ꑳꀊꊆꆹꌏꇊꌧꋌꇱꌐꋉꄉ
45
1 ꉢꑳꀊꊆꆹꌏꇊꌧꉢꇱꌐꋉꄉ，ꋍꇇꇀꑳꁆꌠꉢꄏꉢꑣꄉ，
ꇩꏤꈧꌠꁳꈌꊰꄉꋍꇂꃴꐥꇁꌐꎽ；
ꃰꃅꈧꌠꐧꃬꉢꁌꇫꎭꄉ，
ꇓꈓꄇꂿꈧꌠꁉꋋꈴꇈ，ꈢꀋꉆꎻ。
2 ꑳꀊꊆꆹꌏꇊꌧꏭꑠꃅꉉ：
2 “ ꉢꅽꂾꐊꄉꀊꂥꀁꂥꅉꐽꐯꊯꃅꄉ，
ꐯꀃꈈꈧꌠꀋꎪꃅꉢꅥꆿꐛ，
ꎸꅍꀃꈈꆹꏮꉢꐡꇫꎭ，
3 ꉡꆹꁠꆈꇬꎊꈬꁌꇐꈤꌠꌋꆀꂁꄉꌠꎆꋚꑠꄻꆎꇖꄉ，
ꆏꁳꅽꂓꇴꄉꆎꇳꍝꂶꌠꆹꉢ-ꑳꀊꊆꑱꌝꆀꏃꃅꌋꉬꌠꅉꐚꎻ。
4 ꉡꆹꉠꁏꐚꑸꇱ、ꉢꌊꄻꄉꌠꑱꌝꆀꐛꅹꃅ，
ꅽꂓꇴꄉꆎꇳꍝꌠꉬ。
ꆏꉢꀋꌧꑴꇬ，ꉢꂒꉻꂷꄻꆏꁳ。
5 ꉢꀉꄂꑳꀊꊆꉬ，ꀉꁁꂷꀋꐥ；
ꉢꀉꄂꑲꆏ，ꀉꁁꏃꃅꌋꂷꀋꐥ。
ꆏꉢꀋꌧꑴꇬ，
ꉢꀋꎪꃅꐧꃬꄻꆏꄀ。
6 ꊿꉘꁮꅏꅉꄉꅑꅸꉘꁮꈞꆈꃸꅉꇬꈁꀀꌠꁳ，
ꉢꀉꄂꑲꆏ，ꀉꁁꏃꃅꌋꂷꀋꐥꌠꅉꐚꎻ。
ꉢꀉꄂꑳꀊꊆꉬ，ꀉꁁꋍꂷꀋꐥ。
7 ꉢꁨꑭꄻ，ꆈꋧꋪꌠꑌꄻ；
ꉢꋬꂻꁵ，ꉮꃤꁳꑌꊰꇁꎻ；
ꋋꈨꈀꐥꃅꉢꑳꀊꊆꃅꌐꌠꉬ。
8 ꉢꂿꃅꈧꌠꁳꒈꀮꄌꉷꏽꄉꂷꉐꐛꇁꎻ，
ꃅꄂꁳꑌꑖꉬꊰꇁꎻ，
ꃄꅉꈌꁉꄉ，ꈭꋏꑆꊋꌋꆀꑖꉬꁳꇫꅿꇫꋦꇁꎻ；
ꋍꑠꆹꉢ-ꑳꀊꊆꄻꄉꌠꉬ。
9 ꊿꋋꄻꌠꌋꂶꌠꏭꈌꀥꉐꀥꐺꌠꆹꉮꃤꐥꀐ！
ꋋꆹꃄꅉꇬꊖꇤꀧꂷꀉꄂꉬ，
ꊗꑗꈨꈍꃅꄉꇔꇷꋋꄻꂶꌠꏭ：
‘ꆏꑡꃅꐺꌠꉬ？’ꄷ，
ꅀ‘ꆏꑞꃅꇇꄻꇬꀋꄀ’ꃅꉉꉆꂯ？
10 ꊿꋍꀉꄉꏭ：‘ꑞꆏꄻꇬꅜꌠꉬ？’
ꋍꀉꂿꏭ：‘ꑞꆏꒆꇬꅜꌠꉬ？’ꄷꉉꂶꌠꆹꉮꃤꐥꀐ。
11 ꑳꀊꊆ-ꑱꌝꆀꃤꌃꎔꂶꌠ、 ꑱꌝꆀꄻꂶꌠꑠꃅꉉ：
“ꆍꊇꉠꉹꁌꊁꇁꋍꑍꃆꂮꈧꌠꌌꉡꇔꅲꇁꅀ？
ꉢꈍꃅꄉꃅꋭꌠꆍꁳꉢꉇꎻꅀ？
12 ꃄꅉꉢꄻꄉꇈ，ꃰꊿꉢꄻꃄꅉꄩꏀꄉ。
ꃅꃴꃅꑆꈧꌠꃅꄉꉢꁉꉢꍔꇬꄀꄉꌠꉬ，
ꃅꃴꇬꈁꅑꌠꃅꉢꉉꇬꄀꄉꌐꌠꉬ。
13 ꉢꑖꉬꈴꄉꌏꇊꌧꄖꄑ，
ꋍꈭꈜꈀꐥꌠꃅꉢꄻꎃꃅꄉ，
ꋌꀋꎪꃅꉠꇓꈓꋈꄻ，
ꉠꉹꁌꊿꁮꌊꁧꈧꌠꋌꄝꋌꃑꎼꇁ，
ꋌꎆꋚꉪꌠꀋꉬ，ꈁꁠꉪꌠꑌꀋꉬ”ꄷ。
