ꏃꃅꌋꋍꉹꁌꏭꉌꌒꄀ
40
1 ꆍꏃꃅꌋꄹꇬ：“ꉌꌒꄀ，ꉠꉹꁌꏭꉌꌒꄀ。
2 ꑳꇊꌒꇌꇓꈓꏭꉌꌒꄀꅇꉉ，
‘ꋍꎭꇂꅦꇨꄚꄉꇔꀐ，
ꋍꑽꃤꄚꄉꏆꃤꊌꀐ，
ꋌꋍꊨꏦꑽꃤꈧꌠꒉꄸꃅ，
ꑳꀊꊆꌌꁦꎆꃅꇇꇩꍈꅗꀐ’ꃅꄛꇰ”ꄷ。
3 ꊾꂷꃚꐕꉐꐓꄉ：
“ꇈꈬꅔꈋꇬꄉꑳꀊꊆꎁꃅꈜꄎꈜꏤꄉ，
ꂤꏂꅔꀞꇬꄉꉪꏃꃅꌋꎁꃅꄇꈜꄻꎃꃅꄉ。
4 ꇉꈫꇁꄿꈀꐥꅉꃅꐽꐯꊯ，
ꁦꌺꀊꂥꀁꂥꌠꃅꑷꊱꆺꀮꃅꄉ，
ꈛꅂꅑꅉꄻꐾꑳꃅꄉꌐ，
ꃄꎭꃪꅧꅈꑌꄻꐦꀞꃅꄉꌐ。
5 ꑳꀊꊆꀑꒉꑊꒉꀋꎪꃅꄉꇫꅐꇁ，
ꌦꑌꌗꑌꈀꐥꌠꃅꐯꇯꇬꊊꂿꌐꌠ，
ꑞꃅꆏ，ꋍꑠꆹꑳꀊꊆꊨꏦꉉꌠꉬ”ꄷꉉ。
6 ꃚꋒꑵꆏ：“ꆏꁨꇳꉔ！”ꄷ。
ꉡꆏ：“ꉢꑞꇳꉔꂯ？”ꄷ。
ꌦꑌꌗꑌꈀꐥꌠꃅꁬꆰꌡꌐ，
ꋀꈁꎔꈀꃨꐨꆹꅔꊂꁬꃨꌡ。
7 ꑳꀊꊆꌗꇬꂡꄷꌦꆏ，
ꁬꆰꈬꐙ，ꃧꀕꃨꊰꁧ，
ꃰꊿꆹꇯꍝꃅꁬꆰꌡ。
8 ꁬꆰꀋꎪꃅꄉꀊꃶꌦ，ꃧꀕꀋꎪꃅꄉꃨꊰꁧ，
ꉪꏃꃅꌋꅇꂷꀉꄂꐩꋊꐩꍂꃅꀋꑍꀋꈤꌠꉬ。
9 ꌒꅇꄜꌠꑭꉢꇓꈓꀋ！
ꆏꅂꄩꁦꀑꀊꂥꅉꇬꆹ；
ꌒꅇꁊꌠꑳꇊꌒꇌꇓꈓꀋ！
ꆏꃚꐓꉐꐓꄉꇳꉔ，
ꇳꉔꄮꇬꏸꄡꏦ，
ꆏꒀꄊꇩꏤꇬꇓꈓꈧꌠꏭ：
“ꇬꉚ！ꆍꏃꃅꌋꇁꀐ！”ꄷ。
10 ꇬꉚ！ꌋꑳꀊꊆꆹꀋꎪꃅꊋꃤꈀꇨꀕꃅꇁ，
ꋌꆧꁨꈀꇨꀕꃅꌅꈌꌬ，
ꇬꉚ！ꈁꁠꆹꋍꇇꈐꀀ，
ꈁꁠꋌꌌꊿꋍꂾꐊꈧꌠꏿꇁ。
11 ꋋꆹꆫꃀꂷꊨꏦꑿꈧꌠꆫꉘꌠꌟꃅ，
ꊋꃤꌊꑾꌺꋌꏓꐯꇯ，ꋌꄌꂣꈓꊐꄉ。
ꀅꌳꀅꌳꃅꂴꐊꄉꒀꃀꑾꌺꎑꌠꏃꐺ。
ꏃꃅꌋꆹꑞꑌꌌꇫꄉꀴꀋꉆ
12 ꈀꄸꂷꇇꁮꌊꎿꒉꎖꋺ？
ꈀꄸꂷꇇꏸꌊꃅꃴꐑꋺ？
ꈀꄸꂷꊐꅍꌊꃄꅉꇬꌦꏭꈤꋺ？
ꈀꄸꂷꄇꏣꌊꁦꒉꇈꉬꏣꋺ？
ꈀꄸꂷꋂꏣꌊꁦꀮꇈꀮꏣꋺ？
13 ꈀꄸꂷꑳꀊꊆꒌꎕꑣꄎ？
ꈀꄸꂷꋍꇖꊩꄟꃀꄻꄉꋌꉗꋌꂘꄐ？
14 ꋌꈀꄸꂷꏭꇕꄟꋺ？
ꈀꄸꂷꋌꉗꋌꂘꄉ，ꎃꊒꌠꈝꃀꄐꋌꀦꋻ？
ꈀꄸꂷꌧꇐꂿꇐꄻꋌꁳꋺ？
ꈀꄸꂷꑗꈜꊒꆽꌠꄻꋌꂘꋻꀋ？
15 ꆍꉜꉏ！ꇩꏤꈀꐥꌠꃅꒈꀮꇬꀆꐒꄩꀉꄂꌡ，
ꋂꏣꇬꁉꍰꍈꀉꄂꇗ；
ꆍꇬꉚ！ꎿꅔꈧꌠꋌꐔꌊꆹꇬ，
