ꑱꌏꑸꄯꒉ 42

ꏃꃅꌋꁏꐚ

1 ꇬꉚ! ꋋꆹꉠꁏꐚ，

ꉢꄎꑣꄉ、ꉢꌊꄻꄉ、ꉠꄻꈴꂶꌠꉬ！

ꉠꒌꉢꄻꋋꇖꀐ，

ꋋꆹꀋꎪꃅꑖꉬꇗꅉꋌꁊꇩꏤꈀꐥꌠꁵꌠꉬ。

2 ꋌꀋꏟꀋꏈ，ꀋꇴꀋꉔ，

ꏢꈫꏦꈜꇬꊿꁳꋍꃚꋒꑌꈨꀋꎽ。

3 ꀟꄖꆸꐔꂯꄉꌠ，ꋌꐔꇬꀋꎭ，

ꂷꇭꌦꄉꏽꌠꑌ，ꋌꂡꇬꀋꎭ。

ꋋꆹꀋꎪꀋꎙꃅꄉꑖꉬꇗꅉꄜꁊ。

4 ꋌꉌꂵꀋꊰ，ꏷꑌꀋꏦ，

ꅑꅸꑖꉬꇗꅉꋌꄻꋌꋉꋧꃅꄈꄮꑟ；

ꎿꅔꈧꌠꃅꄉꋍꉙꅇꂘꅇꇁꉚꌐ。

5 ꏃꃅꌋ-ꑳꀊꊆꆹꃅꃴꄻ，ꃅꑆꍔ，

ꃄꅉꋌꄻꋌꍔꄉ，ꅐꇐꋌꄻꃄꅉꇬꁖꇁꎻ，

ꌗꋌꄻꐧꇁꃰꊿꊐ，ꀑꇬꋌꄻꊿꈛꎼꃄꅉꇬꐺꌠꇖ。

6 ꋌꑠꃅꉉ： “ꉢꑳꀊꊆꆹꑖꉬꈴꄉꆎꇳꍝ，

ꅽꇇꄎꑣ，ꆎꀧꌋꃅ，

ꅽꇇꄧꈴꄉꋧꃅꃰꊿꌋꆀꅇꏤꒃꄉ，

ꆏꁳꇩꏤꈀꐥꌠꁨꑭꐛꎻ。

7 ꑓꀋꂿꌠꑓꋪꋌꁉꎼꇁ，

ꏦꑳꇬꊾꇬꋌꋊꎼꇁ。

ꏦꑳꆈꋧꋪꅉꀀꌠꋌꏃꅐꇁ。

8 ꉡꆹꑳꀊꊆ，ꋋꂷꆹꉠꂓꉬ。

ꉢꀋꎪꃅꉠꀑꒉꑊꒉꄻꌦꌋꀉꁁꑠꀋꄀ，

ꉢꈁꊌꌠꍗꅇꀴꅇꑠꑌꄻꌦꁱꇓꁱꁶꄉꒃꄉꑠꀋꁵ。

9 ꇬꉚ！ꌤꆿꀋꉊꂴꈁꉉꄉꈧꌠꆹꅇꅐꀐ，

ꉢꀋꃅꌤꆿꀊꏀꑠꈨꄜꆍꊇꇰ，

ꌤꆿꇫꅐꀋꇁꑴꌦꑠꈨꉉꆍꇰꂿ。

ꏃꃅꌋꏭꍖꀴꉙꇐ

10 ꇉꇵꌊꎿꄩꐺꌠꌋꆀꎿꇬꈀꐥꌠ，

ꎿꅔꈧꌠꌋꆀꎿꅔꇬꈁꀀꌠ，

ꐯꇯꑳꀊꊆꏭꑵꉙꀊꏀꑵꄡꑟ，

ꃅꋮꆸꈈꄉꋋꍗꋋꀴ。

11 ꇈꈬꅔꈋꌋꆀꅔꈋꇬꇓꈓꈧꌠꃚꐓꄉꀮꄑꄡꑟ，

ꏸꄊꊿꀀꅉꇬꁡꇤꈧꌠꉌꇿꃅꇳꉔꄡꑟ；

ꑭꇁꉹꁌꈧꌠꈮꈜꃅꉙꑵ，

ꁦꀑꁧꄩꄉꇳꉔꄡꑟ。

12 ꋀꊇꀑꒉꑊꒉꏮꑳꀊꊆꄀꅊꇈ，

ꎿꅔꈧꌠꇬꄉꋋꍗꋋꀴꅇꂷꄜꁊꅊꇈ。

13 ꑳꀊꊆꆹꀋꎪꃅꂽꌳꈄꀬꅑꌉꈿꁦꂷꌡ，

ꂽꑼꉌꂵꁨꐞꄑ、ꁮꂿꐚꂿꊎꉻꉺꂷꌡ，

ꋌꇳꉔ，ꃚꐕꉐꐓꄉꏅ，

