ꑭꀕꏦꆅꌦꄉꏽꀐ
38
1 ꀊꋨꄮꇬ，ꑭꀕꏦꆅꌦꂯꄉꀐ。ꑸꃀꌦꄰꌺꌋꅇꄜꊿꑱꌏꑸꇁꌊꇬꂾꇁꇈ，ꇬꏭ：“ꑳꀊꊆꑠꃅꉉ：‘ꆏꃴꂷꋜꄉꅽꑱꈐꌤꆿꄐꏤꉥꑣꃅꄉꇈ，ꑞꃅꆏ，ꆎꆹꀋꎪꃅꌦ，ꇫꐥꀋꄐꀐ’ꄷ”ꄷ。 2 ꄚꄉ，ꑭꀕꏦꆏꈁꑓꏮꌊꊖꁋꉜꄉꑳꀊꊆꏭ： 3 “ꑳꀊꊆꀋ！ꆏꈀꎭꀕꃅꉢꅽꂾꄉꈏꇤꊋꇤ、ꀋꎪꀋꎙꃅꌤꆿꆏꉜꇬꂄꎔꑠꀉꄂꃅꌠꎺꄉꅊꇈ”ꃅꈼꂟꈭꐨꆏ，ꉌꐒꇁꎭꄉꑳꉨꀐ。4 ꑳꀊꊆꅇꂷꇁꌊꑱꌏꑸꄷꑟꄉ，ꇬꏭ： 5 “ꆏꑭꀕꏦꏭꉉꒉ，ꑳꀊꊆ-ꅽꁍꁈꄊꃥꏃꃅꌋꑠꃅꉉ：‘ꅽꈼꅇꂟꅇꉢꊌꈨꀐ，ꅽꑓꁴꑌꉢꊌꂿꀐ，ꇬꉚꄉ，ꉢꀋꎪꃅꆏꁳꃅꈎꁦꎆꊯꉬꈎꐥꎻ； 6 ꆎꌋꆀꇓꈓꋋꂷꀋꎪꃅꉢꈭꋏꌊꑸꎽꃰꃅꇇꈐꐞ，ꉈꑴꇓꈓꋋꂷꑌꉢꇫꀧꌋꃅꌠꉬ’ꄷ。 7 ꑳꀊꊆꆹꀋꎪꃅꅇꂷꋌꉉꄉꈧꌠꋌꃅꇫꑟꌠꉬ。ꄚꐰꋍꑠꆹꑳꀊꊆꂴꄻꆏꀦꌠꌐꂷꉬ： 8 ꇬꉚꄉꅊꇈ！ ꉡꆹꑸꉳꌦꃤꉘꁮꃄꒌꎖꅍꊯꊭꉢꈻꌊꉈꑴꇁꌠꉬ”ꄷ，ꄚꄉ，ꉘꁮꃄꒌꎖꅍꇯꍝꃅꊯꊭꉈꑴꎞꇁꀐ。
ꑭꀕꏦꈀꎭꀕꉙꇐ
9 ꒀꄊꃰꃅꑭꀕꏦꆅꇈꌒꈭꐨꆏꉙꇐꑠꊱꁱ：
10 ꉠꉂꆏꉡꆹꏀꇗꈬꐎꃅꄉꌦꇫꈴꁧꇈ，
ꋌꊂꇈꉈꆏꌦꊿꐤꅉꃹꁧꀐꎻꈁ。
11 ꉠꉂꆏꉡꆹꈍꃅꑌꋧꃅꋋꂷꇬꄉꑳꀊꊆꂿꀋꄐ，
ꃰꊿꄚꋧꃅꋋꂷꇬꀂꉗꍈꀉꄂꐥꌠꑌꂿꀋꄐꎻꈁ。
12 ꉠꀀꅉꆹꎆꆫꊿꁁꑳꌟꃅꊿꐆꌊꇫꈴꁧ；
ꉠꀑꇬꆹꑵꉌꍹꊿꂪꌦꇙꌠꌟꃅꉢꇙꄉ；
ꉢꑱꉌꇶꌠꇬꄉꋌꑐꇫꎭ，
ꋍꑍꀉꄂꃅꉠꀑꇬꀋꇊꆺ。
13 ꉢꋋꄹꉖꃅꆄꇖꅷꃅꄜ，
ꋌꆿꅪꌟꃅꉠꃷꅍꈀꐥꅉꃅꋌꆹꐔꇫꎭꄉ，
ꋍꑍꀉꄂꃅꉠꀑꇬꀋꇊꆺ。
14 ꉢꏜꏂꁭꆮꌟꃅꏅ，
ꀋꐱꃀꆸꄂꌟꃅꇖ，
ꄤꇖꌟꃅꉩ，
ꉢꆎꇁꉚꀕꉛꌋꆀꑓꐴꊋꀋꑌꀐ，
ꌋꀋ！ꉢꊿꌌꆼꍅꆹꅷꇧꁠꀐ，
ꆏꈀꎭꀕꃅꉡꀧꌋꃅꇁ。
15 ꉢꀉꁁꑞꉉꅍꐥꑴꌦꂯ？
ꋌꈌꁧꉢꁳꄉꈧꌠꆹꋌꃅꐛꌐꀐ。
ꉢꉌꎭꑓꅧꐛꅹ，
ꋋꐥꍂꃅꉌꂵꋓꉪꁨꄉꐥ。
16 ꌋꀋ！ꊿꇫꐥꄎꌠꆹꋍꑠꐛꅹꉬ，
ꉠꒌꑌꋍꑠꐛꅹꃅꇫꐥꌠꉬ；
ꆏꈀꎭꀕꃅꉢꁳꌒꁟꑻꀕꄉꇫꐥꎻꅊꇈ。
17 ꇯꍝꃅꑠꉬ！ꉢꎭꇂꅦꇨꊝꌠꆹꉢꁳꋬꂻꊌꎻꌠ，
ꆏꉡꉂꄉ，ꉠꀑꇬꆏꈭꋏꌊꈔꑍꌠꃅꐬꉱꀋꅑꅉꐞ，
ꉠꑽꃤꈀꐥꃅꆏꍞꅽꊂꎭꄉꄻꉢꏆꀐ。
18 ꌦꊿꐤꅉꆹꅽꏯꍖꀴꀋꉆꌠꉬꅊꇈ，
ꌦꈔꑌꆎꀮꆏꄑꀋꉆꀐ，
ꊿꃅꐬꃹꁧꈧꌠꑌꅽꀋꎪꀋꎙꐨꉘꇉꀋꉆꀐ。
19 ꊿꀋꌦꃅꇫꐥꈧꌠꀉꄂꀃꑍꉢꅽꏯꈀꎭꀕꌠꌟꃅ，
ꅽꏯꈀꎭꀕꉆ。
ꀉꄉꆹꀋꎪꃅꄉꋍꌳꃈꅮꁳꅽꀋꎪꀋꎙꐨꅉꐚꎻ。
20 ꑳꀊꊆꀋꎪꃅꉡꈭꋏꇁ，
ꑠꅹ，ꉡꆹꉠꐥꍂꃅꋍꑷꂿꇬꄉ，
ꈷꂢ、ꉙꑵꇬꎷ。