ꑸꎽꂽꑱꇊꌒꇌꇓꈓꇷꇋꇁ
36
1 ꑭꀕꏦꃰꃅꄻꊯꇖꈎꐛꄹꈎꌠꆏ，ꑸꎽꃰꃅꑭꇁꏸꆺꂶꌠꇁꌊꒀꄊꇩꏤꇓꈓꈀꈬꈀꈈꈧꌠꃅꋌꅥꁖꌐꀐ。 2 ꑸꎽꃰꃅꆏꇁꏣꇓꈓꄉꋍꂽꏃꌊꁈꂶꌠꁳꂽꀉꒉꁥꇽꌊꑳꇊꌒꇌꑭꀕꏦꃰꃅꄷꆹꎻ。ꋀꊇꇁꌊꑳꇊꌒꇌꇓꈓꑟꇈ，ꎮꍹꒈꇤꏢꁮꄇꈜꑸꀬꒈꋌꅉꆹꏡꌠꇬꉆ。 3 ꑭꆺꏦꄰꌺꑱꆀꑸꏢꃰꃅꑷꂿꏲꂶꌠ、ꂷꋶꏲꌋꎹꀨꇂꂶꌠꌋꆀꑸꌒꄰꌺꒀꑸꐩꋊꄯꒉꏲꌋꂶꌠꐯꇯꁖꌌꋀꊇꂿꇁꀐ。4 ꑸꎽꇩꏤꂽꏃꌊꁈꂶꌠꆏꋀꏭ：“ꆍꊇꑭꀕꏦꏭꉉꆹ，ꑸꎽꃰꃅꅽꏯ：‘ꆏꑞꉘꇉꄉꑠꃅꄇꀋꉆꅍꐥꌠꉬ？ 5 ꆏꄹꇬꅽꊨꏦꋋꂷꌉꈿꏡꁈꌋꆀꊋꃤꀉꇨꃅꐥꑴꄷ，ꄚꉢꉜꇬ，ꅽꅇꂷꑠꆹꅇꈥꉐꈣꉬ。ꆏꈀꄸꂷꉘꇉꌠꉥ，ꑠꃅꉡꆼꁏꇁꀬꌠꉬ？ 6 ꆏꇬꉚꉏ！ꉞꏹꇩꏤꆏꇫꉘꇉꂶꌠꆹꀟꄖꆸꐔꏢꌡ，ꊿꇫꉘꇉꌠꀋꎪꃅꇇꋌꉀꀒꄵꊁꈴꏽꌠꉬ。ꉞꏹꃰꃅꆹꑠꃅꄉꊿꋋꉘꇉꈧꌠꊝꇬꎷ。 7 ꀋꄸꄷꆍꊇꉠꏯꆍꊇꆹꑳꀊꊆ-ꆍꏃꃅꌋꉘꇉꌠꉬꃅꉉꑲꆏ，ꆍꃰꃅꑭꀕꏦꂶꌠꏃꃅꌋꆦꑝꅉꌋꆀꀉꁁꁱꑳꈧꌠꋌꐆꇫꎭꌐꇈ，ꒀꄊꌋꆀꑳꇊꌒꇌꊿꏭ：‘ꆍꊇꑳꇊꌒꇌꆦꑝꅉꋋꂷꇬꄉꀉꄂꏃꃅꌋꏭꇗꅉꃅꉆ’ꄷꉉꀋꋻꅀ？ 8 ꆏꀋꃅꉪꌌꁈꑸꎽꃰꃅꌋꆀꏤꄉꎼ，ꉢꌉꈿꃆꀞꑍꄙꂷꄻꆏꁳꂿ，ꆏꃅꋩꂽꑼꑍꄙꑹꎹꎼꇁꄎꀕꉏ？ 9 ꎹꎼꇁꀋꄐꑲꆏ，ꆏꈍꃅꄉꉠꌌꁈꄰꂽꏃꌊꁈꀄꊭꇊꀄꊭꂶꌠꄩꊋꄎꂯ？ ꆏꉞꏹꂽꍯꌋꆀꃅꋩꂽꑼꈧꌠꉘꇉꄷꌠꅀ？ 10 ꉢꀃꑍꄚꋌꈚꅥꌉ、ꈔꋏꇁꌠꆹꑳꀊꊆꉪꐨꀋꉬꅀ？ ꑳꀊꊆꉠꏯ：“ꆏꁨꃅꄷꋌꈚꌉꆹꑲꆀ，ꈔꋏꇫꎭ”ꃅꉉꀐ’ꄷ”ꄷ。
