ꑱꌏꑸꄯꒉ 37

ꃰꃅꊿꋌꇤꅷꑱꌏꑸꇖꂟꆹꎻ

1 ꑭꀕꏦꃰꃅꂶꌠꆹꅇꂷꋋꈨꀕꇬꆏ，ꋍꃢꈜꋌꐞꏅꇫꎭꇈ，ꃆꁁꄻꈚꄉꑳꀊꊆꑷꂿꇬꃹꆹꀐ。 2 ꑭꀕꏦꆏꃰꃅꑷꂿꏲꌠꑱꆀꑸꏢ、ꂷꋶꏲꌋꎹꀨꇂꌋꆀꆦꑝꊿꀎꋏꈧꌠꋌꁆꌊꃆꁁꄻꈚꄉ，ꑸꃀꌦꄰꌺꌋꅇꄜꊿꑱꌏꑸꂶꌠꄷꒉꎻ。 3 ꋀꊇꌋꅇꄜꊿꑱꌏꑸꏭ：“ꑭꀕꏦꃰꃅꄹꇬ，ꀃꑍꆹꐤꇨꐤꊋ、ꑗꉘꊝ、ꊿꌌꐔꏼꇧꁠꑠꑍꉬ，ꀋꇊꆏꀋꃀꂷꀉꑳꒅꄮꑟꇈ，ꊋꀋꑌꄉꒆꎼꇁꀋꄐꌠꌡꀐ。 4 ꑸꎽꃰꃅꋍꂽꏃꌊꁈꂶꌠꋌꁆꌌꐩꋊꐩꍂꃅꇫꐥꌠꏃꃅꌋꏭꉙꉎꇁ，ꑳꀊꊆ-ꅽꏃꃅꌋꆹꉙꅇꉎꅇꑠꋌꊌꈨꄉ，ꇬꏭꊨꀖꇬꌬꀋꄿ。ꆏꈀꎭꀕꃅꃚꐕꉐꐓꄉꉹꁌꇫꋒꇈꈧꌠꎁꃅꈼꂟꄷ”ꄷ。

5 ꄚꄉ，ꑭꀕꏦꃰꃅꇛꌺꈧꌠꇁꌊꑱꌏꑸꄷꑟꇬꆏ， 6 ꑱꌏꑸꋀꏭ：“ꆍꊇꑠꃅꆍꌌꁈꏭꉉꆹ，ꑳꀊꊆꄹꇬ：‘ꆏꑸꎽꃰꃅꁏꐚꅇꂷꉡꍍꋉꄸꄀꋋꈨꀕꇬ，ꏸꏦꌋꀋꌸ。 7 ꇬꉚ！ꉢꀋꎪꃅꃰꃅꋋꂷꄸꈐꃸꆽꄉ，ꋌꁳꅇꌐꍈꈨꄷꌦꆏ，ꀱꋍꃅꄷꁧꇈ，ꀊꄶꇬꄉꅅꃅꇂꃴꌦꎻꌠꉬ’ꄷ”ꄷ。

