ꑳꀊꊆꆹꀉꄂꀕꌠꏃꃅꌋꉬ
44
1 ꉠꁏꐚꑸꇱꀋ！ꉢꌊꄻꄉꌠꑱꌝꆀꀋ！
ꆏꀋꃅꅲꄉꄡꑟ。
2 ꆎꄻꄉꆏꁳꅽꀉꂿꀃꃀꇬꄉꇴꐛꉻꐙꎻꌠ、ꅽꇇꀨꌠꑳꀊꊆꂶꌠꑠꃅꉉ：
“ꉠꁏꐚꑸꇱꀋ！ ꉢꌊꄻꄉꌠꑳꎺꇍꀋ！
ꏸꄡꏦ！
3 ꑞꃅꆏ，ꉡꆹꀆꐒꄻꃄꅉꀊꃶꃵꌣꀕꅉꇬꎭꄉ，
ꒈꌺꁳꃄꅉꀊꃶꅉꇬꈴꇁꎻ。
ꉡꆹꉠꒌꄻꅽꌺꇖꊂꋊꌵꄉ，
ꉠꋬꂻꁳꇁꅽꌺꇖꊂꋊꄷꑟꎻ。
4 ꋀꊇꆹꒉꊩꇬꁬꌺꌟꃅꄉꅿ，
ꒉꋮꇬꉙꏂꌟꃅꄉꒆ。
5 ꋋꂷꆏ：‘ꉡꆹꑳꀊꊆꃤꉬ’ꄷ。
ꀊꋨꂷꆏ：‘ꉡꆹꑸꇱꌺꇖꉬ’ꄷ。
ꉈꑴꋍꂷꆏ，ꇇꇬ：‘ꑳꀊꊆꃤ’ꃅꁱꇬꄀꄉ，
ꄷꀋꁧꀂꑱꌝꆀꃤꉬꄷ”ꄷ。
6 ꑳꀊꊆ-ꑱꌝꆀꃰꃅ，ꑱꌝꆀꈭꋏꌋ、ꄙꀕꃪꀕꂽꑼꌊꁈꑳꀊꊆꑠꃅꉉ：
“ꉡꆹꇬꂾꉬ，ꉡꆹꌐꂫꉬ；
ꉢꀉꄂꑲꆏ，ꀉꁁꏃꃅꌋꂷꀋꐥ。
7 ꈀꄸꂷꉢꌟ？
ꋌꁳꉠꂾꄉꄛꇰ、ꄜꉺ、ꉉꀽꈺꀽꇁꎻ！
ꌤꆿꀃꌋꀊꆨꊿꉢꄻꄉꈭꐨꅑꅸꇁꌠꇫꅐꈧꌠ，
ꌤꆿꊁꇁꋍꑍꀋꎪꃅꇫꅐꇁꈧꌠ，
ꋌꁳꐯꇯꊨꄅꃅꄉꄜꉺꎼꇁꎻ！
8 ꆍꊇꐬꆠꌋꀋꌸ，ꏸꏦꌊꑌꀋꌸ。
ꉢꀃꌋꀊꆨꇯꆐꄛꇰ、ꉉꀽꆍꇰꀋꄉꑴꌦꅀ？
ꆍꊇꆹꉠꅇꊪꌬꊿꉬ！
ꉢꀉꄂꑲꆏ，ꀉꁁꏃꃅꌋꂷꐥꑴꅀ？
ꀋꐥ！ ꇓꆈꀋꃀꀉꁁꂷꀋꐥ，ꉢꅉꐚꇬꋍꂷꂯꀋꐥ！
ꌦꁱꌊꁱꆹꇿꋌꍈꀋꐥ
9 ꊿꌩꁱꇓꁱꄻꈧꌠꆹꄻꌊꀈꈥꀕ，ꋀꇫꉌꃃꌠꌩꁱꇓꁱꈧꌠꇿꋌꍈꂯꀋꐥ。ꊿꌩꁱꇓꁱꎁꃅꅇꊪꌬꈧꌠꆹꌧꅍꍈꑌꀋꐥ，ꂿꅍꍈꑌꀋꐥꐛꅹ，ꎲꄏꑊꏦꏽ。 10 ꈀꄸꌩꁱꇓꁱꒃ？ꈀꄸꌦꁱꌊꁱꎵ？ꋋꈨꐯꇯꈲꏣꍈꇬꀋꐥ。 11 ꇬꉚ！ꊿꇫꊂꈹꈧꌠꆹꀋꎪꃅꎲꅐꁁꅐꌠꉬ；ꇫꄻꌠꇔꇷꈧꌠꑌꃰꊿꈨꄹ。ꋀꁳꈁꏾꃅꐯꏑꎽ，ꈁꏾꃅꇬꉆꎻ！ꋀꊇꆹꀋꎪꃅꐯꇯꐬꆠꑓꆠ、ꎲꄏꑊꏦꌠꉬ。