11 ꑱꆀꑸꏢ、ꎹꀨꇂꌋꆀꒀꑸꌕꑻꌠꆏꑸꎽꂽꏃꌊꁈꂶꌠꏭ：“ꆏꈀꎭꀕꃅꑸꇂꉙꌊꅽꁏꐚꏭꉉ，ꉪꊇꅲꇮ；ꆏꒀꄊꉙꌊꉪꏭꄡꉉ，ꇓꈓꇬꉹꁌꈧꌠꈨꁧꂵ”ꄷ。
12 ꂽꏃꌊꁈꂶꌠꆏꋀꏭ：“ꉠꌌꁈꉢꋌꇤꅷꄚꇁꌠꆹ，ꆎꌋꆀꅽꌌꁈꏭꀉꄂꅇꉉꇁꎻꌠꅀ？ꊿꇓꉻꏭꌠꄩꑌꇈ，ꆍꊇꌋꆀꐯꇯꊨꏦꐔꋠ、ꊨꏦꍂꅝꈧꌠꏭꑌꉉꇁꌠꀋꉬꅀ？”ꄷ。
13 ꄚꄉ，ꑸꎽꂽꏃꌊꁈꂶꌠꄓꇬꉆꇈ，ꃚꋒꀊꂥꃅꄉꒀꄊꉙꌊ：“ꆍꊇꑸꎽꃰꃅꅇꅲꄡꑟ， 14 ꉠꌌꁈꑸꎽꃰꃅꄹꇬ：‘ꆍꊇꑭꀕꏦꇱꊏꅞꂵ！ꋌꆍꈭꋏꀋꄐꌠꉬ。 15 ꑭꀕꏦꆹꆍꏭ： ꆍꊇꑳꀊꊆꉘꇉꄉꐥ，ꑳꀊꊆꀋꎪꃅꆍꈭꋏꇁ，ꇓꈓꋋꂷꈍꃅꑌꑸꎽꇇꈐꇬꀋꃹꃅꉉ；ꆍꊇꋍꅇꑠꄡꑇ’ꄷ。 16 ꆍꊇꑭꀕꏦꅇꑠꄡꅲ！ꑞꃅꆏ，ꑸꎽꃰꃅꉈꑴꑠꃅꉉ：‘ꆍꊇꈌꊰꀐꄷꅐꌊꉈꏭꄉꉡꌋꆀꅇꏤꒃꇁꑲꆏ，ꈀꄸꑌꂱꑱꊨꏦꑌꃀꌧꊈꅝ、ꊨꏦꀋꃨꂶꂷꋠ、ꊨꏦꒉꇸꇉꇬꀆꐒꅝꉆꌠꉬ。 17 ꉢꆍꏁꃅꄷꆍꀀꅉꋌꈚꌋꆀꐯꌟꑠꈚꏀꁧꂿ。ꃅꄷꀊꋩꈚꆹꆿꍯꀮꇗꀕ、ꎧꏸꐝꇅꀕ，ꋚꂂꒉꎔꅐ，ꑌꃀꌧꊈꉻꈫꐛ。 18 ꆍꑭꀕꏦꅇꂷꑠꄡꅲ，ꑞꃅꆏ，ꋋꆹꆍꊏꄉ，ꆍꏭ：‘ꑳꀊꊆꀋꎪꃅꉪꊇꈭꋏꇁꌠꉬ’ꃅꉉꌠꉬ。ꇩꏤꀉꁁꈧꌠꌦꌋꑞꂷꑸꎽꃰꃅꇇꈐꄉꋍꊨꏦꇩꏤꋌꈭꋏꌊꁧꋺꀋ？ 19 ꉳꂷꇓꈓꌦꌋ、ꑸꇓꀡꇓꈓꌦꌋꈧꌠꇿꇬꐥ？ ꑭꃔꃬꑳꇓꈓꌦꌋꈧꌠꇿꇬꐥ？ꋀꊇꌒꂷꆀꑸꇓꈓꋀꈭꋏꌊꉠꇇꈐꐞꁧꋺꑴꅀ？ 20 ꇩꏤꋋꈨꇬꌦꌋꈧꌠꑞꂷꋍꇩꏤꋌꈭꋏꌊꉠꇇꈐꐞꁧꋺ？ ꑳꀊꊆꋋꂷꑳꇊꌒꇌꇓꈓꋌꈭꋏꌊꉠꇇꈐꐞꁧꄎꑴꅀ？’ꄷꉉ”ꄷ。