ꋍꑠꆹꄙꀕꃪꀕꂽꑼꌊꁈꑳꀊꊆꉉꌠꉬ。
14 ꑳꀊꊆꑠꃅꉉ：
“ꉞꏹꅐꇐꌋꆀꇴꏃꎊꈬꀋꎪꃅꇁꅽꃤꐛꌐ；
ꇴꒉꉺꒉꌠꑭꀠꊿꀋꎪꃅꅽꇂꃴꐥꇁꄉ，ꅽꃤꐛꌐ。
ꋀꊇꆹꑬꎤꇇꎤꄀꄉꅽꊂꈹꐺ，ꅽꏯꀍꃈꄚꄉ：
‘ꏃꃅꌋꇯꍝꃅꆏꈽꐥ，
ꀉꁁꏃꃅꌋꂷꀋꐥ’ꃅꉉ”ꄷ。
15 ꈭꋏꌋ-ꑳꌝꆀꏃꃅꌋꀋ！
ꆎꆹꇯꍝꃅꅽꊨꏦꆏꂁꄉꌠꏃꃅꌋꉬ。
16 ꌦꁱꌊꁱꈀꄻꌠꃅꎲꄏꉈꏠꌐ，
ꋀꊇꐯꇯꎲꅐꁁꅐꌐꌠꉬ。
17 ꑱꌝꆀꀉꄂꑳꀊꊆꀋꎪꃅꇫꈭꋏꐛꅹ，
ꈭꋏꑆꊋꐩꋊꐩꍂꌠꊌ。
ꆍꊇꀋꎪꃅꄉꎲꀋꄏꑊꀋꏦ、ꎲꀋꅐꁁꀋꅐ，
ꅑꅸꐩꋊꐩꍂꑟ。
18 ꃅꃴꈀꐥꌠꃅꋌꄻꄉ，ꋋꆹꏃꃅꌋꉬ；
ꃄꅉꑌꋌꄻꋌꑣꈫꈈꃅꄉꇈ，
ꈥꅐꀜꅐꃅꀋꐛꃅ，ꊿꋦꊿꀀꎻ。
ꋌꑠꃅꉉ：
“ ꉢꀉꄂꑳꀊꊆꉬ，ꀉꁁꋍꂷꀋꐥ。
19 ꉡꆹꁠꆈꇬꌋꆀꆈꋧꋪꅉꇬꄉꅇꉉꌠꀋꉬ；
ꉢꑸꇱꌺꇖꊂꋊꏭ：
‘ꆍꊇꉢꎷꇬꀈꈥꎹ’ꃅꉉꀋꋻ，
ꉢ-ꑳꀊꊆꈁꉉꌠꆹꑖꉬꌐ，
ꈀꄜꌠꑌꊒꆽꀕꌠꉬ”ꄷ。
ꑳꀊꊆꀉꄂꈭꋏꌋꉬ
20 ꆍꊇꌞꇩꏤꈧꌠꇬꄉꆶꈭꅐꇁꈧꌠ，
ꐯꏑꌌꄚꇁꌐ。
ꊿꌩꁱꒃꄉꑠꐔꌊꐺ、ꌦꌋꊾꈭꋏꀋꄐꌠꏭꈼꂟꀊꋨꈨꆹ，
ꌧꅍꂿꅍꍈꀋꐥꌠꉬ。
21 ꆍꊇꁨꏭꄉꉉꀽꇁ，
ꋀꁳꐮꇖꐮꄟꎻ。
ꈀꄸꂷꀃꌋꀊꆨꇯꆐꌤꋍꑠꋌꉉꄉ？
ꈀꄸꂷꀋꉊꂴꇯꆐꌤꋍꑠꄛꇰꋺ？
ꋋꆹꉢ-ꑳꀊꊆꀋꉬꅀ？
ꉢꀉꄂꑲꆏ，ꀉꁁꏃꃅꌋꂷꀋꐥ；
ꉡꆹꑖꉬꌠꏃꃅꌋ，ꈭꋏꌊꑌꉬ；
ꉢꀉꄂꑲꆏ，ꌋꀉꁁꂷꀋꐥꀐ。
22 ꃅꋮꆸꈈꈁꀀꌠꃅꏮꉠꄹꇁꌐꑲꆏ，
ꀋꎪꃅꈭꋏꊌꌠꉬ。
ꑞꃅꆏ，ꉡꆹꏃꃅꌋꉬ，ꌋꀉꁁꂷꀋꐥꀐ。
23 ꉢꉠꊨꏦꏭꄐꄉꅇꏤꒃ，
ꑖꉬꉠꈂꀸꇬꄉꅐꇁ，
ꅇꂷꋍꑠꉉꄉꑲꆏꈍꃅꑌꄻꀋꀱ：
‘ꄙꃅꁡꊭꄂꄉꉠꏯꀍꃈꄚ，
ꃪꃅꈌꋊꄉꉠꏯꅇꏤꒃ’。
24 ꊿꉠꃆꂮꉉꇬ：
‘ꑖꉬꌋꆀꊋꃤꆹꑳꀊꊆꇇꈐꇬꀉꄂꀀ。
ꊿꀋꎪꃅꏮꋍꄷꇁ，
ꊿꋋꂿꇬꇨꇅꃃꌠꆹꀋꎪꃅꎲꅐꁁꅐ。
25 ꑱꌝꆀꌺꇖꊂꋊꆹꀋꎪꃅꑳꀊꊆꌌꑖꊿꃅꄉ，
ꋀꊇꑠꐛꅹꃅꈌꒉ’ꄷ”ꄷ。