ꏃꃅꌋꆹꑱꌝꆀꊿꇇꀤꂶꌠꉬ
41
1 ꎿꅔꈧꌠꀋ！ꆍꊇꉠꂾꄡꁵꍂꃅꄉ；ꉹꁌꈀꐥꌠꁳꉈꑴꊋꑌꏢꑌꇁꎻ，
ꋀꁳꈴꁨꄉꅇꉉꇁꎻ，
ꉪꊇꋍꈜꄉꐮꈌꊪꇁ。
2 ꈀꄸꂷꁭꅐꏭꄉꊾꂷꋌꄖꄑꎼꇁꇈ，
ꑖꉬꇬꈴꄉꊿꂶꌠꋌꇴꌊꋍꂾꇁ？
ꈀꄸꂷꇩꏤꈧꌠꃅꋌꏮꊿꋋꂷꁵꇈ，
ꋌꁳꃰꃅꈀꐥꌠꄩꏲꎻꌠꉬ？
ꈀꄸꂷꃰꃅꈧꌠꈑꋧꌟꃅꋌꏮꊿꋋꂷꅅꃅꈌꇬꊐ，
ꏜꏾꃅꆳꁏꌊꁧꌠꌟꃅꋌꏮꊿꋋꂷꐳꉹꇂꃴꊐꌠꉬ？
3 ꋌꃰꃅꈧꌠꈹꇬ，
ꈝꃀꋌꇫꈴꀋꋻꌠꈴꐺꄷꑲꑌ，
ꋬꂻꃅꄉꈴꐱꁍ。
4 ꌤꋍꑠꈀꄸꃅꐛꌠꉬ？
ꈀꄸꂷꀃꌋꀊꆨꂴꇬꂾꇯꆐꃅꋊꈍꃅꐙꇁꌠꋌꄛꇰꄉꌠꉬ？
ꋋꆹꉢꑳꀊꊆꉬ！
ꉡꆹꂴꇬꂾꂶꌠꉬ，
ꊁꌐꂫꂶꌠꑌꉬ。
5 ꎿꅔꈧꌠꋍꑠꋀꊌꂿꇬꆏ，ꐯꇯꏸꏦꌐ，
ꃅꋮꆸꈈꑌꑑꃶꏾꌌꀕ，
ꋀꊇꁨꏭꉜꄉꇁ，
6 ꈀꄸꑌꐮꇇꀤꇇꄻꄉ，
ꊨꏦꃺꑌꏭ：“ꉌꂵꇷꄙꃅꄉ！”ꄷ。
7 ꌩꊨꇔꇷꆏꐍꋩꇔꇷꈐꊟꊋꊡ，
ꇁꄵꌊꇇꊂꌎꌠꆏꎸꄁꌠꏭꊋꊐꌗꊐ，
ꎷꍈꇔꇷꏭ：“ꍈꌊꉾꐯꉾ！”ꄷ。
ꌦꁱꌊꁱꈧꌠꊰꇁꏦꄉ，
ꎸꇺꌊꋀꋯꈬꃅꄉ。
8 ꄚꑱꌝꆀꆹꉠꁏꐚꉬ，
ꑸꇱꆹꉢꌋꉢꄻꄉꌠ，
ꉠꐋꀨꑸꀨꇁꉳꊂꋊꉬ。
9 ꆎꆹꃅꋮꆸꈈꄉꉢꏃꅐꇁꌠ，
ꃄꇖꎐꄉꉢꇴꌊꇁꌠ，
ꉢꅽꏯ：“ꆎꆹꉠꁏꐚꉬ，
ꆏꉢꌋꉢꄻꄉꌠ，ꉢꈍꃅꑌꆎꇤꇬꀋꎭ”ꄷ。
10 ꆏꏸꏦꌋꀋꌸ！ ꑞꃅꆏꉡꆹꆏꈽꐥ，
ꆏꃨꆰꌋꀋꌸ！ ꑞꃅꆏꉡꆹꅽꏃꃅꌋꉬ，
