ꑱꌏꑸꄯꒉ 39

ꑭꀕꏦꃰꃅꁨꇐꄉꇐꋌꀖꀠꀘꇍꊩꌺꀨ

1 ꀊꋨꄮꇬ，ꀠꇂꄊꄰꌺꂰꇊꄊ.ꀠꇂꄊꂶꌠꀠꀙꇍꃰꃅꄻ，ꋌꑭꀕꏦꆅꇈꌒꀐꃅꑠꋌꊌꈨꇬꆏ，ꄯꒉꁬꌋꆀꈁꁠꈨꋌꎭꌊꑭꀕꏦꁵꇁ。 2 ꑭꀕꏦꉌꇿꑓꇿꃅꊩꌺꈧꌠꋨꏦꇈ，ꋍꊨꏦꎆꋚꄉꑳꇬꏂ、ꐎ、ꅿꉗꌒꇱꋌ、ꁌꇐꈤꌠꌐꋉꒀꒉꌋꆀꋍꌉꉂꌉꈾꄉꑳꇬꇇꌭꇇꂿꈧꌠꈀꐥꃅꋌꁉꋀꀦ；ꋍꎆꋚꈀꐥꃅꋌꄻꊩꌺꈧꌠꀨꌐꀐ。ꑭꀕꏦꆹꋍꊨꏦꑳꇬꌋꆀꋍꇩꏤꈐꏭꈁꁨꈀꄉꈧꌠꋌꄻꋀꊇꀋꀨꑠꑵꀋꐥ。 3 ꑠꅹ，ꌋꅇꄜꊿꑱꌏꑸꆏꇁꌊꃰꃅꑭꀕꏦꄷꆹꇈ，ꇬꏭ：“ꊿꋋꈨꑟꉉꀋ？ꋀꇿꄉꇁꌠꉬ？”ꄷꅲ，

ꑭꀕꏦꆏ：“ꋀꊇꆹꈜꎴꃅꄷꐛꌠꀠꀘꇍꇩꏤꄉꉡꂿꇁꌠ”ꄷ。

4 ꑱꌏꑸꉈꑴꑭꀕꏦꏭ：“ꅽꑷꂿꇬꑞꋀꊌꂿ？”ꄷ。

ꑭꀕꏦꆏ：“ꉠꑷꂿꇬꈀꎍꈧꌠꃅꋀꊌꂿꌐꀐ，ꉠꎆꋚꈧꌠꉢꄻꋀꀋꀨꌠꋍꑵꂯꀋꐥ”ꄷ。

5 ꑱꌏꑸꆏꑭꀕꏦꏭ：“ꆏꄙꀕꃪꂽꑼꌊꁈꑳꀊꊆꅇꂷꅲꄉ， 6 ꑳꀊꊆꄹꇬ：‘ꇬꉚꄉꅊꇈ！ꃅꑍꄮꈉꑟꇁꂯꄉꀐ，ꅽꈁꁨꈀꄉꌠꌋꆀꎆꋚꅽꁍꁈꊭꄉꅷꀃꑍꋋꄮꑟꈧꌠꐯꇯꊿꁮꌊꀠꀘꇍꁧꌐꇈ，ꋍꍈꂯꇫꋒꀋꇊꌠꉬ； 7 ꅽꊨꏦꌺꇖꋍꈨꋋꈨꀋꎪꃅꊿꁮꌊꀠꀘꇍꃰꃅꑷꂿꇬꄉꊿꎶꄻꁧꌠꉬ’ꄷ”ꄷ。

8 ꑭꀕꏦꆏꑱꌏꑸꏭ：“ꑳꀊꊆꅇꂷꅽꇇꄧꈴꄉꈀꉉꋋꈨꉾꐯꉾ”ꄷ，ꑞꃅꆏ，ꋍꉌꂵꇬ：“ꉢꇫꐥꑴꌦꄮꇬꆹꈍꃅꑌꋬꂻꐼꇉꀕꌠꉬ”ꃅꉪ。