ꏃꃅꀋꎪꃅꑱꌝꆀꊿꈭꋏꇁ
43
1 ꄚ，ꑸꇱꀋ！ ꆎꄻꌠꑳꀊꊆ，ꑱꌝꆀꀋ！ꆏꋌꄻꄉꂶꌠꀋꃅꑠꃅꉉ：
ꆏꏸꄡꏦ! ꑞꃅꆏ，ꉢꆎꈭꋏꀐ；
ꉢꅽꂓꇴꄉꆎꇴꍝꋺ，ꆎꆹꉠꃤꉬ。
2 ꆏꒉꇬꈴꐺꇬ，ꉢꀋꎪꃅꆎꐊꐺ，
ꆏꒉꈫꐺꇬꑌ，ꒉꂋꅽꄩꉱꀋꇁ；
ꆏꃆꄔꇬꈴꐺꇬ，ꃆꄔꆏꀋꇉ，
ꃆꄔꉐꆂꈍꃅꑌꅽꇭꀧꀋꐗꌠꉬ。
3 ꑞꃅꆏ，ꉡꆹꑳꀊꊆ-ꅽꏃꃅꌋ，
ꑱꌝꆀꃤꌃꎔ-ꅽꈭꋏꌋꂶꌠꉬ；
ꉢꉞꏹꁳꇁꅽꋊꁌꐛꎻ，
ꇴꏃꌋꆀꑭꀠꁳꅽꎃꊐꎻ。
4 ꉢꆎꉂ，ꆏꉢꉜꌊꂸꂷꁌꇐꈤꌠꃅꄉꐛꅹ，
ꉢꌞꊿꁳꅽꎃꊐꎻ，
ꀉꁁꊿꋅꉢꌌꅽꀑꇬꀠ。
5 ꆏꏸꄡꏦ！ꑞꃅꆏ，ꉢꆎꐊꐺ；
ꉢꀋꎪꃅꁭꅐꏭꄉꅽꌺꇖꊂꋊꉢꏃꇁ，
ꁮꐚꏭꄉꆍꊇꉢꇱꏣꏑꌊꉈꑴꇁ。
6 ꉢꒈꀑꏭ：“‘ꏮꎼꇁ!’ꄷ。
ꒈꂪꏭ：‘ꄝꎼꇁ！’ꄷ，
ꈜꎴꃅꄷꄉꉠꌺꉢꏃꉈꑴꇁ；
ꃅꋮꆸꈈꄉꉠꀋꃋꉢꏃꉈꑴꇁ。
7 ꊿꋋꈨꆹꋍꂷꋑꀋꋒꉠꊨꏦꀑꒉꑊꒉꐛꅹꃅ，
ꉢꋉꉢꄻ、ꉢꆺꉢꑣꄉꇈ，
ꉠꂓꇬꈴꄉꉢꇳꍝꌊꉠꇂꃴꐥꇁꈧꌠꉬ。
8 ꆏꑴꌠꉹꁌꑓꅑꂿꀋꉆꈧꌠ、ꅺꅑꈨꀋꉆꈧꌠꐯꇯꏃꅐꇁ！
9 ꇩꏤꈀꐥꌠꃅꋍꈜꏓꇁꌐ，
ꉹꁌꈀꐥꌠꃅꋍꈜꅐꇁꌐ。
ꋀꈬꄔꇬꈀꄸꂷꌤꆿꋍꑠꉉꀽꄎ？
ꈀꄸꂷꌤꆿꀋꉊꂴꏭꇫꅐꑠꉉꉪꇰꄎ？
ꋀꁳꅇꊪꌬꊿꏃꇁꑲꆀ，ꋀꃤꇗꅉꊒꌠꉜꅐꇁꉆꎻ，
ꊿꇫꂿꈧꌠ：‘ꇯꍝꃅꐯꑴꅊꇈ’ꃅꉉꌠꐤꐥꉏꂿ。
10 ꆍꊇꆹꉠꅇꊪꌬꊿ，ꉢꇱꌊꄻꄉꌠꁏꐚꉬ。
ꆍꁳꉢꌥꉡꂿꎻ，ꉢꑅꉡꄻꎻ，
ꉢꋋꂷꑳꀊꊆꉬꌠꊨꄅꎻꂿꄷꌠ。
ꉠꂾꆹꄻꄉꌠꌋꃶꐚꑠꂷꀋꐥ，
ꉠꊂꑌꀋꎪꃅꑠꂷꇬꀋꐥ。
ꋍꑠꆹꉢꑳꀊꊆꉉꌠꉬ。
11 ꉢꀉꄂꑳꀊꊆꉬ，
ꉢꀉꄂꑲꆏ，ꀉꁁꈭꋏꌊꂷꀋꐥ。
12 ꉢꄛꇰꋺ，ꉢꊾꈭꋏꋺ，ꉢꉉꀽꋺ，
ꆍꈬꄔꌞꊿꋅꌦꌋꑠꇬꀋꐥ。
ꆍꊇꆹꉠꅇꊪꌬꊿ，ꉡꆹꏃꃅꌋꉬ。
ꋍꑠꆹꑳꀊꊆꉉꌠꉬ。
13 ꀃꌋꀊꆨꂴꇬꂾꇯꆐ，ꉡꆹꏃꃅꌋꂶꌠꉬ，
ꈀꄸꂷꑌꉠꇇꈐꇬꄉꆶꁧꀋꄐ。
ꉢꌤꃅꆿꃅꇬ，ꈀꄸꂷꇬꋋꇬꇈꄐ？