ꉢꀋꎪꃅꆏꁳꈫꈈꎻ，ꆎꇇꀤ，
ꉠꑖꉬꌠꇇꇀꑳꁆꌠꌊꆎꄏꆎꑣ。
11 ꇬꉚꄉ！ ꇨꇅꃃꆎꊝꈧꌠꉬꇮꎲꅐꁁꅐꌐ，
ꆎꄙꆎꑣꈧꌠꐯꇯꈍꃅꑌꂿꄐꀋꐥꃅꈔꑍꌐꌠꉬ。
12 ꆎꌋꆀꐮꉈꈽꈧꌠꆹ，
ꆏꈍꃅꎹꑌ，ꋀꆏꋌꎷꊌꀋꄐ；
ꆎꌋꆀꐯꌉꐮꆳꈧꌠꆹꂿꄐꍈꀋꐥꃅꐘꀋꈨꌐ。
13 ꑞꃅꆏ，ꉢꑳꀊꊆ-ꅽꏃꃅꌋꆹ，
ꀋꎪꃅꅽꇇꇀꑳꁆꌠꄏꄉ，
ꅽꏯ：“ꏸꄡꏦ！ꉢꀋꎪꃅꆎꇇꀤ”ꄷꉉꌠꉬ。
14 ꁯꄸꌡꌠꑸꇱ，ꑱꌝꆀꊿꀋ!
ꏸꄡꏦ！ ꉢꀋꎪꃅꆎꇇꀤ；
ꆎꈭꋏꌠꆹꑱꌝꆀꌃꎔꂶꌠꉬ。
ꋍꑠꆹꑳꀊꊆꉉꌠꉬ。
15 ꇬꉚꄉ! ꉢꆏꁳꋙꋩꅍꀊꏀꋖꂷꂰꑳꀕꑠꋬꐛꎻꂿ；
ꆏꑴꌠꁦꌺꇈꌺꈧꌠꋖꋧꐛꃀꐛꇫꎭ，
ꁦꀮꌺꈧꌠꋩꀖꁌꌡꇫꎭ。
16 ꆏꋀꆳꋀꇸꄉ，ꃅꆳꁳꁏꌊꁧꎻ，
ꆲꏂꁳꑄꂱꑱꅉꎭꎻ。
ꄚꆎꆹꑳꀊꊆꆏꌌꅽꉌꇿꐨꃅꄉ，
ꑱꌝꆀꌃꎔꂶꌠꆏꌌꀑꒉꑊꒉꅍꃅꄉꌠꉬ。
17 ꌢꎭꌟꁧꌠꀆꐒꎹꑴꇬ，ꀆꐒꋀꋌꎷꀋꊌ。
ꋀꊇꈌꃶꒉꌤ，ꉐꆂꃵꌣꀕ。
ꄚꉢꑳꀊꊆꆹꀋꎪꃅꈌꁧꋀꁳ，
ꉢꑱꌝꆀꏃꃅꌋꆹꈍꃅꑌꋀꉢꇤꇬꀋꎭ。
18 ꉡꆹꉘꁌꌃꀠꀕꅉꇬꄉꒊꃀꉢꄻꇫꈴꇁꎻ，
ꇁꄿꇬꄉꒉꐬꇬꁖꇁꎻ，
ꉢꅔꈋꂤꏂꀠꁳꇁꒈꇓꐛꎻ，
ꃄꅉꃵꌣꀕꅉꁳꒉꐑꇫꍻꇁꎻ 。
19 ꉢꇈꈬꅔꈋꇬꄉꌿꁧꊪ、ꊛꇵꌩꊪ、ꏃꆺꌩꊪ、ꏝꃴꀋꍰꌩꊪ。
ꅔꈋꂤꏂꀠꇬꄉꄮꁧꊪ、ꎺꁧꌋꆀꀠꆿꊪꄉ，
20 ꊿꁳꊌꂿꎻ，ꅉꐚꎻ，ꉪꏡꎻ，ꐝꉅꎻ；
ꋍꑠꆹꑳꀊꊆꊨꏦꊪꄉꌠ，
