꈍꃅꑌꅽꄹꃹꇁꀋꉆꀐ。
2 ꑳꇊꌒꇌꀋ！ ꅽꈯꄿꇬꈑꋍꇤꇫꎭ，
ꄓꌊꃰꃅꑋꅉꂶꌠꇬꑌ！
ꊿꁮꌊꁧꌠꑭꉢꌋꅪꀋ！
ꅽꇵꆹꇬꎸꉗꏡꌠꁌꇫꎭ！
3 ꑳꀊꊆꑠꃅꉉ：“ꆍꊇꁋꍈꀋꁵꃅꄉꊿꃷꇫꎭ，ꊁꑌꁋꍈꀋꁵꃅꋊꌌꉈꑴꇁꌠꉬ”ꄷ。 4 ꌋꑳꀊꊆꑠꃅꉉ：“ꀋꉊꂴꏭꉠꉹꁌꋋꈨꉞꏹꃅꄷꒉꇈ，ꌞꊿꁠꀊꄶꇬꀀ；ꊁꏭꆏ，ꋀꊇꑸꎽꊿꌌꆼꍅꆹꆋ”ꄷ。 5 ꑳꀊꊆꉈꑴꑠꃅꉉ：“ꉠꉹꁌꈧꌠꁋꍈꑌꀋꁵꃅꊿꁮꌊꁧꌠꉬꑲꆏ，ꉢꀃꑍꋋꄮꄚꇬꑞꃅꐺꂯ？ꊿꋀꄩꇧꊋꈧꌠꈌꒉꌊꇳꉔꀐ，ꉠꂓꂶꌠꋋꑍꃅꄉꊿꌌꍍꋉꄸꄀꇬꎷ。 6 ꄚꉠꉹꁌꆹꈍꃅꑌꉠꂓꀋꎪꃅꋀꌧꇁꌠꉬ；ꀊꋨꄹꉇꆏ，ꅇꂷꋋꈨꉉꂶꌠꆹꉢꉬꌠꀋꎪꃅꋀꅉꐚꇁꌠꉬ。ꇬꉚ！ ꉢꉬ！”ꄷ。
7 ꊿꁦꐂꇈꈴꄉꅇꃅꄜ、ꋬꂻꁊ、
ꅇꌒꉉ、ꈭꋏꑆꊋꄜꀊꋨꂷꆹ，
ꋍꑭꁘꈍꃅꋽꎔꉏ！
ꋌꑭꉢꏭ：“ꅽꏃꃅꌋꃰꃅꄻꀐ！”ꄷ。
8 ꇫꅲ！ ꅽꐏꁇꊿꈧꌠꃚꋒꅲ，
ꋀꊇꐯꇯꃚꐕꉐꐓꄉꉌꇿꑓꇿꃅꇳꉔꇁꌠꉬ，
ꑞꃅꆏ，ꋀꊇꆹꑳꀊꊆꀱꑭꉢꇁꌠꀋꎪꃅꋀꊌꂿ。
9 ꈥꅐꀜꅐꌠꑳꇊꌒꇌꀋ！
ꆍꊇꉌꈯꑓꈜꃅꃚꐓꄉꉙꑵ；
ꑞꃅꆏ，ꑳꀊꊆꇁꌊꋍꉹꁌꉌꌒꄀꀐ，
ꑳꇊꌒꇌꋌꋊꌌꇁꀐ。
10 ꑳꀊꊆꆹꋍꊋꃤꈀꇨꀕꌠꁳꇩꏤꈀꐥꌠꂾꅐꇁꎻ，
ꃅꋮꆸꈈꇿꇬꑌꉪꏃꃅꌋꈭꋏꑆꊋꋀꊌꂿꌐꌠꉬ。
11 ꐞꇁꌶ！ꐞꇁꌶ！
ꆍꊇꀠꀘꇍꄉꅐꇁꌶ。
ꊿꑳꀊꊆꑷꂿꌬꀮꌬꀏꀵꄜꈧꌠꀋ！
ꆍꇇꐛꁧꀋꎴꑠꄡꄀ，
ꐞꇀꄮꇬꀋꎪꃅꊨꏦꁳꁦꎴꃅꄉꎻ。
12 ꆍꊇꐞꇁꄮꇬꇨꆰꇨꊸꌋꀋꌸ，
ꆵꄻꑌꀋꅐ，
ꑞꃅꆏ，ꑳꀊꊆꀋꎪꃅꆍꂾꐊꐺ，
ꑱꌝꆀꏃꃅꌋꀋꎪꃅꇁꆍꄩꈜꐛ。
ꎭꇂꅦꇨꊝꌠꁏꐚ
13 ꇬꉚ！ꉠꁏꐚꆹꌤꃅꇬꀋꎪꃅꉪꑌꌧꋬ；
ꋌꀋꎪꃅꉢꐕꐤꒉꃅꄩꄉ，
ꉢꐕꌊꋍꉎꀋꐥꃅꄉ。
14 ꊿꈍꑋꋋꂿꇬꋌꇰꈌꉛꀕ，
ꑞꃅꆏ，ꋌꊿꅥꃚꆸꅺꆺꊾꂷꌡꀋꇬꀐ，
ꋍꇭꀧꑌꈤꏠꌊꊾꂷꀋꌡꀐ。
15 ꐯꌟꃅ，ꋌꀋꎪꃅꄉꇩꏤꈍꑋꁳꋋꂿꇬꋀꋌꇰꎻ。
ꃰꃅꋋꂿꁰꇬꐭꅍꎷꀋꊌ。
ꑞꃅꆏ，ꋀꊇꆹꌤꆿꉉꋀꇰꀋꋻꌠꋀꊌꂿꇁ，
ꌤꆿꋀꇫꈨꀋꋻꌠꋀꌧꇁ。