ꁮꐚꋌꌉꇧꁠꌐ。

14 ꉢꈍꉗꏢꅇꀋꉉ，ꈍꉗꏢꁱꀋꐭꀐ；

ꀋꃃꆏꀋꃀꀉꑳꒆꇁꂯꄉꑠꂷꌟꃅꀊꅰꃅꏅ，

ꌗꁮꌗꏂꄑ。

15 ꉢꁧꇂꇈꌺꈧꌠꁳꈥꅐꀜꅐꎻ，

ꁬꆰꋍꄩꅿꌠꁳꀊꃶꌦꌐꎽ；

ꉢꒊꃀꒈꌺꈳꅉꁳꇁꂤꏂꐦꀞꐛꎻ。

ꒊꄜꒈꇓꁳꀊꃶꃸꌣꀕꌐꎽ。

16 ꉡꆹꑓꁖꌠꉢꏃꈝꃀꋀꇬꀋꌧꌠꈴ，

ꋀꏁꌌꈝꃀꋀꇬꍪꀋꋻꌠꍬ；

ꋀꂾꄉꆈꋧꋪꌠꉢꄻꁨꇅꀕꌠꐛ。

ꈝꃀꇂꈪꌠꉢꋊꉢꍬꎃꊒꃅꄉ。

ꉢꀋꎪꃅꌤꋋꈨꃅꌠꉬ，

ꋀꊇꈍꃅꑌꉢꇱꍞꇬꀋꎭ。

17 ꄚꊿꌩꁱꇓꁱꁶꄉꒃꄉꈧꌠꉘꇉꌠꌋꆀꌦꁱꌊꁱꏸꄉꎵꄉꑠꏭ： “ꆍꊇꆹꉪꌋꉬ”ꃅꉉꑠꆏ，

ꈹꇫꎭꄉ，ꋀꁳꎲꅐꁁꅐꇧꁠꎻ。

ꑱꌝꆀꊿꆹꉙꅇꂘꅇꊪꀋꅲ

18 ꆍꊇꊿꇉꁧꋋꈨ，ꇫꅲꄉ！

ꆍꊇꊿꑓꁖꋋꈨ，ꇬꉚꄉ！

ꆍꊇꊌꂿꇁꀐ！

19 ꈀꄸꂷꉠꁏꐚꏭꀋꋌꃅꑓꁖ？

ꈀꄸꂷꉠꊩꌺꉢꁆꎼꁧꂶꌠꏭꀋꋌꃅꇉꁧ？

ꈀꄸꂷꉡꌋꆀꏤꐪꒃꄉꂶꌠꏭꀋꋌꃅꑓꁖ?

ꈀꄸꂷꑳꀊꊆꁏꐚꏭꀋꋌꃅꑓꁖ？

20 ꌤꆿꈍꑋꆏꊌꂿꇬ，ꆏꇫꐞꀋꉅ，

ꅳꀧꍔꄉꅲꇬꑌ，ꆏꇬꊊꀋꈨ。

21 ꑳꀊꊆꆹꋍꊨꏤꑖꉬꐛꅹꃅ，

ꉌꇿꃅꄹꏦꋌꄻꐤꒉꇰꀋꃀꃅꄉ。

22 ꄚꉹꁌꋋꈨꆹꊿꇑꊿꁮꌊꁧꌐ，

ꐯꇯꊰꇁꃅꐬꃹ，ꊿꈢꏦꑳꊐ；

ꊿꁮꌊꁧꇬ，ꊾꂷꋀꈭꋏꌠꀋꊌ；

ꊿꐆꌊꁧꇬ，ꊾꂷꇫꁌꇁꌠꀋꊌ。

23 ꆍꈬꄔꈀꄸꂷꅳꀧꍔꄉꅇꂷꋋꈨꅲꌠꊌ？

ꈀꄸꂷꋌꊂꆏꉌꂵꑘꊐꄉꅲ？

24 ꈀꄸꂷꑸꇱꋌꏮꇑꌠꑣꌠꇇꈐꊐ？

ꈀꄸꂷꑱꌝꆀꋌꄻꊿꁳꐆꌊꁧꎻ？

ꋋꆹꉪꊇꑽꃤꐆꄉꇫꁏꌠꑳꀊꊆꀋꉬꅀ？

ꋀꊇꋍꇗꅉꈝꃀꍬꀋꅲ，

ꋍꉙꅇꂘꅇꅲꀋꅲ。

25 ꑠꅹ，ꋌꇨꇅꃃꅩꌬꀕꃅꋀꊝ，

ꌉꆳꈀꇨꀕꌠꇁꑱꌝꆀꇭꀧꌸꎻ。

ꋍꈫꋍꇋꃄꐔꅑꀐꇬ，ꋌꇬꀋꌋ，

ꇭꀧꃆꄔꐗꀐꇬꑌ，ꋍꉌꂵꀋꃹ！