12 ꎷꋩꇔꇷꂶꌠꎸꅍꋌꄻꌋꇬꃚꄉꇈ，ꇁꄵꌺꌊꋨꑣ，ꅀꎸꅣꇁꄵꌊꆧꁨꈀꇨꀕꃅꇴꉻꂶꌠꋌꅥꄁꎼꇁ。ꋌꀄꂳꑲꆏ，ꊋꀋꑌꏢꀋꑌ，ꒉꌤꑲꆏ，ꐙꄏꌍꆜꏽꌠꉬ 。 13 ꌩꊨꇔꇷꌐꑟꈻꌊꌐ，ꀙꌊꑴꁱ，ꄹꑽꌌꑽ，ꎖꅍꃰꇌꈭꌠꌊꎖꄉꇴꉻꂶꌠꒃꎼꇁ。ꌩꁱꐛꋽꉺꋽꇴꉻꊿꌟꑠꂷꋌꒃꎼꇁꇈ，ꋌꄻꁱꑳꇬꄉ。 14 ꋌꌿꁧꇽ，ꉈꑴꎺꁧꌋꆀꀉꁁꌩꁧꉾꑠꋌꀨꎹꌩꏪꇬꋉꄉꀉꒉꎻ；ꄮꁧꑌꋌꊪꄉꇈ，ꂷꉐꐛꇫꊭꄉꒆꀉꒉꎻ。 15 ꌩꋋꈨꆹ，ꋍꈨꆏꊿꌌꏥꌩꃅ，ꌌꃆꄔꏦꄉꇬ、ꋚꃪꀕ；ꉈꑴꋍꈨꆏꊿꌌꌦꁱꌊꁱꄻꄉꇬꏭꀍꃈꄚ，ꌩꁱꇓꁱꒃꄉꇬꏭꇗꅉꃅ。 16 ꌩꈫꁁꆏꋌꌌꃆꄔꏦꄉꎸꃚꃙꋠ，ꋠꂊꈭꐨꆏ，ꃆꄔꇬꄉ：“ꀊꁣ！ ꉢꃆꄔꑠꇤꊌꄉ，ꊷꆣꀕꀐ”ꄷ。 17 ꋍꈭꐨꆏ，ꌩꊁꈫꁁꌠꆏꋌꌌꌩꁱꂷꒃꄉꇈ，ꌦꌋꂷꉬꑴꄷꄉ，ꇇꑭꃃꇵꀕꃅꋍꂾꀍꃈꄚ，ꇬꏭ：‘ꈀꎭꀕꃅꉡꈭꋏꇁ，ꑞꃅꆏ，ꆎꆹꉠꌋꉬ”ꄷꈼꂟ。
18 ꋀꊇꆹꁦꇰꌧꅍꀋꐥ，ꉪꏡꑲꑌꀋꌧ；ꑞꃅꆏ，ꋀꑓꋪꑳꀊꊆꇱꉱꄉ，ꋀꁳꊌꂿꀋꉆꎻ；ꋀꉌꂵꑳꀊꊆꇱꋍꄉ，ꋀꁳꐝꉅꀋꄐꎻ。 19 ꊿꉌꂵꉪꐚꏡꐚꌠꋍꂷꑌꀋꐥ，ꊿꌧꇐꂿꇐꐥ、ꀑꁮꅺꐳꄉ：“ꌩꈫꁁꉢꌌꃆꄔꏦꄉꋚꃪꀕ、ꎸꃚꃙꋠꀐ，ꉢꈍꃅꄉꌩꇫꋒꇈꈫꁁꌠꌌꌩꁱꇓꁱꊽꉌꁕꑠꄻꉆꂯ？ ꉢꈍꃅꌩꁱꑠꏭꀍꃈꄚꉆꂯ？”ꄷꉉꄎꌠꀋꐥ。 20 ꊿꋋꂷꆹꈑꋧꈑꆠꌌꋚꃅꋠ，ꉌꁍꉌꇰꄉ，ꎎꄷꅠꏭꉜꄉꁧ，ꋍꊨꏦꑴꅉꈭꋏꀋꄐ，ꉈꑴ：‘ꉠꇇꇀꑳꁆꌠꇬꀀꌠꆹꌋꃶꀋꐚꌠꉬ’ꃅꉉꄎꌠꀋꐥ。