ꀋꇊꆏꈑꋧꍈꀉꄂꐕꌠꌡ。
16 ꆀꀠꇍꌩꏪꆹꌌꌩꃅꄉꏦꇬꏦꀋꇎ，
ꌩꏪꇬꑋꁮꉆꁮꈧꌠꑌꌌꐗꌐꆦꑝꅍꃅꀋꇎ。
17 ꋍꂾꆹꇩꏤꈀꐥꈧꌠꃅꌗꅍꍈꀋꐥ，
ꇩꏤꋋꈨꇬꐙꀈꈥꐛ，ꋌꉜꇬꌬꍩꍈꀋꐥ。
18 ꈀꄸꂷꆍꌌꏃꃅꌋꄉꀴꉆ？
ꐛꐪꑟꑵꆍꌌꋌꌟꉆꂯ？
19 ꌦꁱꌊꁱꆹ，ꇔꇷꏸꄉꎵꄉꌠ，
ꏂꅪꌊꐍꋩꇔꇷꄟꄉꇙꄉꌠ，
ꐎꎸꉗꌺꑠꑌꋀꋩꇬꄀꄉ。
20 ꊿꌢꎭꌟꁧꐎꏂꅐꀋꄐꈧꌠꆏ，
ꌩꀯꐛꀋꇁꑠꌋꌊꄉ，
ꇔꇷꇔꑴꁳꌦꁱꌊꁱꐚꇬꀋꄚꃅꇫꋦꄎꑠꒃꎻ。
21 ꆍꊇꇫꅉꀋꐚꅀ？
ꆍꊇꇫꈨꀋꋻꅀ？
ꀃꌋꀊꆨꂴꇬꂾꇯꆐꊿꉉꆍꇰꀋꋻꑴꌦꅀ？
ꃄꅉꀕꃀꌆꄉꈭꐨꅑꅸꇁꇬ，ꆍꇫꐞꀋꉅꑴꌦꅀ？
22 ꏃꃅꌋꆹꃄꅉꄩꃰꃅꑋꅉꂶꌠꇬꑌ，
ꋌꉜꇬꐧꇁꃰꊿꆹꍈꀮꈨꌡ。
ꋌꃅꃴꃅꑆꍔꇬꂪꌦꁬꍔꌠꌡ，
ꋌꃅꃴꃅꄅꁉꇬꊿꀀꌠꁁꑳꂷꁉꌠꌡ。
23 ꃄꅉꇬꏲꌋꂠꌋꈧꌠꋌꄻꂿꄐꀋꐥꎻ，
ꋧꃅꇬꀞꇽꌟꒉꈧꌠꋌꄻꌬꍩꀋꐥꎻ。
24 ꋀꊇꆹꊪꄉꀊꉗꍈꀋꐛꑴꌦꌠꌡ，
ꏿꄉꀊꉗꍈꀋꐛꑴꌦꌠꌡ，
ꐴꅿꀊꉗꍈꀋꐛꑴꌦꌠꌡ，
ꋌꌗꇅꂡꄷꌦꆏ，ꀊꃶꌐ；
ꏜꏾꆲꏂꁏꌊꁧꌠꌟꃅꋀꊇꋌꇱꁏꌊꇫꈴꁧ。
25 ꌃꎔꂶꌠꆹ：
“ꈀꄸꂷꆍꌌꉡꄉꀴ、ꉢꌟꃅꄉꉆꂯ？”ꄷꉉ。
26 ꆍꊇꀑꐕꃅꃴꉜ，
ꃅꃴꇬꈁꅑꈧꌠꈀꄸꄻꄉꌠꉬ？
ꈀꄸꂷꃷꁨꇬꈴꄉꃅꃴꈁꅑꌠꃅꋌꏃꅐꇁꇈ，
ꋍꂷꋍꂷꃅꂒꋉꄉꌠꉬ？
ꋋꆹꌅꈌꊋꃤꈀꇨꀕꌠꌬꄉ，
ꋀꁳꋍꂷꂯꑓꅐꀋꎽ。
27 ꑸꇱꀋ! ꆏꑞꃅ‘ꉠꎭꐪꅦꑌꑳꀊꊆꇬꊊꀋꂿ’ꃅꉉa？
ꑱꌝꆀꀋ！ ꆏꑞꃅ‘ꉠꀋꅑꃆꑘꑳꀊꊆꇬꉚꀋꅲ’ꃅꅫꏒ？
28 ꆏꇫꅉꀋꐚꅀ？
ꆏꇫꈨꀋꋻꅀ？
ꐩꋊꐩꍂꃅꇫꐥꌠꏃꃅꌋꑳꀊꊆ，
ꃅꋮꆸꈈꄻꌠꌋ，
ꋋꆹꐙꄏꌊꆜꄮꀋꐥ，ꊋꁧꌗꁧꄮꀋꐥ；
ꋍꉪꑌꌧꋬꐨꊿꇫꎖꇫꑣꀋꄐ。
29 ꐙꄏꌠꆏ，ꊋꃤꋌꄻꇬꁳ，
ꊋꁧꌠꆏ，ꊋꀥꋌꄻꇬꇯ。
30 ꈎꄜꀊꏀꌠꑌꐙꄏꌊꆜꇁ，
ꈯꄙꊋꌭꌠꑌꀋꎪꃅꐚꇬꄚꇁ。
31 ꄚꑳꀊꊆꉘꇉꈧꌠꆹꊋꏀꌗꏀꑌꇁ；
ꋀꊇꀋꎪꃅꏬꆉꌟꃅꅏꀑꍔꄉꀍꉀꃰ；
ꋀꊇꐳꃅꀥꇬꐚꀋꄏ，ꈛꎼꐹꑌꌋꀋꆜ。