ꑱꌝꆀꌃꎔꂶꌠꄻꄉꌠꉬ。
ꌋꃶꀋꐚꌠꉘꇉꀋꉆ
21 ꑳꀊꊆꆏꌦꁱꌊꁱꈧꌠꏭ：
“ꆍꌤꃆꆿꑘꈧꌠꌌꁨꉉꇁ”ꄷ，
ꑸꇱꃰꃅꆏ：“ꆍꊫꄲꌐꂷꈧꌠꀖꎼꇁ”ꄷ。
22 ꋀꁳꁨꄉꊁꏭꌤꆿꑞꇫꅐꇁꌠꉉꉪꇰꇁꎻ！
ꋀꁳꌤꆿꂴꏭꇫꅐꀐꈧꌠꉉꉪꇰꄉꉪꁳꉪꏡꎻ；
ꅀꊁꏭꌤꆿꑞꇫꅐꇁꌠꉉꉪꇰꄉ，
ꉪꁳꌤꆿꌐꂫꈍꃅꐙꌠꅉꐚꎻ。
23 ꆍꊇꃆꏂꊂꑋꌤꆿꈧꌠꉉꉪꇰꄉ，
ꉪꁳꆍꊇꆹꌊꈨꉬꌠꅉꐚꎻ！
ꆍꊇꌒꃤꅀꉮꃤꄻꇫꅐꇁꎻꇈ，
ꉪꁳꋍꑠꉪꊌꂿꄉ，ꋌꇰꈌꉛꀕꎻ。
24 ꇬꉚ！ꆍꊇꆹꊇꅉꇬꑞꑌꀋꉬ，
ꆍꃅꐨꑽꑌꑠꑌꂿꄐꍈꀋꐥ；
ꆍꏭꇗꅉꃅꈧꌠꆹꊿꋋꌂꏷꈌꀕ。
25 ꉡꆹꒈꀑꏭꄉꊾꂷꉢꄖꄑꎼꇁ，
ꋌꉘꁮꅏꅉꃅꄷꄉꇁ，ꉠꂓꄜꄉꈼꂟ；
ꋋꆹꌦꏭꄔꌠꌟꃅꏲꌋꂠꌋꈧꌠꋌꌌꄔꈻ，
ꊗꑗꇔꇷꀡꆃꄔꎪꌠꌟꃅꌅꈌꌬꌠꋌꌌꄔꎪ。
26 ꈀꄸꂷꀃꌋꂾꀊꆨꇯꆐꌤꋌꐘꄛꇰꄉꉪꁳꅉꐚꎻ？
ꈀꄸꂷꂴꇯꆐꐝꉅꃅꉉꀽꄉ，ꉪꁳ“ꋌꉉꌠꀋꑽ”ꄷꉉꎻ？
ꊾꂷꑠꃅꄛꇰꌠꀋꐥ，
ꊾꂷꑠꃅꉉꀽꌠꀋꐥ，
ꊿꆍꅇꂷꑠꈨꋺꂷꑌꀋꐥ。
27 ꉢꂴꇬꂾꑭꉢꇓꈓꏭꉉ：“ꇬꉚ! ꋀꄚꇬꍰ！”ꄷ。
ꉢꊿꅇꃅꅇꌒꄜꁊꑠꂷꁆꌌꑳꇊꌒꇌꇁꎻꂿ。
28 ꄚꉢꉜꈴꌐꇬ，ꊿꋍꂷꂯꀋꐥ，
ꉢꋀꏭꅱꄮꇬ，
ꋀꈬꄔꇖꊩꄟꃀꉠꏯꅇꂷꇬꀱꄎꑠꂷꀋꐥ。
29 ꇬꉚ！ꋀꆹꐯꇯꂿꄐꀋꐥ，
ꋀꈀꃅꈁꑽꈧꌠꃅꄉꀈꈥꀕꌐ，
ꋀꏸꄉꎵꄉꌠꌦꁱꌊꁱꈧꌠꑌꃅꆳꌡ，ꀈꈥꀕ。