ꑸꎽꃰꃅꉈꑴꋀꇷꇋꇀꌦ

8 ꑸꎽꂽꏃꌊꁈꂶꌠꆹꑸꎽꃰꃅꇁꏣꇓꈓꄉꂽꋌꏃꁧꀐꃅꑠꋌꈨꇬꆏ，ꋋꑌꀱꉈꑴꁧꀐ，ꄚ，ꑸꎽꃰꃅꂶꌠꆹꆀꇂꇓꈓꌉꁧꌠꉬꅊꇈ。 9 ꑸꎽꃰꃅꆹꌞꊿ‘ꇴꏃꃰꃅꄯꉳꏦꂽꇽꌊꑸꎽꇩꏤꌉꇁꀐ’ꃅꉉꌠꋌꊌꈨꇬꆏ，ꊩꌺꋌꇤꅷꒀꄊꃰꃅꑭꀕꏦꂿꁧꎻ， 10 ꋌꊩꌺꈧꌠꏭ：“ꆍꊇꒀꄊꃰꃅꏭꉉ，‘ꆏꇫꉘꇉꌠꏃꃅꌋꅽꏯ “ꑳꇊꌒꇌꇓꈓꈍꃅꑌꑸꎽꃰꃅꇇꈐꃹꀋꁧꌠꉬ”ꃅꉉ，ꋍꑠꋌꈱꆎꊏꌠꉬ，ꆏꋍꅇꄡꑇ。 11 ꑸꎽꃰꃅꈍꃅꄉꀉꁁꇩꏤꈧꌠꋌꈔꋏꇫꎭꌐꌠꆏꈨꀐꃄꄉ，ꆏꉪꇬꆏꈭꅐꄎꑴꅀ？ 12 ꉠꁍꁈꆹꇰꌒꇓꈓ、ꉳꇂꇓꈓ、ꆺꌝꇓꈓꌋꆀꄝꇁꌒꇓꈓꀀꌠꑱꄆꊿꈧꌠꐯꇯꋀꈔꋏꇫꎭꌐ；ꇩꏤꋋꈨꇬꌦꌋꈧꌠꋀꈭꋏꇁꋺꑴꅀ？ 13 ꉳꂸꇓꈓꃰꃅ、ꑸꇓꀡꇓꈓꃰꃅ、ꑭꃔꃬꑳꇓꈓꃰꃅ、ꑭꇂꇓꈓꃰꃅꌋꆀꑱꃭꇓꈓꃰꃅꈧꌠꀃꑍꋋꄮꇿꇬꐥꑴꌦ？’ꄷ”ꄷ。

14 ꑭꀕꏦꆹꊩꌺꈧꌠꇇꇬꄉꄯꒉꁬꌠꋌꊪꌊꀘꈭꐨꆏ，ꑳꀊꊆꑷꂿꇬꃹꆹꇈ，ꑳꀊꊆꂾꄉꄯꒉꁬꌠꋌꍔꄉ。 15 ꋍꈭꐨꆏ，ꑭꀕꏦꆹꑳꀊꊆꏭꑠꃅꈼꂟ： 16 “ꉬꉎꊩꌺꏸꇊꀨꑍꂷꌠꄩꑌꌠꑳꀊꊆ-ꑱꌝꆀꏃꃅꌋꀋ！ꆏꀉꄂꋧꃅꇩꏤꈀꐥꌠꏃꃅꌋꉬ，ꃅꃴꃄꅉꃅꆏꄻꄉꌐꌠ。 17 ꑳꀊꊆꀋ！ꆏꈀꎭꀕꃅꅳꀧꍔꄉꅲ；ꑳꀊꊆꀋ！ꆏꈀꎭꀕꃅꑓꋪꁉꄉꉜ。ꆏꑸꎽꃰꃅꑭꇂꏸꆺꋍꊩꌺꋌꁆꌌꐩꋊꐩꍂꃅꇫꐥꌠꏃꃅꌋꏭꉙꉎꌠꅇꂷꈧꌠꅲꇁ。 18 ꑳꀊꊆꀋ！ꑸꎽꃰꃅꋋꈨꆹꀉꁁꇩꏤꋀꇱꈔꋏꇫꎭꄉ，ꇩꏤꀊꋨꈨꃅꄷꇯꍝꃅꇁꊿꀋꋦꃮꀋꀆꅉꐛꌐꀐ。 19 ꇩꏤꀊꋨꈨꇬꌦꁱꌊꁱꈧꌠꋀꇵꃆꄔꐗꇫꎭꌐ；ꑞꃅꆏ，ꌦꁱꌊꁱꀊꋨꈨꆹꌋꀋꉬꃅ，ꊿꇇꄻꄉꌠꌩꄹꇓꂵꈨꀉꄂꉬ，ꑠꅹ，ꋀꊇꇱꈔꋏꇫꎭꌐꌠꉬ。 20 ꑳꀊꊆ-ꉪꏃꃅꌋꀋ！ꆏꀋꃅꈀꎭꀕꃅꉪꈭꋏꌊꑸꎽꃰꃅꇇꈐꐞꄉ，ꃄꅉꇬꇩꏤꈀꐥꌠꁳꆏꑳꀊꊆꀉꄂꏃꃅꌋꉬꌠꅉꐚꎻ”ꄷ。