ꑳꀊꊆꆹꑱꌝꆀꈭꋏꌋꉬ
21 ꑸꇱꀋ！ ꆏꌤꋍꑠꉪꏡ，
ꑱꌝꆀꀋ！ ꆏꉠꁏꐚꉬ。
ꆎꆹꉢꄻꄉꌠ，ꉠꁏꐚꉬ。
ꑱꌝꆀꀋ！ ꆏꈍꃅꑌꉢꎺꄉꇬꎷꌠꉬ。
22 ꅽꑽꃤꆹꄄꆈꐰꁧꌠꌟꃅꄉꉢꌩꇫꎭ；
ꅽꄸꃤꆹꃅꉒꑍꁧꌠꌟꃅꄉꉢꉱꇫꎭ。
ꆏꀱꉠꄹꇁꄡꑟ，ꑞꃅꆏ，ꉢꆎꈭꋏꀐ。
23 ꃅꃴꈧꌠꀋ！ ꉙꑵꄡꑟ，
ꑞꃅꆏ，ꌤꑠꑳꀊꊆꃅꐛꀐ。
ꃄꅉꈁꅼꀕꅉꀋ! ꈮꈜꃅꇳꉔꄡꑟ！
ꁧꇂꇈꌺꈧꌠꀋ！ ꃚꋊꄉꉙꑵ；
ꌩꏪꌋꆀꌩꏪꇬꌩꁧꈧꌠꀋ！ ꆍꐯꇯꉙꑵꄡꑟ！
ꑞꃅꆏ，ꑳꀊꊆꆹꑸꇱꈭꋏꀐ，
ꉈꑴꑱꌝꆀꐛꅹꃅꋍꊨꏦꀑꒉꑊꒉꊌꀐ。
24 ꆏꋌꄻꅽꀉꂿꀃꃀꇬꊐꄉꌠ、ꅽꈭꋏꌋꑳꀊꊆꑠꃅꉉ：
“ꉢ-ꑳꀊꊆꆹꐥꇐꈀꐥꌠꃅꉢꄻꄉ，
ꉠꊨꏦꀉꄂꃅꄉꃅꃴꃅꄅꉢꁉꄉ，
ꅉꃴꃄꅉꉢꍔꄉ。
25 ꉡꆹꈰꏅꌠꅉꄜꅇꑠꁳꂿꄐꀋꐥꎻ，
ꈎꌋꆪꄏꌠꁳꇁꒊꅍꈩꅍꐛꎻ。
ꌧꅍꂿꅍꐥꌠꁳꎞꉈꑴꁧꎻ，
ꌧꇐꂿꇐꐥꌠꁳꇯꅝꌠꐛꎻ。
26 ꄚꉡꆹꉠꁏꐚꅇꂷꁳꅇꅐꎻ，
ꉠꊩꌺꄐꇐꏤꇐꁳꃅꐛꎻ。
ꉢꑳꇊꌒꇌꏭ：‘ꀋꎪꃅꊿꇬꀀꇁꌠꉬ’ꄷ；
ꒀꄊꃅꄷꇓꈓꈧꌠꏭ：‘ꀋꎪꃅꋈꀱ，
ꉢꀋꎪꃅꇓꈓꇬꀜꐡꆿꐛꅉꋈꀱꇁꌠꉬ’ꄷ。
27 ꉢꎾꃝꈁꅼꀕꌠꏭ：‘ꀊꃶꁧ！
ꉢꅽꒊꂿꒈꌺꈧꌠꁳꀊꃶꎻ’ꄷ。
28 ꉉꅷꌏꇊꌧꃆꂮꑟꇬꆏ，ꉢ：
‘ꋋꆹꉠꎆꆫꊿꉬ，ꌤꆿꉠꄻꈴꑠꀋꎪꃅꋌꃅꐛ。
ꋌꅇꁵꄉꑳꇊꌒꇌꇓꈓꋈꀱꎻ，
ꅇꉉꄉꌃꎔꑷꂿꅉꃀꋈꄻꎻ’ꄷ”ꄷ。