ꑱꌏꑸꄯꒉ 55

ꏃꃅꌋꆹꑆꊋꁌꀋꁵꃅꋌꄻꊾꇖ

1 ꁨꇁ！ ꆍꊇꈌꃶꒉꌤꈧꌠꃅꒉꋮꄉꀆꐒꅝꇁꌐ；

ꎆꃀꀋꐥꈧꌠꑌꁨꇁ，

ꆍꊇꐯꇯꁨꃻꋠꇁ，

ꎆꃀꀋꈁ，ꁌꀋꁵꄣꀋꁵ，

ꎧꏸꌋꆀꇌꑍꃻꅝꇁ。

2 ꆍꊇꑞꃅꎆꅐꌊꋠꅍꀋꉬꑠꃼꌠꉬ？

ꑞꃅꎆꃀꎬꅧꄉꎹꌊꇁꈧꌠꌌꋚꊾꂊꇁꀋꉆꑠꃼꌠꉬ？

ꆍꊇꋓꉪꁨꄉꉠꅇꂷꅲꑲꆏ，

ꋠꇐꅝꒉꈁꎔꀕꌠꋠꄉ，ꉌꇿꑓꇿ、ꐥꌒꄻꌒꌠꉬ。

3 ꆍꊇꉠꄹꇁ，ꅳꀧꍔꄉꉠꅇꂷꅲꇁꑲꆏ，

ꀋꎪꃅꇫꐥꄎꌠꉬ，

ꉡꆹꆍꊇꌋꆀꏤꐪꐩꋊꐩꍂꄻꀋꀱꑠꏢꒃ，

ꋋꆹꈌꁧꄊꃥꁵꄉꇫꉘꇉꉆꌠꀋꑍꀋꈤꌠꉂꐪꉬ。

4 ꇬꉚ！ ꉡꆹꋌꁳꐧꇁꃰꊿꏭꅇꊪꌬꎻ，

ꋌꁳꇩꏤꈀꐥꌠꄩꏲꌠꃰꃅꌋꆀꌅꈌꌬꊿꂶꌠꄻꎻ。

5 ꇬꉚ！ ꆎꆹꀉꁁꇩꏤꊿꆏꇬꀋꌧꌠꏭꇳꍝ，

ꌞꇩꏤꊿꆏꇬꀋꌧꑠꀥꄉꅽꄹꇁ；

ꋍꑠꆹꑳꀊꊆꅽꏃꃅꌋꐛꅹꉬ，

ꑞꃅꆏ，ꑱꌝꆀꌃꎔꂶꌠꅽꀑꒉꑊꒉꄀꀐ。

6 ꑳꀊꊆꎹꊊꉆꑴꌦꄮꇬꇯꆐꇬꎷꄡꑟ，

ꋌꈛꑌꅉꇬꐥꑴꌦꇯꆐꇬꏭꇖꂟꄡꑟ。

7 ꊿꄸꈧꌠꊨꏦꈝꃀꇂꎎꏡꌠꇤꇫꎭꄡꑟ，

ꊿꀋꑗꀋꉬꈧꌠꊨꏦꉪꇐꄷꅠꈧꌠꍞꇫꎭꄡꑟ，

ꏮꉈꑴꑳꀊꊆꄷꇁꑲꆏ，ꑳꀊꊆꀋꎪꃅꋋꎭꃅꉈꌠꉬ；

ꏮꉪꏃꃅꌋꄷꇁꄡꑟ，

ꑞꃅꆏ，ꋋꆹꉌꂵꈪꇑꍈꀋꑌꃅꄉꑽꃤꄻꊿꏆꌠꉬ。

8 ꑳꀊꊆꑠꃅꉉ：

“ꉠꉪꇐꏡꇐꆹꆍꉪꇐꏡꇐꀋꌡ；

ꉠꈭꃀꈝꃀꑌꆍꈭꃀꈝꃀꀋꌡ，

9 ꃅꃴꃄꅉꈍꂤꃅꇢꆏ，

ꉠꈭꃀꈝꃀꑌꈍꂤꃅꆍꈭꃀꈝꃀꄩꐂꁧ，

ꉠꉪꇐꏡꇐꑌꈍꂤꃅꆍꉪꇐꏡꇐꄩꐂꁧ。

10 ꃰꌦꂷꉐꃅꃴꇬꄉꐛꇁꑲꆏ，

ꀱꉈꑴꀋꁧꃅ，ꃄꅉꋌꊭꁁꆓꀕꄉ，

ꃄꅉꇬꋚꁧꇫꅿꇫꋦꇁꇈ，

ꋙꊪꒉꏽꌠꁳꋚꇕꒉꇕꊌꎻ，

ꋙꋠꒉꅝꌠꁳꋠꅍꅝꅍꊌꎻ。

11 ꉠꈂꀸꇬꈀꅐꇁꌠꅇꂷꑌꑠꃅꐙ，

ꀈꈥꀕꃅꀱꌊꉈꀋꁧꃅ，

ꉠꉌꃹꐨꇬꈴꄉꃅꐛꎻ，

ꉠꄐꇐꏤꇐꈧꌠꋌꁳꃅꌊꁟꑻꀕꎻ。

12 ꆍꊇꆹꀋꎪꃅꉌꇿꑓꇿꃅꅐꇁ，

ꋬꂻꁣꀋꐥꃅꄉꋌꏃꇁ，

ꁧꇁꇈꌺꀋꎪꃅꆍꂾꄉꉌꇿꃅꇳꉔ，

ꇈꈬꇬꌩꁧꇓꁧꑌꈮꈜꃅꇇꁮꏪ。

13 ꍲꁧꋥꅉꇬꄮꁧꇫꅿꇁ，

ꅡꀯꋥꅉꇬꏃꆺꌩꁧꇫꅿꇁ，

ꋍꑠꆹꄻꐩꋊꐩꍂꀋꑍꀋꈤꌠꌐꂷꃅꄉ，

ꑳꀊꊆꂓꄜꉺꎻꌠꉬ。