ꀠꀘꇍꄉꆶꇁ
14 ꑳꀊꊆ-ꆍꈭꋏꌋ、 ꑱꌝꆀꃤꌃꎔꂶꌠꑠꃅꉉ：
“ꆍꐛꅹꃅ，ꊿꉢꁆꌌꀠꀘꇍꆹꎻꀐ；
ꏦꇍꄂꊿꁳꂽꁈꈨꌟꃅ，
ꆳꂾꑍꃀꑍꊀꋀꌌꈌꍓꅍꃅꄉꈧꌠꑌꄉꆶꀁꋌꇁꎻꌠꉬ。
15 ꉡꆹꑳꀊꊆ-ꆍꌃꎔꂶꌠ，
ꑱꌝꆀꄻꂠꂶꌠ，ꆍꃰꃅꉬ”ꄷ。
16 ꑳꀊꊆꄹꇬ，ꋋꆹꎾꃝꈬꄔꇬꄉꈝꃀꀺ，
ꎽꒉꆈꃃꃆꅉꇬꄉꄇꈜꄻ；
17 ꋌꉞꏹꌉꈿꂽꍯ、ꃆꀞ、ꂽꑼꌋꆀꌳꈄꀬꅑꌠꁳꐯꇯꅐꇁꎻꇈ，
ꐚꇬꄚꄉꉈꑴꄓꇁꀋꄐꎻ。
ꋋꈨꐯꇯꂷꇭꌦꌠꌟꃅꈔꑍꌐꌠꉬꑴꄷ。
18 ꑳꀊꊆꄹꇬ：‘ꆍꊇꀋꉊꂴꌤꆿꑠꄡꎺꄡꄅ，
ꀃꌋꀊꆨꌤꆿꑠꑌꄡꉪꄡꈾ。
19 ꇬꉚꄉ！ ꉢꌤꀊꏀꑠꐘꃅꌠꉬ，
ꀃꑍꋋꄮꆏ，ꇫꅐꇁꀐ，ꆍꋋꅉꀋꐚꅀ？
ꉢꀋꎪꃅꇈꈬꅔꈋꇬꈝꃀꀺ，
ꅔꈋꂤꏂꀠꁳꒊꃀꈴꇁꎻ。
20 ꇈꈬꇬꑋꁮꉆꁮꃅꄉꉡꁌꒉ，
ꀉꐩꌋꆀꅐꅑꇢꉠꑌꉡꀮꄑ；
ꑞꃅꆏ，ꉡꆹꇈꈬꅔꈋꁳꀆꐒꁖꇁꎻ，
ꅔꈋꂤꏂꀠꁳꒊꃀꈴꇁꎻꄉ，
ꄻꉠꉹꁌꌋꆀꊿꉢꌊꄻꄉꈧꌠꄐ。
21 ꉹꁌꋋꈨꆹꉠꊨꏦꎁꃅꉢꄻꄉꌠ，
ꋀꁳꉡꀮꉢꄑꎻꂿꄷꌠꉬ。
ꏃꃅꌋꑱꌝꆀꊿꏭꊨꀖ
22 ꑸꇱꀋ！ꆏꉠꏯꀋꇖꀋꂟ；
ꑱꌝꆀꀋ！ꆏꉡꂿꇬꉌꅧꑓꇤ。
23 ꆏꅽꑿꌞꌌꐗꌐꆦꑝꅍꃅꉢꁳꀋꇁ，
ꉡꁌꒉꄉꎇꃀꍅꑓꌞꌌꉡꆦꑝꑌꀋꇁ。
ꉢꅽꄹꆦꑝꅍꇖꄉꆏꁳꎭꏿꎻꀋꋻ，
ꅽꄹꅿꉗꌒꋌꇖꄉꆏꁳꉌꅧꑓꇤꎻꑌꀋꋻ。
24 ꆏꐎꂷꌌꃅꐴꅿꉗꌒꌠꃼꌊꉢꁳꇁꀋꋻ，
ꆦꑝꎇꃀꎆꋌꆏꌌꉢꁳꂊꅗꎻꑌꀋꋻ；
ꀱꆽꃅꌊꉢꄈꃅꆍꑽꃤꐛꅹꃅꐙꄏꌍꆜꏽ，
ꆍꄸꃤꐛꅹꃅꉌꅧꑓꇤꇧꁠꀐ。
25 ꉢꀉꄂꉠꊨꏦꐛꅹꃅꅽꃅꑽꏿꑽꅍꉢꌩꎳꇫꎭ，
ꆍꑽꃤꑌꉢꇬꀋꎺꀋꄅꀐ；
26 ꉢꀋꎺꌠꆏꁨꉉꉡꇰ！ꉪꊇꋍꈜꄉꅔꀥꇁ；
ꆏꅽꄿꐨꃅꁨꉉꄉ，ꅽꊨꏦꑽꅍꀋꐥꌠꉜꅐꇁꉆꎻ。
27 ꅽꀋꁌꀋꁧꑽꃤꐆ，
ꅽꏃꌋꂠꌋꉡꆽꁏ；
28 ꑠꅹ，ꉡꆹꌃꎔꑷꂿꇬꆦꑝꊿꈧꌠꁳꎲꅐꁁꅐꎻ，
ꑸꇱꁳꈔꑍꎻ，ꑱꌝꆀꁳꊿꌌꐔꏼꎻ’ꄷ”ꄷ。