ꑱꌏꑸꄯꒉ 35

ꈭꋏꊌꌠꉹꁌꉌꇿꑓꇿꃅꀱꇁ

1 ꇈꈬꅔꈋꌋꆀꃄꅉꀊꃶꅉꆹꀋꎪꃅꉌꈯꑓꈜꇁ；

ꅔꈋꂤꏂꀠꑌꀋꎪꃅꄉꉌꇿꑓꇿꇁ，

ꁬꃨꀕꁖꇁꌠꌡ，

2 ꋍꀮꋑꀋꋒꃨꈍꀕ，

ꉌꈯꑓꈜ，ꇳꉔꇿꒉꏽ。

ꀑꒉꑊꒉꆀꀠꇍꃤꌡꑠꄻꋌꁳ，

ꎔꇁꃨꐨꏦꂱꉘꁌꌋꆀꎭꇍꐦꀞꌡꑠꄻꋋꇖ。

ꑳꀊꊆꀑꒉꑊꒉꆹꀋꎪꃅꄉꊿꊌꂿꇁ，

ꉪꏃꃅꌋꏁꇅꁤꇅꒉꐨꊿꊌꂿꇁ。

3 ꆍꊇꆹꆧꁨꊋꀋꑌꌠꁳꊋꑌꁦꅤꇁꎻ，

ꑭꆹꊋꀋꑌꌠꁳꇷꄙꊋꌭꇁꎻ；

4 ꊿꉌꂵꏸꏦꌠꏭ：

“ꏸꄡꏦ！ꆍꊇꇷꄙꃅꄉꐥ。

ꇬꉚꄉ！ꆍꏃꃅꌋꆹꀋꎪꃅꆍꎁꃅꁮꐚꄷꋪꒃ，

ꈁꁠꀉꇨꃅꄻꆍꏽ，

ꋌꀋꎪꃅꆍꊇꈭꋏꇁꌠꉬ”ꄷ。

5 ꀊꋨꄮꇬꆏ，ꑓꋩꌠꆹꀋꎪꃅꄉꑓꂿꇁ，

ꇉꁧꌠꑌꀋꎪꃅꄉꈨꉆꇁ。

6 ꀊꋨꄮꇬꆏ，ꐂꀜꌠꆹꀋꎪꃅꐕꅪꇍꀮꌟꃅꀜ，

ꑶꀠꉐꆂꑌꀋꎪꃅꉌꇿꃅꄉꇳꉔꇁ；

ꇈꈬꅔꈋꒉꐑꇫꍻꇁ，

ꅔꈋꂤꏂꀠꇬꒊꃀꒈꌺꇫꈴꇁ。

7 ꂤꏂꀠꊿꃪꅉꑠꇁꒊꄜꒈꇓꐛ，

ꃄꅉꒉꌤꀊꃶꅉꑠꇁꒉꐬꁖꅉꐛ。

ꀉꐩꀀꅉꀋꎪꃅꁬꆰ、ꒉꀟꏜꌋꆀꏜꁧꑠꇫꋦꇁ。

8 ꀊꄶꇬꆹꄇꈜꏢꇫꁮ，

ꄇꈜꋋꏢꊿꌌ“ꌃꎔꈝꃀ”ꂓꄉ。

ꊿꍍꆀꈧꌠꆹꈝꃀꋋꏢꈴꀋꉆ，

ꋋꆹꊿꈭꇁꈛꊒꍬꈧꌠꎁꃅꄐꏤꄉꌠ，

ꌺꇰꑴꅑꈧꌠꑌꈜꀋꑽꌠꉬ。

9 ꀊꄶꇬꆹꍀꉘꆿꅪꇬꀋꐥ，

ꑋꌈꉆꄧꑠꑌꇬꀋꈴ，

ꋀꑭꐨꍈꂯꇬꀋꁮ，

ꏃꃅꌋꋊꌌꇁꌠꉹꁌꈧꌠꀉꄂꀊꄶꈴ。

10 ꑳꀊꊆꋊꎼꇁꌠꉹꁌꈧꌠꆹꀋꎪꃅꀱꉈꑴꇁ，

ꉙꇁꑵꅉꃅꇁꌊꑭꉢꇓꈓꑟ，

ꐩꋊꐩꍂꃅꉌꇿꑓꇿꐨꋀꊌ。

ꋀꊇꆹꀋꎪꃅꄉꉌꇿꈮꈜꏽ，

ꐒꃤꊀꃤꌋꆀꌗꏿꑠꐯꇯꆶꁧꌐꌠꉬ。