ꑱꌏꑸꅇꂷꄜꌊꑭꀕꏦꃰꃅꇰ

21 ꋍꈭꐨꆏ，ꑸꃀꌦꄰꌺꑱꌏꑸꆹꊿꋌꁆꌊꑭꀕꏦꃰꃅꂿꆹꎻꇈ，ꇬꏭ：“ꑳꀊꊆ-ꑱꌝꆀꏃꃅꌋꄹꇬ：ꆏꑸꎽꃰꃅꑭꇂꏸꆺꌤꈧꌠꐛꅹꃅꉠꏯꇖꂟ， 22 ꑠꅹ，ꑳꀊꊆꆹꑸꎽꃰꃅꑭꇂꏸꆺꏭꅇꂷꑠꉉ：

‘ꑭꉢꇓꈓꀋꃋꑮꆜꈧꌠꆹ，

ꆏꉚꄸ，ꆎꒊꈧ；

ꑳꇊꌒꇌꅫꃀꌱꃀꈧꌠꆹ，

ꆎꂿꀒꆺꇤ。

23 ꆏꈀꄸꂷꏭꉙꉎꐺꌠꆏꌧꀕ？

ꈀꄸꂷꏭꍍꋉꄸꄀꐺꌠꆏꐙꀕ？

ꆏꄇꀋꉆꃅꄉꃚꁙꆹꁗꍓꌊꇬꏭꆹꂶꌠꈀꄸꉬ？

ꋋꆹꑱꌝꆀꄰꌃꎔꂶꌠꉬ。

24 ꅽꊩꌺꆏꁆꌌꏃꃅꌋꏭꑠꃅꉙꉎ：

“ꉡꆹꂽꍯꈍꑋꉢꏃꉘꁌꑟ，

ꇁꌊꆀꀠꇍꁦꀍꂷꑟ；

ꁦꀑꌿꇁꎺꁧꉢꇽꊉꄹꐚ，

ꄮꁧꎃꑐꀕꌠꉢꇽꇂꃴꅞ；

ꉡꆹꁦꌺꈀꂥꂤꅉꉢꑟꋺ，

ꌩꏪꇓꃴꆈꊉꀕꌠꉢꈴꋺ。

25 ꉡꆹꌞꃅꄷꒉꇸꇉꅤꄉꀆꐒꅝ；

ꉡꆹꑭꁆꍔꄉꉞꏹꒊꃀꒈꌺꈀꐥꃅꉢꄔꀊꃶꌐ”ꄷ。

26 ꌤꆿꈀꐥꋋꈨꃅ，

ꀋꉊꂴꏭꇯꆐꉢꉪꉢꏤꄉ，

ꀃꌋꀊꆨꇯꆐꉢꊭꉢꄐꄉ，

ꀃꑍꋋꄮꉢꄻꇫꅐꎻꌠꉬ，

ꋍꑠꆏꈨꀋꋻꅀ？

ꇓꈓꈫꈈꋋꈨꆹꉢꄺꆏꁳꐅꀘꄉꈥꅐꀜꅐꎻꌠꉬ。

27 ꑠꅹ，ꇓꈓꉹꁌꋍꏅꊋꁧꏢꁧ，

ꋀꊇꃨꆰꏸꈧ、ꎲꄏꑊꏦ；

ꀋꇊꆏꃄꅉꇬꁬꇁꆰꌺꌋꆀꉐꀖꉐꇁꌡ，

ꉈꑴꏜꁧꑲꏾꋦꌠꑌꌡ，

ꅿꀊꀋꒉꑴꌦꇯꆐꀊꃶꌦ。

28 ꆏꇫꑌꇬꉆꄿꂿ，

ꈏꃹꉇꅐꐺꄿꂿ，

ꆏꇨꇅꃃꅩꌬꀕꉡꊝꄿꂿ，

ꉢꅉꐚꌐꌠꉬ。

29 ꆏꇨꇅꃃꅩꌬꀕꃅꄉꉡꊝ，

ꆏꆺꒉꄇꒉꌠꑌꉢꈨꇁꀐ，

ꑠꅹ，ꉡꆹꇥꉧꌊꄉꆎꅲꄵ，

ꃅꍋꌊꄉꆎꈁꎰ，

ꆏꁳꈝꃀꂴꈀꈴꇁꏡꌠꍬꄉꀱꁧꎻꌠꉬ’ꄷ。

30 ꑭꀕꏦꏭꆏ，ꑳꀊꊆꑠꃅꉉ：‘ꉢꀋꃅꂴꇯꆐꌐꂷꍈꄻꆏꀦꄉꂿ： ꆍꊇꀋꃅꎼꈎꋚꁧꊨꏦꃅꇫꋦꇁꌠꋠ，ꑎꄹꈎꑌꋚꁧꊨꏦꃅꇫꋦꇁꌠꋠꄉꐥ；ꑑꄹꈎꆏ，ꆍꊇꊨꏦꋙꊪꒉꏽ、ꋚꒇꒈꋩ，ꑌꃀꌧꊈꆍꊪꄉꌠꇬꂶꀕꑢꅝꌠꉬ。 31 ꒀꄊꄰꊿꆶꈭꅐꄉꇫꋒꇈꈧꌠꆏ，ꀋꎪꃅꐴꅑꅿ、ꂷꅑꀮꇗꀕꇁꌠꉬ。 32 ꉹꁌꇫꋒꇈꈧꌠꆹꀋꎪꃅꑳꇊꌒꇌꄉꅐꇁ，ꊿꆶꈭꅐꈧꌠꑭꉢꁧꇬꄉꅐꇁꌠꉬ。ꄙꀕꃪꀕꂽꑼꌊꁈꑳꀊꊆꆹꀋꎪꃅꉌꂵꁨꐞꄑꄉꌤꋌꐘꋌꃅꐛꌠꉬ’ꄷ。

33 ꑠꅹ，ꑸꎽꃰꃅꃆꂮꆏ，ꑳꀊꊆꄹꇬ： ‘ꑸꎽꃰꃅꈍꃅꑌꇓꈓꋋꂷꇬꃹꇁꀋꄐ，ꉢꋌꁳꉇꏢꁻꄚꊐꀋꎽ；ꋌꄩꈜꌌꇓꈓꂾꑟꇁꀋꄐ，ꉢꋌꁳꌦꏭꋉꌊꈳꅉꄻꄉꇓꈓꋋꂷꌉꇁꑌꀋꎽꌠꉬ。 34 ꋌꂴꈝꃀꑞꏢꇬꈴꇁꆏ，ꊁꑌꀋꎪꃅꈝꃀꑞꏢꇬꍬꄉꀱꉈꑴꁧꌠꉬ。ꋌꈍꃅꑌꇓꈓꋋꂷꈐꏭꃹꇁꀋꄐ。ꋍꑠꆹꉢꑳꀊꊆꉉꌠꉬ。 35 ꉡꆹꉠꊨꏦꌋꆀꉠꁏꐚꄊꃥꐛꅹꃅꄉ，ꀋꎪꃅꇓꈓꋋꂷꐏꁇ、ꇓꈓꋋꂷꈭꋏꌠꉬ’ꄷ”ꄷꉉ。

36 ꊁꆏ，ꑳꀊꊆꆹꋍꊩꌺꂷꋌꁆꌊꑸꎽꂽꍆꈌꇬꄉ，ꑸꎽꂽꑼꊰꉆꃪꉬꄙꑹꋌꌉꌦꇫꎭ。ꊁꄹꉇꃅꄜꊾꈨꀀꄓꇁꇬꆏ，ꀊꁣ！ꊿꂿꇓꁨꐛꇫꎍꀐ。 37 ꄚꄉ，ꑸꎽꃰꃅꑭꇁꏸꆺꆹꍆꑳꍠꌊꀱꉈꑴꆀꀕꃥꇓꈓꀀꁧꀐ。

38 ꋍꑍꆏ，ꑸꎽꃰꃅꑭꇁꏸꆺꋍꌦꌋꅿꌦꇊꁱꑳꇬꄉꀍꃈꄚꐺꇬꆏ，ꅅꃅꌊꋍꌺꑸꄓꂰꆺꌋꆀꎭꆀꌝꑋꇱꌉꇫꎭꀐ；ꋍꈭꐨꆏ，ꌺꋋꑍꂷꁈꑸꇁꇂꃅꄷꃹꁧ；ꋍꌺꑱꌒꉳꄓꂶꌠꋍꊂꊛꄉꃰꃅꄻ。